Read Zeme Naga 1 KORINTHME 14 Bible Online

1 KORINTHME 14 - Zeme Naga bible

1 KORINTHME 14

¹Kehungbe je heka sing le lau, zai ningnui ne keliabe sam paurabe hang ne du Herui lam gu kelapeibe ramme je ningnui ’nchâ ze nei lau,

²Helad gechâmbe ne samsabe ze ziemmena dage sa mak ze kane Hera dage sa lei; pa samsabe ze mî de seuchi me lei, kane Herui gene ningchanglakbe ramme pa sa lei.

³Kane keliâbe sam pa pauruapeu ze â ziemmena dage penui je teichurabe, penui lung tew’ndirabe, zai lunghegeikatenaibe ngaurabe hangge sam sa lei.

⁴Helad gechâmbe ne samsapeu ze â pe runne pechu teleu’mmi ze bam lei, kane Hera gu sam pauruapeu ze â herakiangname je teleu’mmi ze bam lei.

⁵Chunage ningnui ’nteumena ne helad gechâmbe ne sam sa ra I lunei lei, kane keliâbe pauruarabe je lunei ka’nteu lei. Mige ne sakeli gai lei makchai â, keliâbe sam pauruapeu ze â helad gechâmbe ne samsapeu sua â di lei, chidezai herakiangname je teleu’mmi gai be ra hangge zeu.

⁶Chunage a puiname gau, helad châmcheîbe ne sa ze ningnui dage I ne wang be lêuzai ningnui hangge ’ndaikau kegiebe ngau ra lau, ningnui hangge mâ-keliâbe sam mei, nune mâ-gechîbe mei, nune keliâbe paugaibe sam mei, nune geteiliabe sam mei ze I ne salia mak tizai neu?

⁷Zai keringbe gabe merua zat ramme, metiam mei, ’nrabung mei, ’nsangdu bekuâ-pezaî luî gene pat’nchichiak kai mak tizai â, ’ndaikau leutew mei be mige ne ’ndaigum ze chî le ra lau?

⁸Zai herei kûbe hegeîluîkie zene bekuâ pat-getaurau gai bei dizai châuge ne herei hang kedâkua ra lau?

⁹Chigum ningnui dage du bam de lei; chi hekuâ gechâmbe seuchilakbe lad gene ningnui sam sa dizai chi sagaibe ze mige ne ’ndaigum seuchi ra lau? Ningnui tingkai ge sagaibe chang gu daseu.

¹⁰Mautaluisui ze kedeirei ge helad gechâmbe ramme misongga la lei, zai bekie parimbagabe â katte ga lei;

¹¹kane chi helad ge bekie parimba ze chî mak tizai â, anai ze kat-kat hangge hesangkedeu’mpeu hang chang gai du lei.

¹²Chigumrabe ningnui dage du bam de lei; ningnui ne Herui gu mâ-geteiliabe ramme ze ka’nchâ daze herakiangna tei’nsap ra tâtewbe ge tew’mmi ze tew ra rankai zu lau.

¹³Chidaze helad gechâmbe ne samsabe kau â, samsakelichi ra tâtewchibe rezie kie ra lei.

¹⁴Helad gechâmbe ne I kellum dizaine â a herui â kakellum da, kane helung ge â chize pechî ’nchigut me lei.

¹⁵I ’ndaikau tew ra lau? Herui gene I kellum ra de lei, zai helung gene du I kellum ra de lei; Herui gene I heleutew ra de lei, zai helung gene du I heleutew ra de lei.

¹⁶Maktizai â nang ne Herui gene ning suiyi ze toa bei lêuzaidu mige pe dage Herui kela bammakbe kau ne ’ndaigum ze nang ’ndaikau sa mei be ze pa chî mak ze nang ne ningnui suiyibe sam paugaibe ge, “Amen” ze acheuchi ra lau?

¹⁷Nang â ning suiyibe sam Hera dage pauliâ’mmi-desang ze lalau de lei, kane kêdapeu hang â mâ de teleu’mmi gai mak daseu.

¹⁸Ningnui ’nteumena suadu helad gechâmbe ze I â saka’ngkiebe ziegene Hera dage a suiyibe sam pau gai lei;

¹⁹acheuleusedu herakiangna lungge â helad gechâmbe ne sam chang kereu I sa ra sua â, miramme je I mâ-geteilia le ra hangge samkie mengeu runne sabe yi’nteu gu lei.

²⁰A puiname gau, ningnui lung mâ-ka’nningbe ge hename gum bam se lau; kesiabe lam ge â ’ngngiêne gum ze bam lau; kane mâ-ka’nningbe ge â hesuitingdime gum ze bam lau.

²¹Hingde ge acheu ze raw gai lei, “Helad gechâmbe sabe ziemmename dagene zai hesangkedeume mui gene, ai baudime dage I ne sam sa gai gu lei, zai, acheusede penui ne a kuâ ’ngking ra mak lei, ze Tingwang ne kacheu de lei,” ze acheu zeu.

²²Chigum ze helad chimakbe ne samsabe â keneime hangge â tâ’nningdauakbe tewbe chang me lei, kane neimakme hanggene zangnêu, keliâbe sam paube ze neimakme hangge â makse keneime hangge chang gum seu.

²³Chipauziegene herakiangname ’nteumena wang’ndui ze haimena ne helad gechâmbe ne samsabe ge hela kau ramme mei, nune neimakme mei ne gutdau dizai â ningnui ze kemieme bau de lei, ze penui ne acheu me ra semei?

²⁴Kane neimakme mei nune hela kau ramme mei ze gutdaube ge ningnui ’nteumena ne keliâbe sam pau ze bam dizai â pa seulube gene pe runne pe gu hemui chî’mmi du lei. Pa seulube leine zene pe hangge tâtew bei ze

²⁵ngaumakbe pe lungge ka’nningbe tak ramme ze hela ge teipat kai bei ze pa ne keikeu lu Hera je kellum ze, “Pelingsing ze Hera â aige ningnui ruage la de lei!” ze salia gu lei.

²⁶Chidaze a puiname gau, ’ndaigum ra lau? Ningnui ’nduiheruawang dege hangkat dage heleu, mâ-geteiliabe, keliâbe, helad gechâmbe mei nune samsakakelibe mei bam bam de lei. Mâgetaleine ze mâ-tew’mmirabe hangge peize tew kam gai lau.

²⁷Mi-mige helad gechâmbe ne sam sa dizai â peize hangna mei nune kielangbe hangchum mei runne sahelei ze bam lau; hangkat ne peize sakeli lau.

²⁸Kane sakeli ra mî de ga dizai â, peize ’nteumena ne Hera ki ge penui kuâneu mak ze bam lau, zai pe runne pechu benai Hera dage peize ’mpau ze bam lau.

²⁹Peize pauruame hangna mei hangchum mei runne sam sa lau, zai kêdame â ’ndaikau sam sa mei be ze peize ’nning’mmi ze bam lau.

³⁰’Ntau ze bambepeu dage mâge â liâ ze bam dizai â chi saraipeu je peize pe kuâneu mak bam de lau.

³¹Peize haimena ne chî le ra, zai haimena lungtew’ndi gai be ra ningnui hangkat-kat ne Hera dagene mâ-kengaube sam ze sa kam gai dui daseu;

³²kemeume gu herui ramme ze â penui kemeume ne reîbe kangge bam lei.

³³Hera â chikateguakbe Rapeu mak lei, kane yikabesingbe Rapeu daseu. Keneime ka’nchibe gu herakiangna ramme ge gum ze,

³⁴herakiangna ge ’mpuimi ramme â penui kuâneu mak rim bam ra lei. Penui je â sam sa ra lun mak daseu, kane hingde ne rang gum ze penui â hekuâ kangge bam ra lei.

³⁵Penui ne mâ-mâ betâudibe chîneibe lazai â, penui ki gene penui napeume dagene peize ’mmêt le lau. Hera kiangna lungge ’mpuimi hang â samsarabe ze ka’ngngambe chang daseu.

³⁶’Ndaigum ze lau! Hera gu sam ze ningnui dagene ’ndetpatbe kau semei, nune Hera gu sam ze ningnui dage runne wangchang kau semei?

³⁷Mi-mige ne pa ze Hera gu keliâbe sam pauruapeu hang ’nning gai mei nune pa ze Herui lam gu ziemmena hangge ’nning gai mei dizai â ningnui dage sam I rawgaibe ze Heguangpeu gu samde lei be ze pa chîrabe kau lei.

³⁸Mi-mige de aipau sam ze chigaihâ mak tizai â, pechu du chîgaihâ mak lei.

³⁹Chidaze a puiname gau, Hera gu keliâbe sam pauruabe ’nchâ ze nei lau, zai helad gechâmbe ne samsabe je nam se lau;

⁴⁰kane mâgetaleine ngauyibe benai ka’ntiabe ne tew gai ra lei.