Read Zeme Naga 1 KORINTHME 15 Bible Online

1 KORINTHME 15 - Zeme Naga bible

1 KORINTHME 15

¹Chunage a puiname gau, chi ningnui ne lutâulube, chuna chigene ningnui sap ze bambe, ningnui dage pauliâgaibe gospel,

²chi ningnui je tew’nringpatkaibe ze ningnui tei’ntiprip ze la mei be hangge I ningnui je rang’ngkia gai dai nei de lei, makchai â ningnui mâ-peruânggabe gene neigaibe chang gu daseu.

³Ningnui je I pau gai de lei. Krista ne anui gu hemui hanggene chaigaibeibe rasam chi betâu dilangbe raîlangbe, I ne du ngaube, rawdiakkaibe sam ka’nchibe gene rangbe luigum ze,

⁴chi pechu baigaibeibe, chi rawdiakkaibe sam ka’nchibe gene rangbe luigum ze pakechumbe mai ge pa chudaidibe,

⁵zai chi pa Kephabe suage saplia gai lu dege, kenieme hangkereu-ze-kename je liabe rasam zeu.

⁶Chipau châng mi puiname haî mengeu suadu kieme dage luakatne pa liâ kadai de lei, chige hanggesame â jeikeu di (chai di) bam leusedu, gekieme ne ring larei lei.

⁷Chipau chângge Jakobbe dage pa liâ kadai de lei, zai chipau chângge apostolme leine dage lia de lei.

⁸Pahekapbe ge â beting chang makgene lungkeube poine dage gum ze a dage du pa lia de lei.

⁹I apostolme ruage cheilangbe kau, achu â apostol lei ze kû ra du buimakbe kau de lei, Hera gu herakiangname je I ne tewsâ ze bambe ziegeneu.

¹⁰Kane Hera ka’nggiabe gene I ze aigum bam de lei, zai pa ka’nggiabe achu peibeibe ze â peruânggabe gene mak lei. Makte Hera ka’nggiabe a dage bambe zene nguatatewbeibe gene mei lêuzaidu, penui ruage mi-mige suadu I ne tâtew’nrî ze bam de lei.

¹¹I ne mei, penui ne mei lêuzaidu, chigum ze anui ne pau gai bei ze ningnui nei di de lei.

¹²Chunage chi chaidibe gene Krista je kuakchugaibeibe rasam pau ze bam dizai, ’ndaigum ze ningnui hanggesame ne kechaibe gene ringchukadaibe â ga lei ze acheuchi ra lau?

¹³Kane chaidime hangge ringchukadaibe bam makchai â, Krista je zuchu gai makse bam gu lei;

¹⁴Krista je zuchu gai mak bam dizai â anui sam pauruabe ze ’nta chang lei, zai ningnui keneibe ’nta chang lei.

¹⁵Chaidime je kuakchu gai me lei be aize gesangsing dizai â pa ne kuakchugaimaktaipeu, chi Krista je pa ne kuakchu gai bei de lei ze Hera je anui sakkitew gai ’ndi daze Hera je anui ne teiliakakedetbe hang du ngau gai gu de lei.

¹⁶Chaidime je zuchu gai mak tizai â, Krista je du zuchugaimakbe chang daseu.

¹⁷Krista je zuchu gai me lei dizai â ningnui keneibe ze mâtâu hang ga de lei, zai ningnui ze ningnui gu hemui ge bam rei de lei.

¹⁸Zai Krista gene jeikeudime ze du ga gai kam de lei.

¹⁹Chuna keringbe ting hangge runne Krista dage anui heguî ze bam dizai â anui ne mi pausialangbe chang gu de lei.

²⁰Kane Krista je â chaidime ruagene zuchu gai bei run de lei, jeikeudime rachî ngaube ramme ruage raîlangbe changbe zeu.

²¹Ziemmena ziegene kechaibe bam gum ze ziemmena ziegene chaidibe gene ringchukadaibe du bam de lei.

²²Adam gene haimena chai kam gai gum ze, Krista gene haimena je tew’nring kam gai gu daseu.

²³Kane mi run-runne pehî-hî ge chu dai kam gu lei: raîlangbe rachî, chi Krista zene churai de lei. Chipau chângge pa wangbe mai ge pe gu changbe kau ramme chu dai gu lei.

²⁴Chipau chângge â tâtewchibe, reziechibe, zai samrambe leine pa ne tew’nggakamlube chângge Bepeu, Hera gu heguangram peipat kai dezai betun gai de ra de lei.

²⁵Pa ne pe reime je pe pîkangge kaikamgaibe riâ samramchang sing gu daseu.

²⁶Heteurei, chi tew’nsiagainâlangbe ze â kechaibe ze de lei.

²⁷“Hera ne mâgetaleine pe pîkang ge bam ra kai kam gai bei de lei.” Kane “Mâgetaleine pe kang gene bam kam ra kai ’nde lei,” kacheube luage pe kangge chi mâgetaleine kaibeipeu je â teigut kai me lei be ze ngau-’nchichiak lei.

²⁸Mâgetaleine pe kangge bam kam gai dezai, pe kangge mâgetaleine bam ra kaibeipeu kangge chi pe Na ze du wang bam gai du de lei, dezai Hera ne mâgetaleine ge mâgetaleine chang ze bam de ra hangge zeu.

²⁹Acheumakchai ’ndaitew ra du ziemmena ramme ne chaidime hangge baptistew lau? Kechaime je kuakchu gai mak run lei zaine ’ndaitew ze ziemmena ramme ne chime hangge baptistew lau?

³⁰’Ndaitew ze pehî-peluâ ’nsangne ge kehingbe ge I bam bam lau?

³¹A puiname gau, ningnui dage a hegie, chi anui Wangpeu Isua Krista dage bambe gene nai’nsangne I chai bam lei! ze I geikang de lei.

³²Ziemmena samsa sa ze, Ephesi ge hekaune ramme benai I timpheu dizai â, a hangge ’ndaikau kegiebe lau? Chaidime je zuchu mak tizai â, “Anui teu ze sak ze bam zu kei lei, ’nchuamai dezai anui chai gu daseu.”

³³Choa gai bei ze bam se lau: “Mi ’ngnguasiame zene heluîlung yibe tew’nsiachi lei.”

³⁴Ningnui lung mâ-keyibe ’nningchi wang dai lau, zai hemui tâ tew gai ta lau. Hangesame â Hera ze châu mei be chî mak ze la lei. Ningnui je I ne tew’ngngam gai ra aize salia lei.

³⁵Kane mige ne, “Chaidime je ’ndaigumbe tak gene zuchu gai bei lau? Penui ’ndaigumbe pum bam ra lau?” ze acheu ze ’nneu gu lei.

³⁶Nang kemiebe kau de lei! Nang ne linggaibe ze chai gai makchai â, chize ringpat ra mak lei.

³⁷Nang ne linggaibe ze â bechâng dezai chîngchurabe, mâ bepumluî linggaibe zat mak lei, kane bechêu lei, dekuîmeu zai kêdadabe chêupum zat ramme gum zeu.

³⁸Kane Hera ne kelânggaibe luigum ze chi bechêu ze bepumluî tak hang pei ze bam de lei, zai mâ-mâ chêu zat leine hangge penui pum hang pei ze bam de lei.

³⁹Hemei zat leine ze ’nzuâ kam me lei, ziemmena chie châm, zai hekaune chie châm, ’nruine chie châm zai hekâ chie châm lei.

⁴⁰Tinggîm ge bambe pum zat ramme lamui, zai kedei ge bambe pum zat ramme lamui lei; kane tinggîm gu pengêudibe â pum kat lei, zai kedeirei gu pengêudibe â kêdabe pum lei.

⁴¹Naimik gu pengêudibe kat la, zai hekêu gu pengêudibe kêdabe la, zai hegi ramme gu pengêudibe kêdabe la lei; hegi ramme pengêudibe ze kat-kat dagene châm kam lei.

⁴²Chaidime chukadaibe tak ze du chigum bam de lei. Linggai’ndibe ze â gadaiduibe lei, kane kuakchugai’ndibe ze â gadailakbe lei.

⁴³Chize helasabe gene linggaibe de lei, chize pengêudibe gene zuchu gai bei de lei. Chize peran-gabe luî gene ling gai lei, chize tâtewchibe gene zuchu gai bei de lei.

⁴⁴Chi (ziemmena) ze hemeipum chang ze ling gai bei de lei, chize heruipum chang ze zuchu gai bei de lei. Ziemmena hemeipum bam dizai â heruipum du bam lei.

⁴⁵“Railangbe ziemmena Adam ze keringbe pum chang gai di de lei,” acheu ze raw gai ’ndi de lei; chi nâlangbe Adam ze keringbe peibe Herui chang gai di de lei.

⁴⁶Sedu herui lam gu ne bamrai mak ze hemeipum lam gu ne bamrai lei, bechâng ne herui lam gu ze bam lei.

⁴⁷Ziemmena keraipeu â kedei gene pat lei, kedei gu chang zeu; ziemmena pakenapeu â tinggîm gene wangkeu de lei.

⁴⁸Kedei gu changme leine â kedei ne ’ndamgaibeipeu gum bam lei; tinggîm gu changme â tinggîm ’mbene wangkeupeu gum bam lei.

⁴⁹Kedei ne ’ndamgaibeipeu luitak anui pung gum ze tinggîm ’mbene wangkeupeu luitak du anui pung gu lei.

⁵⁰A puiname gau, aize ningnui je I ranglia lei: hemei benai hejai â Hera gu heguangram nguaheuchi lak lei, zai gadaiduibe zene gadailakbe nguaheu ze bam me lei.

⁵¹Ni! hekimsam ningnui je I salia lei. Anui haimena jeikeu kam ra mak lei, kane anui ’nteumena je tewkeli kam gai bu lei,

⁵²luakat nakkaibe, mi mik kekiplapkaibe kakgene, hegeîluîkie nâlangbe gezeu. Hegeîluîkie ’mmut kai gu lei, dezai chaidime je gadailakbe ge zuchu gai bu lei, zai anui je tewkeli gai bu lei.

⁵³Ai gadaiduibe zat deze gadailakbe zat zene bâ gai sing gu, zai ai chaidaiduibe zat deze chaidailakbe zat zene bâ gai sing gu daseu.

⁵⁴Gadaiduibe deze gadailakbe zene bâ gai, zai chaidaiduibe deze chaidailakbe zene bâ gai dezai, acheu ze rawgai’ndibe sam ze wangchang gu lei: “Kechaibe je â ngam lu ze ’nzua ’nde lei.”

⁵⁵“Hei, kechaibai, ning gu kengambe ze ’ndaige la lau? Hei, kechaibai, ning ’nchai keteube ’ndaige la lau?” ze kacheube zeu.

⁵⁶Kechaibe gu ’nchai keteube â hemui ze de lei, zai hemui gu tâtewchibe â hingde ze de lei.

⁵⁷Kane anui Wang Isua Krista ziegene anui je kengambe peipeu Hera dage hesuiyibe sam peize salia bam lau.

⁵⁸Chidaze, a puiname kehungme gau, ’ntiprip ze, zai ’ngngai mak ze, pehî’nsangne ge Heguangpeu gu tâ ge ningnui laîkai ze bam lau, ningnui tâtewhereugaibe ze Heguangpeu dage ’nta chang ra mak lei be chî lu zeu.