Read Zeme Naga 1 KORINTHME 16 Bible Online

1 KORINTHME 16 - Zeme Naga bible

1 KORINTHME 16

¹Chunage keneime ka’nchime hangge ka’ngngâbe-hâ lurabe tedeu ge: Galatia lungge herakiangname je I geteigaibe luigum ze ningnui du chigum tew zu lau.

²’Ntakkak gu tingnaimikpui raîlangbe mai ge ningnui ’nteumena ne pa mâ-mâ tâtew-hipatlube ze lupatchâm gai lu kaigekua gai le lau, chidezai I wang dezai, rehâtewrabe â ’nnang ta de ra hangge zeu.

³I wangchang dezai ningnui gu kela ze Jerusalem ’mbe teichang ra hangge ningnui ne kelânggaime je I ne penui je chigaihâbe leisi raw zun lu ze tat ra lang gai gu lei.

⁴Zai I du penui je ngua’mpamtat ra ’nnang zai â nguatat ra de lei.

⁵Zai Makedonia I tatwangtui lu dezai ningnui dage I ’ngkia gai gu lei, Makedonia tatwangtui gai lu ze,

⁶ningnui dage bam gai ze, hetating du ’nnaitud kai ra mei du I ’nning gai daseu, chidezai I ’mbei ze tatkaibe ge ningnui ne achu nguatinggeu zun gai ra hangge zeu.

⁷Chunage I acheu ze tatbe a ’mpuiduâ gene ningnui je hedau gai ra hang â I nei mak lei; Heguangpeu ne pei gai bei zai â tingkat â ningnui dage I ’nnaibam gai ra kaheguî lei.

⁸Kane Pentikos ting riâ Ephesi ge I bamchang gu lei,

⁹tâtew-desang gai ra a hangge ’mpuî latbakkaibeibe ziegene, zai ka’nggime misongga bamdibe ziegeneu.

¹⁰Timothibe wang dezai peize ningnui ruage bamtemichai gai ra pe hangge ningnui ne tinggeu gai be lau, pa du I gum ze Heguangpeu tâ ka’nggua daseu.

¹¹Chigum ze mî ne de peize pechu ngau’nna gai se lau. Pa tatrabe ’mpuî hangge pechu nguatinggeu zun gai be lau, dezai pa a dage helatwang dai le ra hangge zeu; mi puiname ne pechu pe pamtew nguawang ra I ne kaheguî daseu.

¹²Anui puina’mpeu Apollobe je â mi puiname kêdame bau je ngua lu ningnui dage ’ngkiâmie gai ra I ne rang-kadesang lei, kane chuna wang ra hangge â pa ne ’nningpat lak kerei de lei. Pedâuyibe pa ne ngau dezai pa wang gu lei.

¹³Piekua’mmi ze keneibe ge sap’ntip ze bam lau, helungdi ze, heranchi ze bam lau.

¹⁴Ningnui tâtewbe leine ge kehungbe ne peize tew gai ze bam lau.

¹⁵Chunage a puiname gau, Stephanasbe kiduîme ze Akaia ge Kristian gutrailangme bau de lei be benai keneime ka’nchime guâ ’nggua ra penui runne penui je peipatkaime bau de lei be ze ningnui ne chî lei;

¹⁶aigumbe kau ramme, zai mi puiname tâ-yibe tewme leine benai tâtewka’nrîme kuâ kangge ningnui bam ra ningnui je I ne gecheu gai de lei.

¹⁷Stephanabe, zai Phortunatabe, zai Akaikasbe aime ne ningnui gabe ge wang bampuigaibeibe ziegene penui wanggaibe peireige I ne a suiyi-kadesang de lei;

¹⁸penui ne a lungsui benai ningnui lungsui ze tewrechida gai bei dadegeu. Aigumbe kau ziemmena ramme je chî ze bam lau.

¹⁹Asia ge herakiangname ne ningnui je rechâ de lei, Akuilabe benai Priskale zai penai ki ge herakiangname bamme bau ne ningnui je penui lungsuiyibe ne Heguangpeu gene rechâ de lei.

²⁰Mi puiname leine ne ningnui je rechâ de lei. Kakeputbe ka’nchibe ne kat-kat je rechâ ze bam lau.

²¹I Paulbe ne a ba sing ne ningnui dage ai rechâgaibe sam raw gai de lei.

²²Mi-mige Heguangpeu je hungmakbe kau je â deset kai be lau. Anui Wangpeu, wangkeu lau!

²³Heguang Isua Krista ka’nggiabe ningnui dage peize bam bam lau.

²⁴Krista Isua gene I kehungbe ze ningnui ’nteumena dage peize bam lau. Amen.