Read Zeme Naga 1 KORINTHME 2 Bible Online

1 KORINTHME 2 - Zeme Naga bible

1 KORINTHME 2

¹A puiname gau, ningnui dage I wangbe ting ge Hera gu mi ningdaulakbe gechukbe rasam hemuichabe benai kaningchingbe sam zat ramme pau ze ningnui dage I wang gai mak lei.

²Isua Krista rasam benai pechu heling ge giagaibe rasam runne zangno, kêdabe â I ningnui ruage mâ de chî mak ze bam de ra a lungge ’nningsing gai ’ndi dadegeu.

³Zai a ran-gabe benai hingkakedunbe gene I ningnui ruage bam de lei;

⁴a samsa benai I sampaube ze ningching ze damchibe gene mak ze kane Herui benai tâtewchibe liâbeibe gene I sa lei,

⁵chidezai ningnui keneibe ze ziemmena ningching tak ge bam mak ze kane Hera gu tâtewchibe ge bam de ra hangge zeu.

⁶Acheuleusede chuna rehei gu kaningchingbe mak sedu zai chuna rehei ge samramme chi gagaiderame gu kaningchingbe tak mak sedu besuitewdime ruage â kaningchingbe tak ze anui ne geteilia de lei.

⁷Kane anui â Hera gu ningchanglakbe benai tei’mbai’ndibe kaningchingbe ze geteilia lei, chize anui ngêudi ra hangge Hera ne kedeirei bam makge pa ne die gai ze kaikua’ndibe zeu.

⁸Aize chuna rehei ge samramme ne mî de chî mak lei; penui chize chî lu laîzai â pengêudibe Wangpeu je heling ge penui ne gia gai ra mak lei.

⁹Kane acheu ze raw gai ze, “Hemik ne ngautâumakbe, zai hekun ne du seutâumakbe, zai ziemmena lung gene chichangmakbe, Hera ne pechu kehungme hangge kedâkuagai’ndibe,” kacheube gum ze,

¹⁰anui je â chize Hera gu Herui ne teilia bei de lei. Herui ne mâgetaleine peu ze Hera gu mâ-gechukbe ramme ’nsangdu peu dadegeu.

¹¹Ziemmename kaningchingbe tak ze chî ra hang chi pe dage bambe herui ne makchai â, ziemmena châu ne chî ra lau? Chigum ze Hera lung tak â Hera gu herui ne makchai â mî de ’nningchangchi lak lei.

¹²Zai chunage kedeirei gu herui ze anui â ngau mak lei, kane Hera dagene patbe Herui ze anui â ngau de lei, Hera ne anui je kela ramme peibe ze chî’mmi le ra hangge zeu.

¹³Zai aize ziemmena kaningchingbe gene geteibeibe sam ramme gene anui sa mak lei, kane Herui ne geteigaibeibe sam ramme gene anui sa lei, Herui lutaulume dage herui lam gu samsang ramme penui je sakeli gai zeu.

¹⁴Herui lam gu ziemmena makbe kau â, Hera gu Herui Ka’nchibe kela ramme je ’nchâ mak lei, chiramme ze â pe hangge kemiebe chang dadegeu, zai pa ne chi Herui Ka’nchibe kela ramme bambe tak ze ’nningchi lak lei, chiramme ze â herui lam ’mbene chî ra pei ’ndi dadegeu.

¹⁵Kane Herui lam gu ziemmena ze â, mâgetaleine ge piechi kam ze bam lei, kane pe peireige â, mî ne piepatchi lak lei.

¹⁶“Pechu mâ-geteilia ra châu Tingwang lungtak chî lu lau?” Kane anui â Krista lungtak pung lei.