Read Zeme Naga 1 KORINTHME 3 Bible Online

1 KORINTHME 3 - Zeme Naga bible

1 KORINTHME 3

¹Kane a puiname gau, herui lam gu ziemmena ramme dage gum ze ningnui je I ’mpauchi lak lei, kane hejai pumsie ge bamme benai Krista gene napoine chang ze bamme dage gum ze ningnui je I ka’mpau lei.

²Ningnui je I ne hetak kechibe ne makse tungdui ne kei de lei; chipau hangge ningnui periâ chang mak rei lei; zai chuna hang chipau hangge ningnui kedâkua mak rei lei,

³hejaipumsie gu ziemmena ningnui chang ze bam bam di rei dadegeu. Ningnui ruage hemimeube benai ’nggî-kahegeibe bambe luage ningnui hejaipumsie gu ziemmename mak mei, chi ningnui ketakedau kau gum chang ze bambe zeu?

⁴Hangkat ne, “I â Paulbe chai suibe kau lei,” acheu, zai kêdapeu ne, “I â Apollobe chai suibe kau lei,” ze ningnui kacheube luage ningnui ze ziemmena ’mpangpaibe kau changbe mak semei?

⁵Acheuzaine Apolobe ze ’ndaikau tâ tewbe kau lau? Paulbe ze ’ndaikau tâ tewbe kau lau? Anai hangna ze tâka’ngguame hangna, Heguangpeu ne sumgaibeibe luigum ze anai dagene ningnui neidibe kau de lei.

⁶I ne tau gai bei ze Apollobe ne hedui zuâ gai lei, kane chîngchu ra hang â Hera ne tew gai lei.

⁷Chidadege chîngchu ra peipeu, Hera runne betâudi lei, taugaipeu du matâu hang ga, zai heduizuâbepeu du matâu hang ga lei.

⁸Taugaipeu benai heduizuâpeu ze ’nzuâ lei, zai penai hangkat-kat ne tâtewgaibe luigum ze penai hî ngau gu lei.

⁹Anai â Hera hangge tâtewkaheruame kena daseu; ningnui â Hera gu helu, zai Hera gu heki tewgaibe de lei.

¹⁰Hera ne achu ka’nggiabe kela peibeibe luigum ze, heki tewbe ge heki tewchipeu gum ze I ne hekipung dîmchu gai de lei, zai kêdapeu ne chipau peireige heki tew gai lei. Chipau peireige heki tewme je peize ’ntîngchi le lau.

¹¹Hekipung dîmchugai’ndibe peireige hekipung kêdabe mi-mige de tewgaichi lak lei, chipau hekipung ze Isua Krista ne changbe zeu.

¹²Chunage chi hekipung peireige mi-mige de gechâk ne mei, gepût ne mei, tingchu pemîhungbe ne mei, heching ne mei, ’nggai ne mei, megau ne mei ze hekitew dizaine â,

¹³mi-mi gu tatew ze liâpat kai kam gu lei; chipau naimikpui zene chize rapatlia gai gu lei, chipau naimikpui ze â hemi ne teilia gu, zai mi-mige ne tâtewgaibe zat ramme ze chî ra hemi ne kedakwang gu daseu.

¹⁴Mi-mige ne chipau hekipung peireige heki tew gai ze sap bam dizai â, getoabehi pa ngau gu lei.

¹⁵Mi-mige gu tatew ze rû ’ndizai â pe hangge kagekumbe chang gu lei, pechu â tew’nringpat kai bei sedu pa ze hemi gene ’mbiapatbe kau riâ gum bam gu lei.

¹⁶Ningnui â Hera gu kellumki lei, zai Hera gu Herui ze ningnui ge bam la lei be ningnui chî mak mei?

¹⁷Mi-mige de Hera gu kellumki tewka’nsiabe kau je â Hera ne pechu tew’nsia gu lei. Hera gu kellumki â ka’nchibe kau, zai chipau kellumki â ningnui daseu.

¹⁸Mi-mige de pe runne pechu peize choa se lau. Ningnui ruage mi-mige de chuna rehei ge kaningchingbe kau hangge pechu ’nninggaibe kau â, ziemmena kaningchingbe kau chang le ra hangge pechu peize kemiebe kau chang gai de lau.

¹⁹Ai kedeirei gu kaningchingbe â Hera hangge kemiebe chang daseu. “Pa ne kaningchingme je penui ningching tak kesiabe gene nîm lei,” ze rawgai’ndibe gum zeu,

²⁰“zai Tingwang ne kaningchingme gu kaningchingbe ramme ze â matâu hang ga lei be chi lei,” ze acheu ze du rawgai’ndibe gum zeu.

²¹Chidadege mi-mige de ziemmename dage kedikuâ-kua ze peize bam se lau. Mâgetaleine ningnui gu kam daseu;

²²Paulbe mei, nune Apollobe mei, Kephabe mei, nune kedeirei mei, keringbe mei, kechaibe mei, nune chuna ting mei nune hesuating mei, mâ-pelane ze ningnui gu kam de lei;

²³zai ningnui â Krista gu lei; zai Krista â Hera gu lei.