Read Zeme Naga 1 KORINTHME 4 Bible Online

1 KORINTHME 4 - Zeme Naga bible

1 KORINTHME 4

¹Anui ze â aigum ze Krista guâ ka’ngguame zai Hera gu mâ-mâ ’nningchilakbe zat ramme ge besuitew ze ka’ngguame bau lei be ze miramme ne peize ’nningchi ra de lei.

²Zai tâka’ngguame bemuitewme hang betâudilangbe ze â penui ze ’nnumtewduibe zat changrabe ze lei.

³Kane ningnui ne mei, nune ziemmename gu samrambeki ne mei, achu samrambe ze â a hangge â mâ-kecheîbe poine lei. I â a runne du achu samram gai me lei.

⁴A peireige mâ de sa’nsiarabe a runne I â achu chî me lei, kane chize ne achu tew’nzeigaichi lak lei. Achu samramrapeu â Tingwang lei.

⁵Chidaze beting wangchang makgene, chunage kemuîbe ge baigai’ndibe zat ramme ge lerba gai ze helung ge tew ra ka’nningbe zat ramme teiliagairapeu, chi Heguangpeu wang makgene samrambe sam ze sa gai se lau. Chidezai mi-mige ’nteumena ne pechu satoa gai ra bambe sam ze Hera dagene ngau kam gu lei.

⁶A puiname gau, ningnui hangge gierabe hanggene airamme leine ze Apollobe anai hangna dage tew kam gai de lei, dezai rawgai’ndibe sam luigum ze ningnui bamchi ra anai dagene ningnui heli le ra, dezai ningnui ruage mige ne de hangkat ziegene mi ’nrîmyi lu kêdapeu je ka’nggibe chang mak ra hangge zeu.

⁷Châu ne nang ge gechâmbe ngaupat kai lau? Nang ne ning dage ’ndaikau lutâumakbe la lau? Nang ne chize lutâu de lei dizai â ningchu ’ntane peibeibe ngaumakbe luigum ’ndaitew ze nang kedikuâ-kua ze bam lau?

⁸Ningnui â kenûge ’nsangsiak ze bamdibe nung ze hêu! Ningnui â kenûge lung’ntuadibe nung ze hêu! Anui bam mak ze heguangme ramme ningnui changdibe nung ze hêu! Zai anui nguasamram ze bam ra ningnui ne heguang bei nung laîzai hêu!

⁹Anui je â hekaplangbe gum ze Apostolme hang chang ze hela ge teipatkailiabeibe hang gum ze I ne ’nning gai lei, tewchatkairabe hangge samramgaibeibe ziemmename gum zeu; anui ze â kedeireime ne, angelme ne, zai ziemmename ne, miksungpie bamrabe zat hang changgaidibe ziegeneu.

¹⁰Anui â Krista hang ziegene kemieme chang ze bam lei, kane ningnui â Krista gene kaningchingme chang ze bam lei; anui â anui ran-ga lei, kane ningnui â ningnui ranchi lei. Ningnui je â hengêutew’ndi ze bam lei, kane anui â helêuku ze bam lei.

¹¹Chuna riâ chang ze anui â ’njei-herei ze bam lei, mi paîni kai’nchui mak ze bam lei, zai miramme ne tewnei-neibe tak tew ze bam lei, zai mi ki ga ze lung ze bam lei,

¹²zai anui â hereu ze mi ba ne tâtew ze bam lei. Miramme ne anui je pedaigaibe luage anui â ’nnam gai lei; tewsâbeibe luage anui â lie gai lei;

¹³mi ’nsâ tew’nsiagaibeibe luage desieyi ra anui â kiam lei; chunage anui â kedeirei gu kerachut, chi mâ-mâ zat leine gu kahebâbe zat hang chang gai di ze, chigum hebâ ze bam di de lei.

¹⁴Ningnui je tew’ngngam gai ra hangge aipau sam ze I raw gai mak lei, kane a na kehungme je gum ze nguageteigai’mmi ra aize I raw gai lei.

¹⁵Krista gene ningnui je ’mpuî gechiauliâme, seikamlakme bam sede ningnui peume hangge â misongga bam me lei. Krista Isua gene I ze ningnui peu chang de lei; samkeyibe pauruabeibe ziegeneu.

¹⁶Chidaze a tak kahelime chang ra ningnui je I kiam lei.

¹⁷Chipauziegene pebâm’nsangne ge herakiangna ’nsangne ge penui je I nguageteiliabe gum ze Krista ge I kebambe tak ze ningnui dage rang’ngkia gai ra I kehungbe Timothibe, Krista gene lungsangtewchibe napoine je I ningnui dage lang gai de lei.

¹⁸Ningnui dage I wangkeu mak ra hangge ’nnum gai lu ze, hanggesame â gechîrettew bam lei.

¹⁹Kane mâtiegemak ze ningnui dage I wang gu lei, zai Heguangpeu ne nei bei zai â chi gechîrettewme gu samsa je mak ze penui gu tâtewchibe tak ze I ne piepat kai gu lei.

²⁰Hera gu heguangram â sachibe gene chang mak lei, kane tâtewchibe gene chang lei.

²¹Ningnui ’ndaikau ka’nchâ lau? Hetui tei lu ze ningnui dage I wang ra lunei mei, nune karenuabe lungtak pung lu ze wang ra ningnui lunei lau?