Read Zeme Naga 1 KORINTHME 6 Bible Online

1 KORINTHME 6 - Zeme Naga bible

1 KORINTHME 6

¹Ningnui ruage mige ne mi puina’mpeu peireige hetû’nnakkaidibe luage keneime ka’nchime dage tat mak ze neimakbe kau dage tat ra pa pe sui-ka’nzeu semei?

²Ziemmena ka’nchime ne kedeirei je samram gu lei be ningnui chî mak mei? Kedeirei je ningnui ne samram ra dizaine â hetûpoine ramme ge ningnui ne samramchi lak ra semei?

³Anui ne angelme peireige samram ra lei be ningnui â chî mak mei? Chuna keringbe ting gu ramme peireige nung â ’ndaizeu samram dui ra lau!

⁴Acheuzaine aigumbe tûdeu ramme ningnui dage bam dizai, ’ndaitew ze herakiangna ne mâ-hang chakkaimakme suage chiramme ningnui ne teipat’ngking gai lau?

⁵Ningnui je tew’ngngam gai ra hangge aize I sa lei. Mi puiname kakge samram gai ra ningnui ruage kaningchingbe kau mî de ga di ze,

⁶mi puina’mpeu ne mi puina kêdapeu peireige neimakme masuage hetû kai mei?

⁷Kat kat peireige hetû kaibe ze ningnui hangge kahelêube chang lei. ’Ndaitew ze betâumakbe tewbe liegailak lau? ’Ndaitew ze penui taksiabe liegailak lau?

⁸Kane ningnui zene ningnui puiname peireige ’nsangdu betâumakbe tew ze ningnui taksia de lei.

⁹Telingmakme â Hera gu heguangram ze nguaheu ra mak lei be ze ningnui chî mak mei? Ningnui je peize choa gai se lau; hangleutewme mei, heraluîtewbe je kakellumme mei, kahemame mei, lungkaheringme mei,

¹⁰kahegame mei, kadekumme mei, kameneume mei, ’nrûchime mei, miramme gu sut-teume mei, chime ze â Hera gu heguangram ze nguaheu ra mak lei.

¹¹Zai ningnui ruage hanggesame â chigumbe kau ramme lamui lei. Kane ningnui je â Heguang Isua Krista ji gene benai anui Rapeu gu Herui gene hui gai lu tew’nchi ze tew’nzei gai bei de lei.

¹²“Mâgetaleine a hangge tew le duî kam lei,” kane mâgetaleine ze betâu hang ga lei. “Mâgetaleine a hangge tew le dui kam lei,” kane I â mâ-mâ gu kebang kangge bam ra mak lei.

¹³“Mi hetak â mi bungpui hangge bam lei, zai mi bungpui â mi hetak hangge bam lei”—kane aibe kena â Hera ne deî’ngga gu lei. Mi pum â hangleutewbe hanggene bam mak lei, kane Tingwang hangge bam lei, zai Tingwang ze mi pum hangge bam lei.

¹⁴Zai Hera ne Heguangpeu je zuchu gai bei de lei, zai anui je du pe gu tâtewchibe gene zuchu gai gu lei.

¹⁵Ningnui pum ramme â Krista pumtaura ramme lei be ningnui chî mak mei? Chidaze Krista pumtaura ramme I ne tei lu ze, hepumzuateupui pumtaura hangge chiramme tew gai ra semei? Mâdau de mak lei!

¹⁶Mi-mige de pe pumzuateupui dage heruagaibe kau â, chipaupui dage pa nguakattew di de lei be ningnui chî mak mei? “Hangna ze pumkat chang gu lei,” ze raw gai daseu.

¹⁷Kane mi-mige de Heguangpeu dage heluadibe kau â, pe dage herui ge nguasuikattew di de lei.

¹⁸Hangleutewbe gene ’mbia de lau. Ziemmena ne kêdabe hemuitewbe zat leine â, hejaipum gene hela ’mbene lei; kane hangleutewbe ze â, pe pum peireige hemui pa tew gai lei.

¹⁹Hera dagene ningnui ngaube chi ningnui pum ze â Herui Ka’nchibe gu kellumki lei be ningnui chî mak mei? Ningnui ze â ningnui gu mak lei;

²⁰ningnui je â pemî ne lui lu de lei. Chidaze ningnui pum ne Hera ngeutew lau.