Read Zeme Naga 1 KORINTHME 7 Bible Online

1 KORINTHME 7 - Zeme Naga bible

1 KORINTHME 7

¹Zai chunage ningnui ne sam rawgaibe deu ramme ge I ’nning gai ra de lei. ’Mpeumi ne ’mpuimi je deîtaumakrabe yi lei.

²Kane hangleutew ra keduaibe bambe ziegene ’mpeumi ne pe nâu singbe bam ra, zai ’mpuimi ne pe napeu singbe bam ra lei.

³Kelaktewbe ge pe napeu ne pe nâu je pe nâu kezei hang ’nning gai ze nguatatew ra, zai chigum ze pe nâu ne du pe napeu je pe napeu kezei hang ’nning gai ze nguatatew ra lei.

⁴’Mpuimi â pe pum peireige pa ne rezietei ze samram ze bam mak ze, kane pe napeu ne rezietei ze samram ze bam daseu; chigum ze ’mpeumi du pe pum peireige pa ne rezietei ze samram mak ze, kane pe nâu ne rezietei ze samram ze bam daseu.

⁵Kellumrabe hangge ningnui hesui’nsam lu ningnui runne ningnui je peipatkai’ndibe pedeu chikâbe la lei makchai â, kat-kat je ngaurau se lau; chigum chang di leuzai du ningnui heruawang dai de lau, makchai â, mi runne mi je gesutchilakbe gene Satan ne ningnui je duai gu lei.

⁶’Nggia ze lun-gaibe lam gene I aize sa lei, diesinggaibe mak lei.

⁷’Nteumena ne I gum ze bam ra hangge I lunei lei. Kane mi-mige ne pe run-runne gu Hera dagene kela ngaube la kam lei, hangkat ne kela zat kat, zai kêdapeu ne kela kêdabe zat kat ngau zeu.

⁸I gum ze a runne bambe tak ze yi lei be rasam ze kelaktewmakme benai kemîpuime dage I salia gai de lei.

⁹Kane penui runne ne penui je gesutchi lak zai â penui kelaktew ra lei. Mi lungneu bam ra suadu kelaktewbe â yi daseu.

¹⁰Kelaktewdime dage I ne mak ze Heguangpeu ne die gai lei, ’mpuimi â pe napeu je meu mak ra

¹¹(kane pa ne meu dizai â peize pechu mei mak ze bam ra, zai pe napeu dage nguadesieyibe tew dai ra lei)— zai chi pe napeu ne pe nâu je tatuâ mak ra lei be zeu.

¹²Heguangpeu ne mak ze I zene miramme ’nteumena dage salia lei, mi puina’mpeu mige hangkat pe nâu (Hera je) neimakpui pe dage bam ze, chi pe nâu zene pechu ngualung ra hezuâ dizai â peize pa ne pechu tatuâ ra mak lei.

¹³Mige ’mpuimi hangkat ne pe napeu (Hera je) neimakpeu pe dage bam ze, chi pe napeu zene pechu ngualung ra hezuâ dizai â peize pa ne pechu meu ra mak lei.

¹⁴Pe napeu neimakpeu je pe nâu dagezene tew’nchi gai bei de lei, chigum ze pe nâu (Hera je) neimakpui je pe napeu dagezene tew’nchi gai bei de lei, makchai â ningnai name â ’nchi ra mak daseu; chigumbe gene runne penai name ’nchi ra chang lei.

¹⁵Kane (Hera je) neimakbe kau hangkat ne penai châm de ra nei dizai â peize châm de lau; aigumbe deu ge mi puina’mpeu mei, nune mi puina’mpui mei je nam ra ga lei, Hera ne anui je desieyi bam ra kû gai lei.

¹⁶Nang ’mpuimi gau, ning napeu je nang ne tew’nring dui lei be ’ndaigumbe tak gene nang chî ra lau? Nang ’mpeumi gau, ning nâu je nang ne tew’nring dui lei be ’ndaigumbe tak gene nang chî ra lau?

¹⁷Mi-mige ’nteumena ne Hera ne pechu (kela) peigaibeibe luigumbe gene peize bam lau, Hera ne pechu kûgaibeibe gezeu. Aize herakiangna leine ge a gu I tâtewbe sie de lei.

¹⁸Mige hangkat â pechu kûgaibe ting ge pechu rumgetan gai raî ’ndi mei? Pechu rumkagetanbe ’nchetkaibe jâm tew’ngga ra peize peu se lau. Mige hangkat â pechu kûgaibe ting ge rumgetanmakbe luî mei? Pechu rumkagetanbe peize peu se lau.

¹⁹Hera gu samde ramme teibe zene betâudi zangno rumkagetanbe benai rumgetanmakbe ne mâ de sua me lei.

²⁰Mi-mige pechu kûgaibeibe ting ge pa bambe tak luî gene bam bam ra lei.

²¹Ningchu kûgaibe ting ge nang kebang chang ze bam mei? Mâ de ’nninghereu se lau. Kane nang lungzeune tew ra pedâuyibe ngau dizai â, chize nang tew zu lau.

²²Mi-mige du kebang chang ze bambe gene Tingwang gene kûgaibeibe kau â, Tingwang gu lungzeunetewbe ziemmena zat chang de lei. Chigum ze mige lungzeunetew ze bambe luagene kûgaibeibe kau â, Krista gu kebang chang de lei.

²³Pemî ne ningnui je â lui lu de lei; ziemmename gu kebangme chang gai se lau.

²⁴Chidaze a puiname gau, mi je kûgaibe ting ge bambe tak luigumbe gene Hera dage peize bam bam lau.

²⁵Chunage kelaktewmakme deu hangge Tingwang gu samde a dage ga lei, kane ’nnum’mmileduibe kau Tingwang dagene ka’nggiabe ngaulube kau gumbe gene I ka’nningbe tak ranglia lei.

²⁶Mi duânggabe kahereube wang ra nadibe ziegene peize pa bambe luî bam-bamrabe ze pe hang yi ra I ’nnum gai lei.

²⁷Nang ning nâu la mei? Temichai bam de ra peu se lau. Nang ning nâu ga ze temichai bam mei? Kelaktew ra peu se lau.

²⁸Kane nang kelaktew dizai â nang hemui me lei, zai heleu’mpui ne pa mei dizai â pa hemui me lei. Acheuleusedu kelaktewme â kedeirei herêu ze pung gu lei, kane I ningnui je peize hereu mak ze bam ra lunei lei.

²⁹I ne rangbe tak ze â a puiname gau; diegai’ndibe ting wang’nna mui de lei; chuna gene seuze pe nâu bamme je peize pe nâu game gum ze bam zu lau,

³⁰zai kehapme je peize hapmakme gum ze bam zu lau, zai penui suiyi’nta ze bamme je peize penui suisia gum ze bam zu lau, zai mâ-mâ keluime je peize penui dage kerua mâ de game gum ze bam zu lau,

³¹zai kedeirei gu merua teime je peize mâ de teimakme gum ze bam zu lau. Aipau kedeirei chuna kebambe luilungtak ze gazi gu de lei.

³²Ningnui lunghereu makse bam ra I lunei lei. Kelaktewmakpeu â Heguangpeu suigut ’ndaigum tew ra mei be hangge Heguangpeu gu tâ ramme ge ’nninghereu ze bam lei;

³³kane kelaktewlube kau â, pe nâu suigut tewrabe tak hang ’nning ze kedeirei tâudeu ramme ge ’nninghereu ze bam lei.

³⁴Zai pa mâ-mâ ka’nchâbe ze â pe lungsui kena bam ra chang di de lei. Zai meimakpui mei nune heleu’mpui mei â pe pum benai pe lungsui ge ’nchi ze bam ra ’nning ze Tingwang tâudeu hangge ’nninghereu kam lak ze bam lei; kane meidipui â pe napeu suigut tewchi ra ’nning ze kedeirei tâudeu hangge ’nninghereu kam lak ze bam lei.

³⁵Aize ningnui hang yirabe hang I sa lei, ningnui je hede kainam gai ra hangge mak ze, kane ningnui luilung bambe tak peluiyi ze Heguangpeu guâ ka’ngguabe ge ningnui peipatchi le ra hanggeneu.

³⁶Chi pa ne pe nâu hang rangpui dage lêulak luisui ze, bamchimakbe hangge mi-mige hangkat ne ’nning gai dizai â, zai ’mpuimi lam gene kelaktew ra run de lei dizai â, peize ’mpeumi ne pe gu ’nningtak luî gene: peize penai hangna kelaktew zu lau—chize â hemui mak lei.

³⁷Kane mi-mige de pe lungge ’ntiprip ze mâ de lêulakbe ga ze pe lung pa ne reîchi ze aize pe lungge ’nning sing gai lu ze chi ’mpuimi je pe nâu hang rangchakkai’ndipui chang ze bam ra pa ne lunei dizai â, pe hang yi gu lei.

³⁸Chigum ze pe nâu hang rangchakkai’ndipui je nguakelaktewpeu ze yi de lei; zai kelaktewrabe gene gesutkai’ndipeu ze yi’nteu lei.

³⁹Pe nâu â pe napeu ring tâne â, pe napeu suî suî gene bam lei. Pe napeu ne chai dizai â pa ne nei-neime dage Tingwang gene meiwang gai dui lei.

⁴⁰Kane I ne ’nninggaibe tak â pa bambe luî bambe pe hang yi’nteu gu lei. Hera gu Herui a dage la lei be I â ’nnum’mmi lei.