Read Zeme Naga 1 KORINTHME 8 Bible Online

1 KORINTHME 8 - Zeme Naga bible

1 KORINTHME 8

¹Chunage heraluîtewbe ramme je hetak peipatbe deu ge anui chî lei, “Anui ’nteumena dage mâ-gechîbe lakam lei,” be zeu. Gechîbe zene hegiê ra tew gai lei, kane kehungbe zene tei’nsap kai lei.

²Mi-mige ne pa mâge â chî lei ze ’nnum gai dizai â, pa chî ra yibe ze chî mak kerei de lei.

³Mige ne Hera je hung dizai â Hera zene pechu chî di de lei.

⁴Chidaze heraluîtewbe je peipatkaibe hetak teurabe deu ge, “heraluîtewbe â pe runne ne patbe ga lei,” zai “Hera â kat runne lei kêdabe ga lei,” kacheube anui chî lei.

⁵Tinggîm ge mei, nu kedei ge mei ge, hera kacheube ramme—“hera ramme” kacheube benai “Heguang ramme” kacheube misongga bam lêuzaidu—

⁶anui hang â mâgetaleine pe dagene patpeu zai pe hangge anui ringpeu, Bepeu, Hera kat la lei, zai anui hang â pe dagene mâgetaleine bambepeu zai pe dagene anui ring ze bambepeu, Isua Krista, Heguang hangkat la lei.

⁷Acheuleusedu haimena ne aipau machi tak ze bam mak lei. Kane hanggesame â chuna riâ chang ze heraluîtewbe je kakellumbe zene penui hangge besie hang gum chang di ze heraluîtewbe hang peipatkaibe singbe hetak ze teu ze bam lei; zai penui lungge keyi-kesia chibe tak peran-gakeu di ze penui runne penui je tewhebâ bam di de lei.

⁸Hetak zene Hera dage anui je ngua’mmi gai ra mak lei. Teumakbe ne mâ de anui hangge siasua ra mak lei, zai anui teube ne mâ de anui hangge yisua ra mak lei.

⁹’Ntîngchirabe runne lei, makchai â ningnui hangge tew dui kam bambe zene heran-game hangge tewkaudairabe du chang gu lei.

¹⁰Heraluîtewbe gu kellumki ge nang, mâ-sie gechîbe kau ne mâ-teube ge mige ne ngaudau dizai â zai chige pa ne mâ-chîtui’nruichi mak tizai â, heraluîtewbe hangge peipatkaibe hetak teu ra hangge pechu pe lung tew’ndigaibe chize ne chang mak ra semei?

¹¹Zai chigum dadege ning dage mâ-siechibe bambe zene ai pe ran-gapeu, Krista ne pe hang chaigaibeipeu je tew’nsiagai’ndibe chang lei.

¹²Chigum ze ai ningnui puiname penui ran-gabe luage, penui hangge mâ-tewmau gai ze penui dage mâ-chîtui’nruichibe bambe tewhejam gai ze Krista peireige hemui tâ tewgaibe chang de lei.

¹³Chipauziegene hetak zene a puina’mpeu je tewkaurabe pîbang chang dizai â mâtew-tewsede hemei I teusiak tu ra mak lei, makchai â a puina’mpeu je I tewkâube chang gu de lei.