Read Zeme Naga 1 KORINTHME 9 Bible Online

1 KORINTHME 9 - Zeme Naga bible

1 KORINTHME 9

¹I lungzeune kau mak semei? I apostol hangkat mak semei? Anui Wangpeu Isua je I ngau mak semei? Ningnui ze I ne Heguangpeu gene tâtewgaibe rachî ngaube mak semei?

²Miramme hangge I apostol’mpeu chang mak leusedu ningnui hangge â I apostol’mpeu chang lei; Heguangpeu gene ningnui zene I apostol changbe teiliabe chang daseu.

³Achu kakedakme dage aize ne a hangge dangnambe chang de lei.

⁴Anui keteu-kesak ngaurabe hangge anui ’nzei ga semei?

⁵Mi kinapui ne mi nâu gum chang ze anui je nguatebeîtewtat ra anui ’nzei ga semei; apostolme kêdame ramme benai Heguangpeu kiname zai Kephabe gum zeu?

⁶Nune mi runne mi je kei ze tâtew-teurabe ze Barnabasbe anai runne semei?

⁷Châu pe runne pechu kei ze sipai tâ tew lau? Chauge perachî raiteu makse grepchî merie tew lau? Châuge tungdui gêsa tuiteu mak ze kauruidung ka’ngkut lau?

⁸Aipau ze I ziemmena gu rezie gene sa semei? Hingde ne aipau luirun ze rang mak semei?

⁹Mosabe gu hingde ge, “Getumsei chêuneibe luage nang pe mui dum se lau,” ze acheu rawgaibe zeu. Aize Hera ne getumsei ramme hangge ’nningkatinggeube kau semei?

¹⁰Anui hang ziegene pa rangkamgaibe kau mak semei? Helupubepeu benai mekum kakegitpeu â chêu ge hedam ngau ra heguî ze tâtew ra chang dadege aize anui hang ziegene raw gai de lei.

¹¹Anui ne ningnui ruage herui lam gu mâ-mâ-yibe ramme linggaibeibe anui ne ningnui gu merua giepatbe ramme (lu ra) hangge kie’ngkie’nteu ’nde ra mei?

¹²Aize kie ra pa’nzei bamdibe ge miramme ngau dizai â, anui â chi sua ngau’ngkie’nteu mak ra mei? Acheusedu anui â mi ’nzei sasua me lei, kane maknedu Krista gu gospel ’mpuî ge mâ-tewnamrabe patmakrabe hanggene hereulie ze bam de lei.

¹³Kellumki gu tâ ka’nchibe ge tâtew ra kaibeime â kellumki gene hetak hang ngau lei, zai herâtewbe-kaira ge tâka’ngguame â herâtewbe ge kela peipatbe ramme nguatimziteu ze bam lei be ningnui â chî mak mei?

¹⁴Chigum ze gospel pauruame â gospel gene penui teu ze ringrabe hang ngau ra lei ze Heguangpeu ne samdie gai lei.

¹⁵Kane I â I ngau ra pa’nzei bambe ramme mâ de sasua mak lei, zai aigumbe ngaurabe hangge I sam du raw gai me lei, mi-mige ne I kedikuâ-kuarabe sambâm gene achu tewhelêu gai bei ze bam ra sua â, chaiderabe a hang yi di daseu.

¹⁶I ne gospel paurua ze bam dizai â, chize ne a hangge kedikuâ-kuarabe sambâm hang â ga di daseu. Tâput ka’nnangbe pung ra hangge achu tua gai bei de lei. I ne gospel paurua mak tizai â, a hangge kehingbe chang gu de lei!

¹⁷I ne aipau tâ ze a suî’nning ne tew dizai â a dage hetoahi la de lei; kane a suî’nning ne mak tizai â, I â tâtew ra rezie pei gai ze langgaibeibe kau chang de lei.

¹⁸Acheuzaine a gu getoabehi ’ndaikau lau? Ai nanne de lei: I gospel gene mâ-mâ-ngaurabe I a ’nzei pelane sa mak ze, I samyibe pauruabe ge peri lu mak ze ’ntane gospel peigailerabe zeu.

¹⁹I ne mi-mi gu kebang chang ze bam mak leusedu a runne achu haimena gu kebang hangge chui gai de lei, dezai bepeirei misongga ze I duîwang le ra hangge zeu.

²⁰Judame je duîwang le ra hanggene Judame dage Juda’mpeu gum chang ze I bam lei; I ze hingde kangge bambe kau mak sedu hingde kangge bamme ruage â hingde kangge bambe kau gum chang ze I bam lei, dezai hingde kangge bamme je duîwang le ra hanggeneu.

²¹Hingde gene hela ’mbe bamme dage hingde gene hela ’mbe bambe kau gum chang ze I bam lei—Hera lam hangge hingde teimakbe kau chang mak ze kane Krista gu hingde kangge bam zeu—dezai hingde gene hela ’mbe bamme je I duîwang le ra hanggeneu.

²²Heran-game dage I heran-gabe kau chang ze bam lei, dezai heran-game je I duîwang le ra hanggeneu. Ziemmena leine dage mâ-leine gu chang ze I bam lei; dezai mâ-mâ ’mpuî gene penui je I tew’nringpat le ra hangge zeu.

²³Gospel hang ziegene I aize tew kam gai lei, dezai chige ’nnamgaibe ramme ze I du ngau le ra hangge zeu.

²⁴Terika’nzube ge gepakme leine ne pakkahelit lei, kane hangkat runne ne keduîbehi â lu lei be ningnui chî mak mei? Chidaze chize ningnui lu le ra hangge pakhelit lau.

²⁵Kahelitbe ge gutrame leine ne mâ-leine ge penui runne penui dage mâ mâ rei ze gesut ze bam lei. Siadaiduibe mâpâ-riagua hanggene penui chize tew lei, kane anui â siadailakbe hanggene tew lei.

²⁶Eu lei, I â a heka ga ze pak me lei, hangkat ne tingkai (perua) ge zum gum ze â I â zûm me lei;

²⁷kane I â a pum heria ne tewsâ ze tew’nnuakeu ze bam lei, makchai â, miramme dage I samyibe pauruagailube chângge buimakbe chang gai gu daseu.