Read Zeme Naga 2 KORINTHME 10 Bible Online

2 KORINTHME 10 - Zeme Naga bible

2 KORINTHME 10

¹I Paulbe, Krista gu gecheiluilungpungbe benai karenuabe ne ningnui je I kiam lei—ningnui ruage heju ne heju daube ge yichai ze bam, kane ningnui dagene deu di dege â ningnui hangge kuugiereu ze bambepeu lei!—

²I ningnui ruage bam dezai miramme ne anui je kedeirei luilungtak gene anui tâtewbe hangge ’nning’nsiagaime peireige penui ne lîmpie ze bam gum ze I bamrabe hang ningnui ne ’nning gai mak ra ningnui je I kiam lei.

³Anui â kedeirei ge ring leusedu anui â kedeirei gu hereitew me lei,

⁴anui gu hereikerua ramme â, kedeirei gu kerua ramme mak daseu, kane anui dage â keriengdi ramme tew’ngga’nderabe Hera gu rezie tâtewchibe bam lei.

⁵Samgetube ramme benai kedijaîtewbe zat leine, chi Hera je chî ra tewnambe zat ramme anui ne tew’ngga ze mâ-mâ-ka’nningbe tak leine ze Krista kuâpheurabe gu kebang kangge chui gai bei de lei,

⁶ningnui gu hekuâpheube tâ ze tew’nsang gai dezai hekuâpheumakme leine je â tewsâ gai ra kuâ lu zeu.

⁷Ningnui suage mâ-bambe ze pie gai ni lau. Mige ne pa â Krista gu run lei be chî sing dizai â, peize pe runne pechu pa â Krista gu lei be ze rang’ngkia bam lau, chigum ze anui â bam ra lei.

⁸Ningnui je tewkaurabe hang makse teichurabe hangge Hera ne anui dage rezie peigaibe peireige I ne kedikuâ-kua’mpia gai bei sedu achu tew’ngngam gai ra mak lei.

⁹A samkela rawgaibe ramme zene ningnui je tewkeheigaibe chang ra hang â I ne nei me lei.

¹⁰Penui ne sa ze, “Pe gu samkela ramme â chuk-desang zai teu-desang lei, kane pa bambe luage â mâgum du mak, zai mâ-hangge du chak kai ra ga lei,” ze kacheu dadegeu.

¹¹Gabe luage samkela leisi ramme gene anui sabe ze bambe ge sa lei be ze peize aigumbe kau ziemmena ramme ne chî’mmi ze bam lau.

¹²Anui â pebau ’nzipâng gai ra ngauraube tew mak ze pebau ’nzipânggaibe mak, zai ziemmena hanggesame ne penui runne penui je toa ze bamme dage anui runne anui je teikedagaibe du mak lei. Kane penui runne penui je ’ndeukeda gai zai miramme benai penui je piekeda gai dege penui â mâ de gechîbe ga lei.

¹³Kane anui â kedikuâ-kua’nzû ra mak lei, kane anui hang Hera ne periâ diegai’ndibe lungge anui â bam gu lei, ningnui bambe riâ ge bamchang ra hangge zeu.

¹⁴Ningnui riâ ge anui bamchang mak sede anui ne bam’nzû mak daseu; ningnui riâ gechangbe ze anui ne gospel tei ze wangchangraime bau de lei.

¹⁵Ziemmena kêdame ramme gu tatew ge anui ne kedikuâ-kua’nzugai me lei; kane anui ne kaheguîbe â ningnui keneibe pungbi-bi bambe luigum ze ningnui dage anui gu tâtewbe bâm ze maîlang kengeîpat-kairabe ze lei,

¹⁶chidezai ningnui bambe bâm tat’ntua ze kêdabe heram ramme ge gospel sam anui paurua le ra hangge zeu, miramme bâm ge tâtewgai’ndibe peireige mâ de kedikuâ-kua mak zeu.

¹⁷“Kedikuâ-kuabe kau ze peize Heguangpeu dage kedikuâ-kua lau,” acheu ze rawgai’ndibe gum zeu.

¹⁸Ziemmena pe runne ne pe rasam saka’mmibe kau ze kebuibe hang lugaibeipeu mak lei, kane Heguangpeu ne pe rasam saka’mmipeu ze lei.