Read Zeme Naga 2 KORINTHME 11 Bible Online

2 KORINTHME 11 - Zeme Naga bible

2 KORINTHME 11

¹Kecheîne miegaibe ge ningnui ne achu lie gai ra I lunei lei. Achu liegaihâ lau!

²Hera gu ka’nchibe lam gene I ne ningnui je ngauteu lei. ’Mpuimi pumsanggeî pungmeirapui je pe napeu-rabepeu dage peipat gum ze ningnui je peipat kai ra I ne ningnui je Krista hangge rangchak kai ’ndi dadegeu.

³Kane henêu ne pe gu ningchingtak kesiabe ne Ebile je duai bei gum ze, ningnui je du Krista hangge peling benai keneibe lung gechukbe bambe gene ningnui lung ka’nning ramme ze ngualietat te ra I hing lei.

⁴Mi-mige ne wang ze anui ne paugaimakbe kêdabe Isua rasam pau gai mei, makchai chi ningnui ngaulube gene gechâmbe herui ningnui ngau mei, makchai ningnui lugai’ndibe gene gechâmbe gospel ningnui lu gai ’ndi mei dizai â ningnui liechi ze bam ra de lei.

⁵Apostolme dilangme dage I ne chei ze nalangbe chang mak ra I ’nning gai lei.

⁶I samzeu chibe kau mak lêuzaidu gechîbe lam ge â I acheu suadu me lei; aize mâ-leine ge ningnui je anui salia’mmi gai bam de lei.

⁷Ningnui dage Hera gu gospel mi hî hang lu mak ze paube ziegene, ningnui je teichu’ngngurabe hangge runne achu tew’ncheigaibe ge I hemuigaibe la mei?

⁸Ningnui guâ ’ngguarabe hangge herakiangna ramme dagene mâ-mâ-ka’ngngâbe I lube zene penui dage I sutteube chang lei.

⁹Ningnui dage I bam ze I daulakbe luage, I â mî je de heputtewrit kai mak lei, I ka’nnangbe ramme hangge â mi puiname, Makedonia ’mbene wangme ne pei kam bei dadegeu. Chigum ze mâ-mâ ge I â (miramme je heputtewrit kai mak ze) gesut ze lie ze bam de lei, zai chigum ze gesut ze lie ze bam gu lei.

¹⁰A dage Krista gu samsang bambe luigum ze, Akaiaram huâzie ge ai I kedikuâ-kuabe ze sauzîng gai ra mak lei.

¹¹Aize ’ndaitew bei ne lau? Ningnui je I hungmakbe ziegene mei? Ningnui je I hung lei be Hera ne chî lei!

¹²Zai penui ne kedikuâ-kua ze tâtewbe ge chi anui tew gum ze penui du tew lei ze acheu ze sagaineime sam ze tewhelêu gai ra hangge I ne tewbe tâ ze I â tew bam gu lei.

¹³Aigumbe kau ramme ze â, apostol karasa kau ramme, tâtewme choachibe kau ramme, Krista gu apostolme helî hang penui runne penui luî tewchâm ze bambe kau ramme de lei.

¹⁴Zai aige ze ’nningdaulak ra mâ de ga lei, Satan ’nsangdu kebabe gu angel’mpeu helî hang pe runne ne pechu tewchâm ze bam daseu.

¹⁵Chigum ze pe gu (satan gu) tâka’ngguame ne katelingme tâka’ngguame helî hang penui runne penui luî tewchâm ze bam lêuzaidu chize ’nningdaulakrabe gechâmbe mâ de ga di de lei.

¹⁶I ne sachu dai ze, peize mi-mige de achu kemiebe kau hang ’nning gai se lau; kane ningnui ne achu chigum ’nning gai lêuzaidu, achu kemiebe kau je gum ze ’nchâ gai lau, chidezai I du kecheînege kedikuâ-kua gai le ra hangge zeu.

¹⁷(I sabe ze Heguangpeu gu rezie gene sabe mak lei, kane kemiebe kau gum ze kedikuâ-kua ze I sa lei;

¹⁸misonggame ne kedeirei gu mâ-mâ ge kedikuâ-kua daze I du kedikuâ-kua gu lei.)

¹⁹Ningnui ne ningching lu ze ningnui lungyibe ne kemieme kuâ lie gai bei de lei!

²⁰Mige ne ningnui je kebang ge chui gai lêuzaidu, zai penui hang yi ra ningnui peirei gene tâtew lêuzaidu, zai ningnui je sariau bam ra tew gai lêuzaidu, zai ningnui ju ge gepei gai lêuzaidu ningnui â lie bam daseu.

²¹Achu tew’ngngam gai ra I sa gai ra de lei, chipau tâ hangge anui â mi ran-ga’mpia di de lei! Kane mi-mige ne mâkedabe ge kedikuâ-kuapat ze pe suî’nzûm dizai â, —kemiebe kau gum I sa ze—chige I du kedikuâ-kuapat ra a suî’nzûm lei.

²²Penui Hebraime mei? I du chigum de lei. Penui Israelme mei? I du chigum de lei. Penui Abrahambe chaname mei? I du chigum de lei.

²³Penui Krista guâ ka’ngguame bau mei? I ne penui suadu ’ngguachika’nteupeu lei—I ne kemiebe kau gum sam sa ze—penui suadu tâtew’nrî, penui je suadu achu bang gai ’ngkie, lakbe riak du seichi ta di chaitena gai ze I bambe kau lei.

²⁴Judame (ba ge) ne luakat lakbe ge hetui himreu ze sekui lakbe ze, chize achu lua mengeu lak kai lei.

²⁵Hegeîtui ne achu luachum lak kai lei; lua kat â achu tingchu ne tuâ gai lei. Sungkling ge ’nnei gene achu luachum tewkeleu gai lei; sungkling ge muî kat mai kat achu hedui ne tei’ntî gai lei;

²⁶tebeîtewtat bambe ge ’nggeuki ramme gene kehingbe ge, sut-teume ramme dagene kehingbe ge, a zat singme dagene kehingbe ge, Jentailme dagene kehingbe ge, namdi ge kehingbe ge, hênamkang ge kehingbe ge, sungkling ge kehingbe ge, mi puiname ’nchuimakme dagene kehingbe ge,

²⁷tâtewkahereube ge, tingmuî ’ndaikie ge mei ze jei tadibe ge, ’njei-kahereibe ge, teseuka’ngkîmbe ge, kahegeikûngruabe ge, aigum ze I bam de lei.

²⁸Zai kêdabe mâ-mâ ramme sâu ze nai’nsangne ge herakiangname yirabe hang ’nningkatenangbe a peireige tua gai bei ze bam lei.

²⁹Châu peran-ga lau? I a ran-ga ze bam mak mei? Châu je tewkau gai lau, zai I a lungteu mak mei?

³⁰I kedikuâ-kua sing ra dizai â, mâ-mâ ramme chi a ran-gabe teiliabe ge I kedikuâ-kua gu lei.

³¹Heguang Isua zai Bepeu Hera, pechu betingbeta toa ze bambepeu ne I karasa sa mak lei be ze chî lei.

³²Damaska ge Heguang Aretasbe kangge laksaibe changpeu ne, Damaska namdi ze hekêt-kai ze bam lei, achu nîm le ra hanggeneu,

³³kane achu mâ-rak lungge kai lu, ’mbie ge kemuiki poine bambe gene (hela ’mbe) ’mpat kai bei ze pe ba gene ’nreipat lu de lei.