Read Zeme Naga 2 KORINTHME 12 Bible Online

2 KORINTHME 12 - Zeme Naga bible

2 KORINTHME 12

¹I kedikuâ-kua sing gu de lei; aigene kegiebe ngau ra mâ de ga lei, kane mâ-teiliabe benai Heguangpeu gu keliâbe ramme lam ge I â tat tu lei.

²Krista gene ziemmena hangkat, kum kereu ze medai tattibe ge, chi tinggîm pakechumbe ge teichugaibeipeu je I â chi lei—chize hepum sing gene mei nu hepum sing gene mak mei be â, I chî me lei, Hera chî la lei.

³Zai chipaupeu je â paradais ge teichuchang gai bei de lei be I chî lei—pe pum sing gene mei nu pe pum sing gene makse mâ-teiliabe gene mei be â I chî me lei, Hera chî la lei—

⁴rang ra du rangchilakbe zat ramme pa seu de lei, chi ziemmena ne sapatmakrabe zeu.

⁵Aipaupeu kelei ge I kedikuâ-kua gu lei, kane a runne a deu hangge I kedikuâ-kua ra mak lei, a ran-gabe ramme ge zangnêu.

⁶Chize I ne kedikuâ-kua lêuzaidu kemiebe kau I chang ra mak lei, I â samsang sa gu daseu. Kane chize I gesut ’ndu lei, chidezai mi ne de a dage pa ngaube benai a dagene pa seube peireige achu ’nning’ndi me ra hangge zeu.

⁷Mâ-keliâbe misongga ngau lu a suiyi melâksak bambe tew’nsau ra achu hemeipum ge hetu (duakrabe) satan gu sampaupeu je pei gai bei de lei, achu tewhereu gai ra, a suiyi-melâksakbambe gene tew’nsau gai ra hangge zeu.

⁸Aipau deu ge Heguangpeu je luachum I kiâm gai de lei, chize a dagene lutua gai ra hangge zeu,

⁹kane pa ne achu, “I ka’nggiabe ze nang ka’nnangbe hangge kie/bui de lei, heran-gabe ge I tâtewchibe ze tew’nsang gai bei daseu,” kacheu de lei. Krista gu tâtewchibe rezie ze a peireige bam ra I ne a ran-gabe peireige a suiyi ze kedikuâ-kua’nteu ze bam gu lei.

¹⁰Chidadege Krista hang ziegene heran-gabe ramme ge, saka’nnabe ramme ge, kahereube ramme ge, tewsabe ramme ge, zai pausiabe ramme ge, I a lungwângchang ze bam lei. I â a ran ga dege a ranchi dadegeu.

¹¹I â kemiebe kau chang ze bam de lei! Ningnui ne achu toagairabe ze ningnui ne aige achu chui gai bei de lei. I mâ-luîmakbe kau chang leusede aime apostol dilangme dage cheilangbe kau hangge â chang mak daseu.

¹²(I) Apostol gesang changbe tak ze chî ra teiliabe hangge dak teiliabe ramme, ’nningdaulakbe ramme tewliabe ramme, zai tâ-kedibe tewbe ramme gene kahereube leine lie ze ningnui ruage tew kam gai bei de lei.

¹³Hera kiangna kêdabe ramme je sua â ningnui je ’nning’ncheigaibe la mei, I sing ne ningnui peireige keritbe tuagaimakbe runne mak semei? Aipau tâtewmaube ze achu lun gai lau!

¹⁴Aige lua pakechumbe hangge ningnui dage zuamie ra I kedâ lu la lei. Zai I ne heputtewritbe chang ra mak lei, ningnui gu mâ-mâ ramme je I peu mak ze kane ningnui sing je peu daseu; hename ne penui pui-peu hangge mâ-kaigekuarabe mak lei, kane penui pui-peu ne penui name hangge kaigekua ra zangnêu.

¹⁵Ningnui gu keringbe hangge I ne a suiyi-kadesangbe ne peipat ku lei, zai peipat kai bam bu lei. I ne ningnui je maîkie hung gai bei sedu achu â kecheîne runne hung gai be ra mei?

¹⁶Kane I zene ningnui hangge heput tewritbe mak lei be chikâ lu ze, ningnui ne I ze a ningchingsiapeu lei, zai ningnui peireige hejaîsit tew gai lei ze kacheu de lei.

¹⁷Ningnui dage I langgaibeime mi-mige dagene ningnui je I ne duai ze tâtew mei?

¹⁸Ningnui dage Titabe tat ra, zai chi mi puina’mpeu ne pe pamtew tat ra I ne Titabe je kiâm gai de lei. Titabe ne ningnui je duai ze tâtew mei? Anui ze lungkat-suikat ne tâtew mak mei? ’Mpui kat ge anui tat mak mei?

¹⁹Aitie ge anui runne anui je ningnui suage sagu bam de lei be ningnui â ’nning gai bam mei? A puina kehungme nung gau, Hera mikngau gene Krista ge anui sam sa bam lei, zai chize â ningnui je tei’nsaprabe hanggene kam de lei.

²⁰I wang dezai I ne kaheguîbe ze ningnui dage dau mak leu gu mei, zai ningnui ne kaheguîbe ze a dage ningnui ne dau mak leu gu mei be hangge I hing lei; samgetube, ngauteube, helumpumbe, mi gu siabe, saka’nsiabe, mâ-mâ-katelumbe, mi je ’nningka’ndibe zai mâ-mâ tewkakeleube ramme ze pat du pat-rau me daseu.

²¹I wang dai dezai, ningnui masua gene Hera ne achu tewhelêugairabe benai penui suage misonggame ne mâ-chî’nchimakbe, lungkaheruâbe, zai bamdaulakbe luilungtak kesiabe tâ ramme tingtie ge penui tew gai lu helimakme peireige I hapkairabe (daurabe) deze I hing lei.