Read Zeme Naga 2 KORINTHME 13 Bible Online

2 KORINTHME 13 - Zeme Naga bible

2 KORINTHME 13

¹Mâ-mâ siabe hang chaugaibe leine ge hangna mei hangchum mei ne chigaihâbe gene peling hang lu gai sing ra lei.

²I ningnui dage lua pakenabe ’ngkiâmiebe ge I bambe sing gene I ne ningnui je kia gum ze chuna I gabe luage tingtie ge hemui tâ tewgai’ndime benai kêdame ’nteumena je I ne kia de lei, I ne wang dai dizai â I ne penui je ’nsak kai ra mak lei—

³Krista ne I ge ’nguasamsa bam mei be ningnui ne chî’nchichiakbe lunei daseu. Ningnui peireige nguatatew ze pa â heran-ga ze bam me lei, kane pa â ningnui ge reziechi-desang ze (tâtew) la lei.

⁴Pe ran-gabe gezene pechu â heling ge gia gai de lei, kane Hera gu tâtewchibe zene pa bam la daseu. Pa gene anui (du) heran-ga de lei, kane ningnui peireige tâtewbe ge Hera tâtewchibe gene pe dage (Isua) anui ngualung gu lei.

⁵Ningnui runne ze nei’ntiprip la mei be pie’mmi le lau. Ningnui runne ningnui je kedak le lau. Isua Krista ningnui dage bam la lei be ningnui â ’nningdau mak mei?—ningnui kedak kai ze kâu di lei makchai neu.

⁶Anui â kâu me lei be ningnui ne ngaupat ra I ’nnum gai lei.

⁷Kane ningnui mau gai mak ra hangge Hera dage anui kie lei—kakedakbe ze anui ne kam lu de lei be liâgairabe makse kane anui duîlakbe chang leusede mâ-ka’nzeibe ze ningnui tew le ra hangge zeu.

⁸Samsang peireige anui ne mâ de tewchi lak lei, kane samsang hang runne anui tewrabe zangnêu.

⁹Anui ne heran-ga zai ningnui ne heranchi ze bambe luage anui ne hesuiyi ze bam daseu. Anui ne gekiebe ze â ningnui yibi-bi ra hanggene de lei.

¹⁰I wang dezai chi ningnui je tewkau gai mak ze teichugairabe hangge Hera ne achu peibe rezietei ze tâtewbe ge I a laîpatkaimakrabe hanggene I ningnui dagene deu ze bambe luage I ne aize raw gai de lei.

¹¹Nâlangbe ge a puiname gau, yi bam lau. Ningnui kebambe tak ze teleu’mmi dai lau, I kiambe sam ze ’ngking’mmi lau, kat-kat dage muikattewchi ze bam lau, desieyi ze bam lau, zai kehungbe benai desieyibe Hera ne ningnui dage bam gu lei.

¹²Kakeputbe ka’nchibe ne kat-kat je kellum lau.

¹³Ziemmena ka’nchime leine ne ningnui je kellum de lei.

¹⁴Heguang Isua Krista ka’nggiabe, Hera kehungbe benai Herui Ka’nchibe puina nguakaheruabe ze ningnui ’nteumena dage peize bam lau.