Read Zeme Naga 2 KORINTHME 2 Bible Online

2 KORINTHME 2 - Zeme Naga bible

2 KORINTHME 2

¹Ningnui dage I zuamie dai ze ningnui lungsuisit tewpat kai mak ra hangge I a lungge ’nning gai ’nde lei.

²I ne ningnui lungsuisit tewpat kai ’ndizai â châu ne a suî tew’mmi gai dai ra lau, kane I ne hesuisit tewpatkaibeime ne ra dezang neu?

³Zai a lung tak luigum ze I raw gai de lei, chidezai I wang dezai, a lungsui tew’ntagairame ne a suisit tewpat kai mak ra hangge zeu; I a suiyibe ze ningnui suiyibe chang ra I â ’nningtâu sing gai daseu.

⁴Misongga helung kahereube zai mi duânggabe zai hemikdui luabe gene ningnui dage I sam raw gai de lei, chize ningnui lungsuisit tewpatkairabe hanggene makse, kane ningnui je ’ndaizeuge I hung-kadesang mei be peize ningnui chî le ra hanggene raw gai de lei.

⁵Mige ne hesuisit tewpat kai ’ndizai â chize a hangge tewpat kai makse, kane ningnui je hesuisit teu-desang bam ra tewgaimakrabe riâ hanggene chize ningnui hangge hesuisit tewgaibe chang lei.

⁶Chigumbe kau hang â, ningnui pebau gekieme ne pechu tewsâgai’ndibe ze bui de lei;

⁷chidaze ningnui ne ’nreiwang ze pechu lun gai ze tum gai ra yi lei, makchai â pa pe suisia’nteu nan ze bam gu lei.

⁸Chidaze pe peireige ningnui kehungbe bambe ningnui ne tew’ntipkaisuâ ze bam ra ningnui je I kiâm de lei.

⁹Aipau deu hanggene I sam raw gai de lei, chi mâgetaleine ge ningnui hekuâpheu mei, pheu mak mei be ningnui je kedak kai ze chî ra hanggeneu.

¹⁰Ningnui ne lun-gaibe kau je I ne lun de lei. I ne mâge â lun gai ’ndizai â, I ne lun-gai’ndibe ze ningnui hang ziegene Krista mikngau gene chize tewgaibe chang de lei.

¹¹Satan ne anui je ’nrakteirabe gene namlerabe hanggeneu; pa ka’nningbe tak ze chîmeluisui kau mak daseu.

¹²I Troas ge Krista gu gospel pau gai ra wang dege chige Heguangpeu gene a hangge ’ngkam lat kai bei de lei;

¹³kane chige a puina’mpeu Titabe je I ngaudaumakbe ziegene a lung temi mak bam de lei. Chigum ze chige penui je I rimna gai lu Makedonia ’mbe tat ti de lei.

¹⁴Kane Krista gene pehî’nsangne ge anui je keduîbe ge nguaduîtatbampeu, anui gezene pebâm’nsangne ge pechu gechibe gu mâ-perîmyibe ’nrukruapeu, Hera dage peize hesuiyibe sam pau lau.

¹⁵Anui â tew’nringpatkaibeime ruage benai gaderame ruage Hera hangge Krista gu mâ-perîmyibe chang lei,

¹⁶bâu kat hangge â chize kechaibe rîm hang changbe gene mi je tewchatkairabe rîm riâ hangge du chang, kêdabe bâm hangge â chize keringbe rîm hang changbe gene mi je tew’nringgairabe rîm riâ hang du chang zeu. Airamme châu tewbuibe kau la lau?

¹⁷Anui â misonggame gum ze â, Hera gu sam (pelâp-pegîe hangge) zuaruame mak lei; kane rezietei ze tâtew ra Hera ne sumgaibeime, mâ-pelingtewme gum ze Hera masua gene Krista gene samsame bau lei.