Read Zeme Naga 2 KORINTHME 5 Bible Online

2 KORINTHME 5 - Zeme Naga bible

2 KORINTHME 5

¹Ai kedeirei ge anui bambe hetiamki ze tew’nsia gai dizai â tinggîm ge betunmakbe, mi ba ne tewmakbeki Hera dage anui hang la lei be anui â chî lu daseu.

²Aige anui huaipun ze bam lei, zai tinggîm bâm ge anui bam gai ra kuâlak ze bam de lei.

³Chige anui bam gai lu dezai anui pumlâng bambe ze ngau ta ra hangge zeu.

⁴Aipau hetiamki ge anui bam tâne â, ’nningkahereube zene anui kehuisiak ze bam lei; anui paî gâutua gai ra hang ne makse, kane anui je tapkaisuârabe hanggeneu, chidezai chi chaiduibe deze keringbe zene ’nzuakeu kam ’nde ra hangge zeu.

⁵Aipau ze anui hang kedâgaipeu â Hera ze de lei, anui je pei ra samhatkaibe chî ra teiliarabe hanggene Herui anui je peigaipeu zeu.

⁶Chidadege pehî’nsangne ge mi lung ’ntiprip ze anui bam lei; chi heki mi pumsie ge anui bambe luage â, Heguangpeu dagene anui â deu lei,

⁷anui â kengaube gene makse, keneibe gene tat bam daseu.

⁸Mi lung ’ntiprip ze anui â bam lei, zai mi pumsie gene pat lu Heguangpeu dage heki ge bam denei de lei.

⁹Chidadege heki ge anui bam zaidu bam mak zaidu pe suî’nning tew ra anui â ka’nning lei.

¹⁰Anui haimena ne Krista samrambe bâm suage saplia kam gu daseu, chidezai mi-mige pa ne hemeipum gene tâtewgai’ndibe luigum ze keyibe zaidu kesiabe zaidu ngau dai kam gu daseu.

¹¹Chipauziegene Heguangpeu je hingrabe lei be anui chî lu ze ziemmename je anui kiâm de lei, kane anui châu gumbe kau mei be Hera ne chî lei, zai ningnui ka’nningbe gene ningnui ne du chî ra I ’nnum gai lei.

¹²Anui runne ne anui je ningnui dage satoaliabe makse, kane anui ziegene ningnui ’nrîmyi ze bamlerabe hangge anui rasam salia lei, chidezai ziemmena je pe lungtak gene makse, hela ge kengaube gene penui ’nrîm lu ze bambe sam ningnui ne kakchi le ra hanggeneu.

¹³Anui runne mietat tizaine â, chize Hera hanggene lei; zai anui ’nchuichik bam dizai â chize ningnui hanggene daseu.

¹⁴Krista kehungbe zene anui je reî ze tei lei, chize mi hangkat ne ’nteumena kelei ge chai gai bei de lei be anui ne chîbeibe ziegeneu; chipau luigum haimena chai kam di de lei.

¹⁵Zai pa ne haimena hang chai gai bei de lei, dezai keringme ramme penui runne penui hang ring ta di ze kane penui hang ziegene chai gai ze kuakchugaibeipeu hangge penui ring de ra hangge zeu.

¹⁶Chidaze chuna gene seuze, anui mige je de hemeipumsie gene ’nning gai ta de lei; tingkat â Krista je du anui ne hemeipumsie lam gene ’nning gai ze bam sedu chigum ze pe peireige anui ’nning gai ta di de lei.

¹⁷Chidaze mi-mige ne Krista ge bam dizai â, pa â tewkarchibe kau chang de lei; mâ-perie ze â ga de lei, pie le lau, mâ-karchibe wangchang de lei.

¹⁸Aiberamme leine ze, chi Krista gezene anui je pe dage nguadesieyibe tewgaipeu zai nguadesieyibe-tewbe tâ ka’nchibe anui je peigaipeu, Hera dagene patbe kam de lei;

¹⁹chize â Hera ne penui gu hedieka’ngkabe tatew ramme peireige mâ-hang chak kai mak ze Krista gene pa ne kedeirei je pe dage nguadesieyibe tew gai ze chi nguadesieyibe-tewbe rasam ze anui je pei gai bei de lei.

²⁰Chigum ze anui â Krista hang desieyibe heguttewme chang de lei, Hera ne anui gezene chipau tâ ze nguatew ze bambe zeu. Krista kelei ge anui ne ningnui je kiam lei, Hera dage ningnui nguadesieyi lu bam lau.

²¹Hemui mâ de chimakpeu je anui hang ziegene pechu hemui kau hang pa ne tew gai bei de lei, chidezai pa gene anui Hera katelingbe chang le ra hangge zeu.