Read Zeme Naga 2 KORINTHME 7 Bible Online

2 KORINTHME 7 - Zeme Naga bible

2 KORINTHME 7

¹Chidaze a puina kehungme nung gau, aipau samhatlube ramme anui ngau lu daze, hemeipumsie benai herui lam ge anui je tewkahebâbe leine gene anui runne anui je tew’nchi gai ze, zai Hera je kehingbe gene anui runne anui je tew’nchichiak lu bam zu kei lei.

²Ningnui lung ze anui hangge lat kai zu lau; mi-mi je de anui â mâ-tewmau me lei, zai mî je de anui â duaigaibe ga lei, mî je de anui â choa gai me lei.

³Ningnui je tew’ngkuigairabe hang aize I sa mak lei, besua’ngka ge ningnui â anui lungge bam lei, ningnui je nguachai ra, zai nguaring ra I a sam sagaibe luigum zeu.

⁴Ningnui peireige I ’nnum’mmi-kadesangbe la lei; ningnui dage I a ’nrîmyi-desang bam de lei; a lungsui katemibe ne a dage puigit la lei; I kahereube leine ge I â a suiyi-desang la lei.

⁵Makedonia ge wangchang lu sedu, anui pum katemibe ga lei, kane mâ-mâ leine ge anui je deîhereu ze hela ge ’nggî-kahegeibe zai mi lungge kehingbe ne acheu ze bam de lei.

⁶Kane kagetadbe kang gene helungchei ze bamme je tumbepeu Hera ne anui je tumgaibe hangge Titabe ne wanggaibe,

⁷zai pa ne wanggaibe runne makse ningnui dagene pa pe lung tewtemigaibe ngaube, chi ningnui ne kaheguîbe, kadesuibe zai a hangge ran ze bambe rasam pa ne anui je saliabe chize ne du a lung tewtemigaibe hang chang gai de lei, chidezai I a suiyi’nteu ze bam le ra hangge zeu.

⁸A gu samkela zene ningnui lung tewhereu gai leusede I a lungneu me lei, I a lungneu gai ze bam sedu chipau samkela zene luakat hang runne leusede ningnui lungsui tew’nsiagaibeibe I ngaube ziegeneu.

⁹Acheu ze ningnui lung suisit tewpatkaibeibe ne mak ze kane ningnui lungheli ra hangge ningnui suisit tewpatkaibeibe ziegene I a suiyi de lei; Hera lam gene ningnui suîhereu ra chang di dadege anui ziegene â ningnui je tewhereugaibe hang â chang me lei.

¹⁰Hera lam ge mi suikahereube zene helung heliwangdairabe hangge tew gai lei, chi tewka’nringbe ge ngua gai ze helungneu mak bam ra peibe zeu, kane kedeirei lam ge mi suikahereube ne kechaibe tewpat kai lei.

¹¹Ai Hera lam ge mi suikahereube zene lungsang ningnui ge bamrabe, ningnui runne ningnui je tew’nchineirabe lung teu-desang bamrabe, rikchi bamrabe, heguî-desang bamrabe, rankai-desang bamrabe, tewsârabe je hingrabe airamme patrabe hangge tewgaibeibe ze pie gai ni lau! Airamme leine ge mâ-tewmaube bam mak ra ningnui runne ningnui hangge chî lu de lei.

¹²Chigum ze ningnui dage I sam rawgaibe ze hangkat ne mâ-tewmaube gene mak, zai tewmaugaibeipeu deu ge du mak, kane anui hangge ningnui laîkai ze bambe tak Hera mikngau ge teiliagairabe deu gene de lei.

¹³Chipauziegene anui lungsui temichai ze bam de lei. Zai anui suîtemi bambe peireige ningnui ne Titabe pe lung-kêuhui gai ra tew gai bei ze pa pe suiyibe ge anui ne mi suiyi ka’nteu de lei.

¹⁴Pe dage I ne ningnui rasam sahegiesiê gai tânege achu mâ de tew’ngngam gai me lei; (kane) ningnui dage anui mâ-mâ sagaibe leine gesang chang gum ze Titabe suage anui ne kedikuâ-kuagaibe ze gesang hang chang kam daseu.

¹⁵Pechu ningnui ne hingkedun ze ka’nchâbe benai ningnui ne hekuâpheuchibe tak ze pa ’nningdau-daube luage ningnui lam pe lung pat’nteu-teu ze bam de lei.

¹⁶Getaleine ge ningnui je I ’nnumtewduibe ziegene I a suiyika’nta de lei.