Read Zeme Naga 2 KORINTHME 8 Bible Online

2 KORINTHME 8 - Zeme Naga bible

2 KORINTHME 8

¹Mi puiname gau, Makedonia ge herakiangna ramme dage Hera ka’nggiabe teiliagai’ndibe ze ningnui chî ra anui lunei lei,

²penui tat-hangbe ge penui je â lungkahereube zat ramme ne tewsâ ze bam de lei; kane penui suigut â pui ze penui heurâ ga kelaksia-desang bam sede mâ-peipatbe lam ge penui ba di-desang ze bambe zeu.

³Penui â penui ne pei dui dui gum pei zai penui suiyibe ne penui hutmakbe riâ du peipat ze,

⁴keneime ka’nchime hang ka’ngngâbe kela peibe ge penui du ’ngngâ ze lungsangsing ne anui je kiâm ze bambe—

⁵zai aize anui ne â heguî me da, kane Hera suî’nning gene raîlangbe ge penui runne penui je Heguangpeu hangge peipat kai zai anui dage du peipat kai ze bambe tak ze I ne sakkitew-’nchichiak dui lei.

⁶Chigum ze anui ne Titabe je aipau ka’nggiabe tâ ze pa ne tewchugai’ndibe gum ze ningnui ruage pa ne du tew’nsang gai ra kiâm’mmi gai bei de lei.

⁷Chunage ningnui â mâleine ge yi’ngkeu ze keneibe ge, samsabe ge, mâ-gechîbe ge, lungsang peigaibe leine ge, zai ningnui ne achu kehungbe ’mpuî leine ge chigum bam gum ze—ai ka’nggiabe tâtewbe ge du ningnui yi’ngkeu ze bam ra chî ze bam lau.

⁸Aize samde peibe gum ze I ne sabe mak lei, kane miramme kanrîme je teikeda ze ningnui kehungbe tak ze peling de lei be teiliagairabe hanggene lei.

⁹Anui Wang Isua Krista ka’nggiabe ze ningnui â chî lei, pa keheupeu chang leusede, ningnui deu hanggene kelaksiapeu pa chang di de lei, chidezai pa kelaksiabe zene ningnui keheube bam le ra hangge zeu.

¹⁰A suî’nningtak ge â ’nzikum ge ningnui dîmchugaibe tâ ze chuna tew kam gai ra ningnui hangge yi’nteu gu lei, tâtewrabe hangge runne makse kane tâtew ra ka’nchâbe ge du ningnui ze railangme bau de lei,

¹¹Chidezai ningnui ne ’nchâ ze kuâbe ze ningnui dage kebambe gene ningnui ne chize tewpuigaibe tei’nsamrapkairabe hangge zeu.

¹²Mi lung kedâkua bam dizai â, ziemmena ne pe dage kebambe luigum ze pe gu kebuibe hang lu gai bu lei, pe dage gabe luigumbe ge mak zeu.

¹³Aize miramme put ze tew’ncha gai lu ningnui put ze tewrit kaisuârabe je I rang mak lei,

¹⁴kane ’nsamrap bam ra hangge chuna ting ge ningnui dage mâ-mâ misongga bambe ze penui ka’nnangbe hangge pei lau, chidezai ningnui ka’nnangbe hangge penui dage mâ-mâ misongga bambe ze pei ra hangge zeu, dezai ’nsamrap ze bam kam du de lei.

¹⁵“Gekumwang ka’ngkiepeu ze mâ de ’nsakpat mak lei, zai gekumwang ka’nchampeu tâulak ze bam me lei,” ze rawgai’ndibe gum zeu.

¹⁶Titabe lungge chi tinggeuchibe tak ze ningnui hang kaibeipeu Hera dage hesuiyi lau.

¹⁷Pa ne anui kiambe sam pheugaibe runne makse, kane pa â lungsang kau dadege pe runne pe suî’nning gene ningnui dage tat daseu.

¹⁸Zai pe dage anui puina’mpeu herakiangna leine ge gospel rasam pauruabe hangge pe ji satoa ze bampeu je anui ne lang’mpam gai lei;

¹⁹zai chi runne makse, kane ai anui puina’mpeu je â Heguangpeu ngeudibe hangge benai anui ne ’nggiagaineibe ze teilia gai ra ai ka’nggiabe tâ anui tewtatbambe ge anui dage nguatebeîtew bam ra herakiangname ramme ne sum gai bei de lei.

²⁰Aipau helungyibe ne mâ-peipatbe kela ge ka’ngguabe ge, mî ne de anui je peize sa’nsia mak ze bam ra anui â ’nning gai lei,

²¹Heguangpeu mikngau ge runne makse, kane ziemmename mikngau ge du betâu-pakezei pie ze tew ra anui kaheka lei.

²²Anui puina’mpeu, anui ne ’ndeu-’ndak-kai-kaipeu zai mâ-leine ge pa pe lung lungsang peibe ngaupatpeu, kane chuna â ningnui dage ’nnum’mmi-desangdibe ziegene tingtie suadu lungsang kai’nteudipeu je anui ne penai dage lang gai lei.

²³Titabe ze â ningnui guâ ka’ngguabe ge a pamtewpeu zai achu nguatatewkaheruapeu de lei; zai anui puiname kêdame hangna ze â herakiangna ramme ne langgaibeime, Krista ngêudibe hang tâtewme hangna de lei.

²⁴Chidaze ningnui ne penui je kehungbe lungtak bambe benai ningnui bambe ziegene anui ne kedikuâ-kua ze bambe tak ze chî ra herakiangname ramme suagene penui je teilia be lau.