Read Zeme Naga 2 KORINTHME 9 Bible Online

2 KORINTHME 9 - Zeme Naga bible

2 KORINTHME 9

¹Keneime ka’nchime deu hangge misuiyibe-hâ peirabe deu ge â ningnui dage I ne sam raw gai ra bepeirei mâ de ’nnang ta de lei,

²I ne Makedonia ge bamme bau dage ningnui rasam sahegiesiêgaibe, ’nzikum gene du Akaia â kedâ ze kuâ di kau de lei, ze I kacheube, chi ningnui ne kedâkua ze bambe tak ze I ne chibe ziegeneu; zai ningnui ne ’nchâ ze ningnui laîkaibe tak zene penui ziemmena misonggame je tew’ngnguplai gai bei de lei.

³Kane I ne mi puiname je ningnui dage lang gai lei, chidezai I ne aipau deu ge ningnui rasam sahegiesiêgai’ndibe ze ’ntane sagaibe chang mak ra hangge zeu, chidezai ningnui â aigum lei ze I sagai’ndibe luigum ze ningnui kedâkua ra hangge zeu;

⁴makchai â, Makedoniame ne achu nguawang’nsam ze ningnui kedâkua mak bambe ningnui je ngau dizai â anui je tew’ngngam gai gu de lei—ningnui rasam mâ de sa gai ra ga—aigum ’nnum’mmi-desang gai lu zeu.

⁵Chigum ze aime mi puiname ne a suage râitat lu ze, ai ningnui ne pei ra hatkaibe kela ze kedâ’ntua zun gai ra hangge penui je rang’mmi gai ra ’nnangrabe hangge I ne ’nning gai de lei, chidezai kiekelitbeibe ne peirabe makse kane misuiyibe kela hangge peipat ra ningnui kedâkualerabe hangge zeu.

⁶Sambâm singbe â aize de lei: chi ’nza-zâne ze ka’nrukbe kau â ’nzâ-zâne ze gat dai gu lei, zai pe ba di ze misongga ka’nrukbe kau â misongga ze gat dai gu lei.

⁷Mî de ’ngnginsinbe ne mei nune kuaklakbe ne mei ze tew mak sing ra lei, ’nchâlai ze mâ peipatbe kau je Hera ne ka’nchâ daseu.

⁸Zai Hera â mâ mâ ’nnamgaibe zat leine ningnui je misongga ze peichi dui lei, chidezai ningnui dage pehî’nsangne ge mâgetaleine ge kegeuga ze bam ra, zai tâ keyibe tewbe zat leine hangge ningnui ne misongga peipat ze bam le ra hangge zeu.

⁹“Pa ne pebâm leine ge ’nrukrua gai lei, pa ne kelaksiame je pei ze bam lei; pe gu kapelingbe ze â betingbeta bam bam lei,” acheu ze raw gai’ndibe luigum zeu.

¹⁰Helei ka’nrukpeu hangge helei peibepeu zai hetak hangge tingku (tak) peibepeu zene ningnui gu merua ka’nnangbe leine hangge peipat kai ze tewpung gai gu lei, zai ningnui gu hemeurachî ze pungbi-bi ra tew gai gu lei.

¹¹Ningnui misongga peipat’ngkie ze bam ra hangge mâ-leine ge ningnui je tei’ntua gai gu lei, chize anui dagezene Hera je toabe hang peipat’nsui gu lei;

¹²aipau tâka’ngguabe hangge keneime ka’nchime mâ-mâ-ka’nnangbe hangge dekampatbe runne makse, kane Hera je getoabe ge ’nniâmba ze bam ra peipat kai gu daseu.

¹³Aipau ka’nchibe tâka’ngguabe gene mâ-gesang chîpat lu ningnui zene Krista gu gospel peireige mâ-gechîbe bam lu hekuâpheube gene, zai penui hang benai ’nteumena hangge ningnui ’nggia di ze mâ-mâ-peipatkaibe ramme gene Hera ngeu-tew’ndi ze bam gu lei;

¹⁴ningnui dage Hera ’nggia dika’ngkeube bambe ziegene penui ne ningnui je ngau gai nei ze ningnui hangge kellum bambe luage zeu.

¹⁵Hera gu kela peibe rangdaulakbe hangge pe dage hesuiyi bam lau.