Read Zeme Naga GALATIAME 1 Bible Online

GALATIAME 1 - Zeme Naga bible

GALATIAME 1

¹Paulbe apostol’mpeu ziemmename dagene changbe mak, kane Isua Krista benai Bepeu Hera ne pechu kechaibe gene kuakchupeu dagene changbe—

²zai a dage mi puiname bamme leine dagene, Galatia herakiangname dage:

³Hera Bepeu benai anui Wang Isua Krista dagene,

⁴anui Rapeu zai Bepeu suî’nning gene anui gu hemui ziegene anui je kesiabe rehei chuna bambe gene ripat kai ra chi pe runne pechu peigaipeu dagene ka’nggiabe benai desieyibe ningnui dage peize bam lau.

⁵Pe dage pengêudibe betingbeta peize bam bam lau. Amen.

⁶Isua Krista ka’nggiabe gene ningnui je kûgaipeu je luakatne sâu nan ze, gospel gechâmbe lam’mbe ningnui ’nreitatdaidibe ze I ’nningdaulak lei—

⁷kêdabe gospel la lei kacheube mak ze, kane ningnui je tewkeleu ze Krista gu gospel tewkedetkaineime hanggesame bam lei.

⁸Kane anui lêuzaidu angel’mpeu ne lêuzaidu chi ningnui dage anui ne pauliâgai’ndibe gene ’nzuâtaluisui ze ningnui dage gospel sam paurua dizai â, chigumbe kau je â peize deset kai be lau.

⁹Tingtie ge anui salia’ndibe luigum ze, chuna du I ne salia kadai de lei, ningnui ngaulube ’nzuâtaluisuidibe gospel ze mi-mige ne ningnui dage paurua dizai â pechu â peize deset kai be lau.

¹⁰I ne chunage ziemmename ne ka’nchâbe je peu mei nune Hera ne ka’nchâbe je peu lau? Makchai I ne ziemmename suigut tew bam ra peu se mei? I ne ziemmename suigut tew bam rei lei dizai â, I ze Krista guâ ka’ngguapeu chang ra mak lei.

¹¹A puiname gau, gospel I ne paugaibe ze â, ziemmename gu gospel mak lei be ningnui ne chî ra I lunei daseu.

¹²Ziemmename dagene chize I ngaulube mak, zai achu geteigaibeibe du mak, kane Isua Krista gu keliâbe gene chize â wang daseu.

¹³’Ndâge Judame gu herasie ge I bam ze herakiangname je I ne tewsâ-kadesangbe benai chize tew’ngga ra tewbe rasam ze ningnui ne chî kam de lei;

¹⁴zai a pau-paime ne herasie tewdiak kai bei dadege I ne ’nninghekuî-desang ze Judame gu herasie ’mpuî ge a zatme ruage a hiâme leine peirei I ne ’nzûtat ti ze bambe tak zeu.

¹⁵Kane achu lung makge achu diepatchâm gai ze pa ka’nggiabe gene achu kûpeu zene,

¹⁶pe Na je achu teilia gai nei lei, chidezai Jentailme ruage I ne pe rasam paurua gai ra hangge zeu, hejai benai hemeipum dage mâ chî ra herua gai makse,

¹⁷zai I apostol chang makge apostol changdime dage Jerusalem ge du I hang gai nei lei, kane Arabia ’mbe I tat kai di de lei; zai Damaska ge I helatwang gai kadai de lei.

¹⁸Zai kum chum chângge Kephabe je ngauhedau gai ra Jerusalem ’mbe I hang lei, zai pe dage hezie kereu ze mengeu I ’nnai gai lei.

¹⁹Kane apostol kêdame je â mi je de ngau mak lei, Heguangpeu kinapeu Jakobbe je runne zangnêu.

²⁰(I ningnui hang sam rawbe ge Hera masua gene I karasa sa me lei!)

²¹Chipau chângge Siria benai Kilikia huâzie ’mbe I tat ti de lei.

²²Zai Judia ge Krista gu herakiangna bamme ne a luî chî mak kerei lei;

²³chi “’Ndâge anui je tewsâpeu, keneibe-sie tew’ngga ra tewpeu ze chuna â pa ne keneibe rasam paurua la de lei,” ze sabe penui seube runne lei.

²⁴Zai a ziegene penui Hera ngeu-tew’ndi ze bam di de lei.