Read Zeme Naga GALATIAME 2 Bible Online

GALATIAME 2 - Zeme Naga bible

GALATIAME 2

¹Zai kum kereu ze medai châng dege, Jerusalem ’mbe Barnabasbe je ngua lu I hang lei, zai Titabe je du ngua’mpam lu zeu.

²Keliâbe ngaube gene I hang de lei; zai Jentailme ruage I pauruabe gospel ze penui suage teipat kai lia de lei, (kane kedime suage reine ze) hela gene liâ gai zeu, makchai â I tâtewgai’ndibe benai tâtewrabe ze ’ntakû gai du daseu.

³Kane Titabe a dage bambepeu ’nsangdu pa ze Grik zat chang leusedu, pechu â rumgetanrabe hangge ’nchi-chine lang gai me lei.

⁴Kane mi puina gesangmakme ne kebang ge nguagairabe hanggene Krista Isua gene penui lungzeunetew ze bambe tew’nsia ra rik ra reine ze gutme ziegene—

⁵penui dage luakat hang ’nsangdu penui kuâ kangge anui ne keikeu gai mak ze bam lei, chidezai gospel gu samsang ze ningnui hangge kaikua le ra hanggeneu.

⁶Zai mâ-hangge â betâudime ruagene (penui ze ’ndaikau hangge chang mei be zene a hangge mâ de gechâmbe hang tew gai me lei; Hera ne kehung-ka’nrie teilia me lei) chime, kedime changme zene a hangge mâ de peisuâ gai me lei be I salia de lei;

⁷makte rumgetanlume dage gospel rasam pau ra Peterbe je langpat kai gum ze rumgetanmakme dage gospel rasam pau ra langpat kai lei be penui ne ngau lu dege

⁸(rumgetanlume dage tâtewrabe hangge Peterbe dagene nguatâtewpeu zene Jentailme hangge a dagene nguatatew de lei),

⁹zai ka’nggiabe achu pei gai ’nde lei be Jakobbe zai Kephabe zai Johanbe, tâtewme kedime hangge ’nning’ndi gai ze bamme ne, I benai Barnabasbe zene Jentailme dage tat ra, zai penui zene rumgetanlume dage tat ra anai je puinakattewbe gu hezat’mbia ba tei ze hebakellum tew gai de lei;

¹⁰chi I ne tewnei-desang ze bambe, kelaksiame je chibam ra anui je penui ne nei de lei.

¹¹Kane Kephabe Antiok ge wang gai dege, pechu sa’nsia ze bambe ziegene pe sua sing gene pechu ka’ngngiam de lei.

¹²Jakobbe ne langgaime chige wangrabe suage pa â Jentailme je ngua’ngngateu ze bam lei; kane chime ne wang bei dege â rumkagetanbe kiangna je hing ze pa tat dai lu pe runne bamchâmcheî ze bam bei dadegeu.

¹³Zai Judame hanggesame â pe dage heluilung kesiabe tâ nguatew ze bam di ze Barnabasbe ’nsang je du penui luilung kesiabe zene ngua’nsia nan ze bam de lei.

¹⁴Kane penui zene gospel gu samsang deu ge ketapelatew ze bambe I ngau lu dege, penui ’nteumena sua sing gene I ne Kephabe je, “Nang ze Juda’mpeu chang ze bam leusedu Jentail’mpeu gum lung di ze Juda’mpeu gum lung makchai â ’ndaigum ze nang ne Jentailme je Judame gum lung ra tewgaichi le ra lau?” ze kacheu de lei.

¹⁵Anui ze lungkeube gene Judame changme, Jentailme kahemuime makme,

¹⁶acheusede mi-mi je de hingde gu tâtewbe ramme zene tew’nzeigaimakbe ziegene hingde gu tâtewbe ramme zene mak ze keneibe zene Krista gene tew’nzeigaibe ra hangge, Krista Isua ge anui ne ’nnum’mmi ze bam lu leusedu ziemmena je hingde gu tâtewbe rasam zene tew’nzeigaibe mak ze kane keneibe zene Krista Isua gene tew’nzei gai bei de lei be anui ne chi lei.

¹⁷Kane Krista gene tew’nzei gai be ra anui ne tâtewrankaibe geze anui ze hemuime chang laleu dizaine Krista ze hemui hangge nguatâtewpeu chang di de semei? Acheu mak sing lei!

¹⁸Kane I ne rakeugai’ndibe ramme ze I ne teleu’nsapchu dai dizai â, I ze hedeka’ngkapeu chang de lei be a runne achu I chî lei.

¹⁹Hera dage I ring le ra hangge, hingde hangge hingde gene I chai di daseu.

²⁰Krista dage achu nguagia’mpam gai bei de lei; ringbambepeu ze I ze ta de lei, kane a dage bambepeu Krista ne de lei; chuna hemeipum ge I ringbe ze Hera Na ge keneibe gene I ring lei, achu hung ze a hangge pe runne pechu peipatkaipeu zeu.

²¹Hera ka’nggiabe ze I ne tew’ngga me lei; hingde gene tewka’nzeibe bam dizai â Krista â ’nta chaigaibe chang de lei.