Read Zeme Naga GALATIAME 3 Bible Online

GALATIAME 3 - Zeme Naga bible

GALATIAME 3

¹Hei Galatiame kemieme bau! Châu ne ningnui je tew’mmie gai bei lau, chime mikngau sing gene Isua Krista je giagaibe teiliabeibe zeu?

²Aipau sam ze ningnui je I ne ’nneu gai be che lei: Herui ningnui ngaube ze hingde gu tâtewbe gene mei nune keneibe gene seulube gene lau?

³Ningnui mie-desang di de mei? Herui gene ningnui putchu lu ze ningnui â chunage hemeipumsie gene tud kai de ra de mei?

⁴Misongga ze ’ntane ningnui hereulie gai ’ndi mei?—chize ’nta run dizai aî.

⁵Hingde ne ka’nnangbe ningnui ne tewbe ziegene, makchai gospel rasam ningnui ’nnumka’mmibe ziegene Hera ne ningnui je Herui pei gai ze ningnui ruage tâningdaulakbe ramme tew mei?

⁶Abrahambe dage daube ’nning gai ni lau, “Pa ne Hera je ’nnumka’mmi lei, zai pa keneibe ziegene Hera ne pechu katelingpeu hangge lu gai bei de lei,” ze acheu ze rawdiakkaibe ka’nchibe sam ne rangbe gum zeu.

⁷Chidaze chî le lau, keneibe ge bamme ze Abrahambe name de lei.

⁸Hera ne Jentailme je keneibe gezene pe dage ka’nzeibe hang tew gai lu lei ze rawdiakkaibe ka’nchibe sam ne rang’ntua gai lei. Zai rawdiakkaibe ka’nchibe sam zene gospel Abrahambe dage acheu ze pau gai ze, “Nang gene Hera ne ziemmena zat leine je ’nnam gai gu lei,” kacheu de lei.

⁹Chidadege â keneibe ge bamme leine je â Abrahambe keneibe bambepeu dage penui je du ’nnam gai bei de lei.

¹⁰“Hingde gu tatew ramme ge ’nnumka’mmime leine â, desetkaibe kangge bam de lei; hingde leisikuak ge rawgaibe luigum ze bam mak zai tewmakme leine je â desetkaibe chang lei,” ze raw gai ’ndi daseu.

¹¹Chunage mî je de Hera masuage hingde ne tew’nzei gai me lei be ngau’nchichiak lei; “Keneibe gezene ziemmena katelingbe kau ze ring gu lei,” ze kacheu daseu;

¹²kane chi hingde ze keneibe ge bam mak lei, “Chipau (hingde) tâ ramme tewbe kau ze chi (hingde) ramme gene ring gu lei,” ze kacheu daseu.

¹³Krista ne anui kelei desetkaibe lie ze, hingde ne desetkaibe gene anui je ’nripat kai bei lei — “Hingbang ge keika’nchiebe kau leine je â desetkaibe chang lei,” ze raw gai ’ndi daseu.

¹⁴Chidezai Abrahambe peireige ’nnamgaibe ze Krista Isua gene Jentailme peireige wangchang le ra hangge zeu, dezai keneibe gezene Herui ngau ra hatkaibe ze anui ngau le ra hangge zeu.

¹⁵A puiname gau, nai’nsangne kebambe tak ze I teilia ra de lei: ziemmena hangna ne mâ-pedeu kat ge hesuî-hezuâ lu hesuikahezuâbe chîrabe hang ’nchetkai’ndibe ge mî ne de chize tew’nsiachi lak lei, zai chige mâ de kaisuâ ra du kaisuâchi lak lei.

¹⁶Chunage samhatkaibe ramme ze Abrahambe benai pe haîhik kau dage pei gai bei de lei. Chize misonggame je rangbe “Zai piakeume dage” kacheube mak lei; kane hangkat je rangbe, “Zai ning dagene piakeume” kacheube ze lei, chize Krista je rangbe zeu:

¹⁷I ranglianeibe ze â aize lei, kum haî medai ze himreu chângge hingde wangbe ze, tingtie Hera ne chigaihâ’ndibe samhatkaibe ze tew’ngga me lei, chi samrialube ze betâugabe hangge tew gai be ra hangge neu.

¹⁸Mi heu nguaheurabe ze hingde gene ngau ra dizai â samhatkaibe gene ngau ra â chang ta de lei; kane samhatkaibe gene Hera ne chize Abrahambe je pei bei de lei.

¹⁹’Ndaitew ra hingde ze kai lau? Chize hingde ka’ngkabe bambe ziegene kaisuâ de lei, samhatkai’ndipeu dage pe haîhik’mpeu wangchang gai mak tâneu; zai chize â hekakdakpeu dagene angelme ne tew’ntip kai bei de lei.

²⁰Chunage hekakdakpeu hangkat bambe zene hangkat suadu kie la lei be chî ra chang lei; kane Hera â kat runne lei.

²¹Acheuzaine hingde ze Hera gu samhatkaibe je ka’nggi semei? Chize acheu me lei; ring ra tewgaiduibe hingde ze pei gai ’ndizai â hingde zene ka’nzeibe ngau sing du de lei.

²²Kane rawdiakkaibe ka’nchibe sam ne mâgetaleine ze hemui kangge kai kam gai ’nde lei, chidezai Isua Krista ge keneibe gene samhatkai’ndibe riagai’ndibe ze ’nnumka’mmime hangge pei gai le ra hangge zeu.

²³Chunage keneibe wangchangrabe suage, keneibe liâ gai mak tânege anui je â hingde kangge kaikua ze bam lei.

²⁴Chidadege keneibe zene anui je tew’nzei gai be ra Krista wang mak tânege hingde zene anui je kereîpeu chang ze bam lei.

²⁵Kane chuna â keneibe wangchang di dege, kereîpeu kangge anui ze bam ta di de lei.

²⁶Krista Isua ge keneibe gezene ningnui Hera name chang kam di de lei.

²⁷Ningnui dage Krista gene nguabaptistewlume leine â, Krista zene hepuâni chang ze bam di daseu.

²⁸Chige â Judame benai Grikme gechâmbe ga de lei, zai kebang benai kebang-makme du gechâmbe ga de lei, zai ’mpeumi benai ’mpuimi du gechâmbe ga de lei; Krista Isua gene ningnui kat chang kam di daseu.

²⁹Zai ningnui Krista gu chang zai â, ningnui ze Abrahambe haîhik kam de lei, samhatkaibe luigum ze pe heu nguaheurame chang zeu.