Read Zeme Naga GALATIAME 4 Bible Online

GALATIAME 4 - Zeme Naga bible

GALATIAME 4

¹Chi nguaheurapeu, I ne kacheube ze, pa ne mâ-mâ leine ge pa’mpau chang ze bam leusede pa napoine chang ze bam di tâne â, pa ze kebang hangkat dagene yi-ka’nteube ga lei;

²kane Bepeu ne beting patingnaimikpui diegaibe wangchang mak tâne â, pa ze kereîme benai mi heurâ reîkuame kangge bam bam lei.

³Chipau luigum ze anui dage du bam bam lei; anui hena ze bambe ting ge â kedeirei gu herui ramme ne samrambe kangge kebang chang ze anui bam bam lei.

⁴Kane beting diegaibe wangchang sing gai dege â, Hera ne pe Na je langkeu gai de lei, ’mpuimi ne lungkeu gai de lei, hingde kang gene lungkeu zeu,

⁵hingde kangge bamme leine je ’nripat kai be ra hangge zeu, dezai anui je pe name hang hiam gai be ra hangge zeu.

⁶Zai ningnui pe na changbe ziegene Hera ne pe Na gu Herui ze ningnui lungge lang gai bei ze Herui ne, “Abba! a peu!” acheu ka’nrung de lei.

⁷Chidadege Hera dagezene chuna ningnui kebang chang ta di ze, pe na chang di de lei, zai pe na chang dizai â, pe heu nguaheurame chang di de lei.

⁸Tingtie ningnui Hera je chimakbe luage â, ningnui ze hera-makbe ramme gu kebang chang ze bam di de lei;

⁹kane chunage ningnui ne Hera je chî, zai Hera ne du ningnui je chîdibe châng gene ’ndaigum ze ’nsangmakbe benai peran-gabe herui ramme lam’mbe ningnui ’nreipie dai ze penui gu kebang chang gai dai nei ze bam rei lau?

¹⁰Ningnui ne patingnaimikpui ramme, zai hekêu ting ramme, zai beting-panehî ramme, zai patingkum ramme rei’ntip ze bam lei!

¹¹Ningnui deu hangge I tâtewhereugai’ndibe ze ’ntakû gai ra I hing lei.

¹²Ningnui je I kiam lei, a puiname nung gau, I gum ze bamchi lau, I du ningnui gum ze bamchi ze bam daseu. Ningnui ne a hangge mâ de kemaube tew gai me lei;

¹³a pum ran-gadaubeibe ziegene raîlangbe ge ningnui dage gospel rasam I pau gai ra chang di de lei be ningnui chî lei;

¹⁴zai a pumsak yimakbe ze ningnui hang kakedakbe chang leusede, ningnui ne achu ngau’nna ze tuâpat kai mak, kane Hera gu angel’mpeu je gum ze, zai Krista Isua je gum ze achu ’nchâ bei de lei.

¹⁵Ningnui lungwângchangai’ndibe ’ndaikau chang gai di lau? Ningnui ne ningnui mik kuipat dui nung laîzai â kuipat lu achu chiramme peikamgaineibe lungtak bambe ze ningnui ze I sakkitew bam de lei.

¹⁶Kane ningnui dage I ne samsang saliabeibe zene ningnui teureipeu I chang di de mei?

¹⁷Ningnui dage penui ne ran-kadesang de lei, kane mâ-keyibe deu hang tewbe hangge mak lei; penui ningnui je tewnam gai nei lei, chidezai penui dage ningnui ne rangaihâ dai ra hangge zeu.

¹⁸Mâ-keyibe deu hangge â ’nchâ ze ran bam ra yi lei, ningnui dage I bambe luage runne mak zeu.

¹⁹Krista luilungtak keyibe (ningnui ge) helung ge ’ndetpat mak tâne henalungbe herêuted ningnui hanggene a dage bambe ningnui a name napoine ramme!

²⁰Chuna ningnui dage I a kuâ a lad tewchâm gai ze bam gai nei-desang lei, ningnui deu hangge I ’nningkahereu dadegeu.

²¹Ningnui hingde kangge bamneime gau, achu rang gai lau, ningnui hingde seu mak mei?

²²Abrahambe na ’mpeumi hangna bam lei, hangkat â kebangpui dagene zuapat zai hangkat â, kebangmakpui dagene zuapat lei ze raw gai ’ndi daseu.

²³Kane kebangpui na je â hemeipumsie gene lungkeu lei, kebangmakpui na je â samhatkaibe gezene lungkeu lei.

²⁴Chuna â aize sam’nda hang chang di de lei: Ai ’mpuimi hangna ze samhatkaibe kena hang chang de lei. Hangkat â napoine ramme je kebang changrabe hang lungkeu ze Sinai Loa gene pat lei; pa ze Hagarle de lei.

²⁵Chunage Hagarle ze â Arabia ge Sinai Loa hangge chang de lei; pa zene chuna bambe Jerusalem ’nda hangge teiliabe chang lei, pa ne pe name je ngua lu kebang kangge bam dadegeu.

²⁶Kane kehu ’mbe bambe Jerusalem â lungzeunetew ze bam lei, zai pa zene anui pui chang de lei.

²⁷“Ning suiyi zu lau, Hei nang hena gabepui, henalungmakpui gau; nang hena lung ra ’nra’nsuamakpui, ’nrungpat kai zu lau; kelaktewbepui name suadu putkaibeipui name ne kie’nteu lei,” ze raw gai ’ndi daseu.

²⁸A puiname gau, chunage anui â Isaakbe gum ze samhatkaibe name de lei.

²⁹Kane chipau ting ge mi pumsie gene lungkeube na ne Heruisie gene lungkeube na je tewsâ gum ze chuna ting ge du chigum chang de lei.

³⁰Acheuleusedu rawdiakkaibe ka’nchibe sam ne ’ndaikautew lei lau? “Kebangpui benai pe na je kelitua ne lau; kebangpui na ne kebangmakpui na dage nguaheu ra mak daseu,” kacheu de lei.

³¹Chigum ze a puiname gau, anui â kebangpui name mak lei, kane kebangmakpui name de lei.