Read Zeme Naga GALATIAME 5 Bible Online

GALATIAME 5 - Zeme Naga bible

GALATIAME 5

¹Lungzeune hangge Krista ne anui je ’nripat kai bei de lei! Chidaze sap’ntip le lau, zai kebang gu guangkâm hangge keikeu gai dai ta lau.

²Chunage, I Paulbe ne ningnui je rang lei, ningnui rumkagetanbe lu dizai â ningnui hangge Krista ze mâ de kegiebe ga du de lei.

³Mi-mige rumgetanlume leine dage I ne, pa â hingde leine rei’mmi sing ra chang gu de lei be sakkitew gai kadai de lei.

⁴Ningnui hingde ne tew’nzeigaiberame, ningnui je â Krista dagene kuîtua ’nde lei; Hera ka’nggiabe gene ningnui â kâu di de lei.

⁵Herui gezene keneibe gene kapelingbe je heguîrabe hang anui kuâ bam daseu.

⁶Krista Isua ge rumkagetanbe du zai rumgetanmakbe du mâ de gechâmbe ga de lei, kane kehungbe gezene keneibe ze tâtew bam di de lei.

⁷Ningnui pak’mmi-desang de lei; samsang kuâpheurabe ze châu ne ningnui je nam bei lau?

⁸Chize gekiambe ze â ningnui je kûgaipeu dagene patbe mak lei.

⁹’Nduihî kecheîne zene dekuîkâng zuktui lu lei.

¹⁰I ka’nningbe gene ningnui ka’nningbe gechâmbe bam ra mak ku lei be ze Tingwang gene I ’nnum’mmi ze la lei; zai mi-mige lêuzaidu ningnui je tewkahereube kau je â pechu samramgaibe ze pa ne pung gu lei.

¹¹Kane a puiname gau, I ne rumkagetanbe sie ze paurua bam rei lei dizai â, ’ndaitew ze achu tewsâ bam ra rei lau? Aipau deu geze tewnambe changbe chi heling ze tei’mbia ’ndi de lei.

¹²Ningnui je tewkakeleume bau je peize penui runne penui je tew’nsia kam gai ra kaheguî lei!

¹³A puiname gau, lungzeunetew ra ningnui je â kûpat kai de lei; ningnui lungzeunetew ra ngaube ze hemeipumsie hangge betâuyibe hang tei gai se lau, kane kehungbe gezene kat-kat deu hang ka’ngguabe chang ze bam lau.

¹⁴“Ning runne ningchu nang hung gum ze, ning kining’mpeu je nang hung ra lei,” kacheube samkie kat gene hingde leine tewpui gai ’ndi daseu.

¹⁵Kane ningnui kat-kat je ’ngkî ze kat-kat je deîhejam ze bam dizai â kat-kat je tew’nggagaibe chang me ra ’ntîng le lau.

¹⁶Kane aize I rang lei, Herui gene ningnui tat lau, zai hemeipumsie ne ka’nchâbe ramme ge ngua-hesuiyi gai se lau.

¹⁷Hemeipumsie ka’nchâbe ze â Herui je ka’nggi lei, zai Herui ne ka’nchâbe je â mi pumsie je ka’nggi lei; aipau kena ze â kat-kat je ka’nggi daseu, ningnui tewneibe tewbe gene ningnui je tewnam ra hangge zeu.

¹⁸Kane Herui ne ningnui je ngua ze bam dizaine â hingde kangge ningnui ze bam mak lei.

¹⁹Chunage mi pumsie gu tatew ramme ze â teilia’nchichiak lei: chiramme ze ai lei: hangleutewbe, kahebâbe, kaheliâbe,

²⁰heraluîtewbe je kakellumbe, kahekabe, ’nggî-kahegeibe, kahegeibe, hemimeube, helumpumbe, mâ-tingbe, pebautewchâmbe, pebau pungchâmneibe lungtak,

²¹hemimeube, kameneube, teu ze sak lu keleuchibe, zai kêdadabe ramme airamme zeu. Aigumbe tâ ramme tewme â Hera gu heguangram ze nguaheu ra mak lei.

²²Kane Herui rachî â, kehungbe, misuiyibe, desieyibe, liechibe, ka’nggiabe, keyibe, lungsangtewbe,

²³karenuabe, mi je reîchibe ze lei; aigumbe ramme je ’nggirabe hingde â ga de lei.

²⁴Zai Krista gu ziemmena changme â, hemeipum suigut ramme benai hemeipum ka’nchiebe kesiabe ramme penui ne giachat kai ’ndi de lei.

²⁵Herui gene anui ring ze bam zai â, Herui gene anui du tat ze bam kei lei.

²⁶Gechîrettewbe, zai kat-kat je geturuabe, zai kat-kat je hemimeube ze anui dage peize bam mak kei lei.