Read Zeme Naga GALATIAME 6 Bible Online

GALATIAME 6 - Zeme Naga bible

GALATIAME 6

¹A puiname gau, mi-mige ziemmena je mâ-mâ-kesiabe tâ tewbe gene nîm ’ndizai â, ningnui heruisie ge bamme ne helung keyibe gene pechu lupat kai dai be lau. Ning runne ningchu pie’mmi le lau, makchai â ningchu du duaikau ’ndu lei.

²Kat kat put keritbe punghelei ze bam lau, zai chigum ze Krista gu hingde tewpui ze bam lau.

³Ziemmena perunne ne pechu ’nning’ndi gai lu, kane pa ze mâ-luîdemakbe chang dizai â pe runne pechu pa duaibe chang daseu.

⁴Kane ziemmena ’nteumena ne pe run-runne gu tatew ze peize kedak le lau, chidezai pe hangge hegiê ra changbe deu ze pe ramna’mpeu dage mak ze pe runne dage bam du lei.

⁵’Nteumena ne perun-runne put ze pung ra chang gu daseu.

⁶Samkeyibe pechu geteigaibeipeu zene châu ne pechu getei gai mei chipaupeu dage peize mâ-keyibe zat leine nguatimzi ze bam lau.

⁷Ningnui je peize choa gai bei ze bam se lau; mi-mige ne de Hera je kemaklube kau mak lei, ziemmena pa ne linggaibe ze pa ne du gat dai gu lei.

⁸Pe pumsie lam ge lingbe kau ze hemeipumsie lam gu hui’nggagaiderabe gat ku lei, kane Herui ge lingbe kau â, Herui gu ringbetunmakbe gat ku lei.

⁹Zai tâ-yibe tewbe ge anui mi ran-ga mak bam kei lei, anui ne ’nningkelam gai mak bei zai â beting-pehî sing ze anui gat kû daseu.

¹⁰Chidaze anui pedâuyibe ngaube luage ziemmename leine dage tâ-yibe tew kei lei, zai keneibe kibaume dage ’ngkeune ze tew kei lei.

¹¹A ba sing ne ningnui dage leisirit maîlang-langbe ne rawgaibe pie gai lau.

¹²Rumgetan ra ningnui je kagechungme bau ze hemeipumsie ge mâ-ngauyi ra tewneime bau zene de lei, Krista gu heling ziegene peize penui je tewsâ gai mak ra hanggeneu.

¹³Penui rumgetanlume ne ’nsangdu hingde tei me lei, kane ningnui gu hemeipum ge rumgetan-gailube gezene penui ’nrîmyi gai ra hangge ningnui je peize rumgetan gai nei lei.

¹⁴Heguang Isua Krista gu heling, chize ne kedeireime je a hangge giagaibe, zai achu kedeireime hangge giagaibe, chige runne ra zangno, a ’nrîmyirabe hang â aize a dagene peize deutau bam de lau.

¹⁵Tewkarchibe ne makchai â, rumkagetanbe ne du zai rumgetanmakbe ne du mâ de sua me lei.

¹⁶Aipau sie gene tatme leine dage desieyibe benai ka’nggiabe peize bam lau, Hera gu Israelme bau dage zeu.

¹⁷Chuna gene seuze mi-mige ne achu peize tewkeleu se lau; a pumgîm ge Isua gu ’nchetkaibe ramme I pung la daseu.

¹⁸A puiname gau, Heguang Isua Krista ka’nggiabe ze ningnui lungsui ge peize bam bam lau. Amen.