Read Zeme Naga EPHESIME 1 Bible Online

EPHESIME 1 - Zeme Naga bible

EPHESIME 1

¹Paulbe Hera suî’nning gene Krista Isua gu apostol’mpeu, keneibe lam ge (Ephesi ge bamme) ka’nchime chi penui du Krista Isua gene lungsangtew ze bamme dage,

²Hera anui Peu benai Heguang Isua Krista dagene ka’nggiabe, zai desieyibe ningnui dage peize bam lau.

³Anui Wang Isua Krista Peu Hera, tinggîm bâm ramme gene Krista gene herui lam ge ’nnamgaibe leine zene anui je ’nnamgaibeipeu je peize toa lau,

⁴anui je pe masuage peize kesia ga ze lung ra hangge kedei ’ndam gai mak’ngka pa ne pe dage anui je kelâng gai bei de lei.

⁵Pa keneibe tew ra bambe luigum ze pa ne kehungbe gene anui je Isua Krista gezene pe name hang hiam’ntua gai bei de lei,

⁶chi Kehungpeu gene pa ne anui dage ’ntane peigaibe pe gu kang’nggiabe ngeudibe hangge zeu.

⁷Pa ka’nggiabe misongga bambe luigum ze pe jai gezene ripatkaibe, chi anui gu hede ka’ngkabe kelunbe ze pa gene anui ngau lu de lei,

⁸chi pa ne anui peireige pei’nniâmbagaibe zeu.

⁹Krista gene pa baigaibe chi pe gu tâtewrabe bambe luigum ze pe suî’nningtak chîchanglakbe ze kaningchingbe benai mâ-chîka’mmibe leine gene pa ne anui je chî ra tew gai bei daseu,

¹⁰mâgetaleine, ting benai kedei ge bambe zat ramme pe dage teiheruakamgairabe beting-pehî singbe hangge teleu’ntuagaibe hang gum zeu.

¹¹Pe suî’nningtak luigum ze mâ-leine tewpui ze bampeu gu tâ tew ra bambe luigum ze pa gene,

¹²anui Krista gene heguî ze bamraidime je hiam’ntua gai ze pengêudibe je toa ze bam ra sum gai bei de lei.

¹³Pa gene ningnui, peling sam, chi ningnui gu tewka’nringbe gu gospel ze seulume, zai ningnui pa ge ’nnum’mmidime je du hatkai’ndibe Herui Ka’nchibe zene ’nchet kai bei de lei,

¹⁴chize anui ne nguaheu ra ngau mak tâne hatkaikuabe hang chize ne chang lei, pengêudibe ze toabamrabe hangge zeu.

¹⁵Aipau deu hangge Heguang Isua ge ningnui keneibe benai keneime ka’nchime leine je ningnui kehungbe rasam I seulube ziegene,

¹⁶I kakellumbe ge ningnui je ’ngngaî mak ze ningnui hangge a suiyibe rasam sau mak ze pau gai bam de lei,

¹⁷chidezai anui Wang Isua Krista Rapeu, pengêudipeu ne ningnui je pechu gechîbe ge kaningchingbe benai keliâbe herui ne pei gai le ra,

¹⁸ningnui lungmik tewreba gai bei ze, ’ndaikau kaheguîbe ge ningnui je pa ne kû gai mei be, keneime ka’nchime dage pengêudibe heu nguaheube misongga bambe ramme,

¹⁹zai anui ’nnumka’mmime anui dage pa tâtewchibe kedibe mi rangdaulakbe bambe ze anui chî le ra hangge zeu, pe gu peranchibe tatew,

²⁰pa ne kechaibe gene pechu kuakchugaibe luage Krista gene pa tâtewpuigai’ndibe benai tinggîm bâm ramme ge pa ne pahezat’mbia ge pechu tei’ntaugaibeibe,

²¹mâ-leine peireige samrambe, zai reziechibe zai tâtewchibe zai kaheguangbe, zai heji leine bambe peireige heji ’ntakkai’ndibe, aipau rehei ge runne makse, kane wangdairabe ge du bamdibe luigum zeu;

²²zai mâgetaleine ze pa ne pe pîkangge kai kam gai lu pechu herakiangna hangge mâgetaleine peireige bepeî chang ra tew gai bei de lei,

²³chi pe pum, peluî hang tew’nsanggaibe, pa zene mâ-leine hangge tewpui ze bambepeu zeu.