Read Zeme Naga EPHESIME 2 Bible Online

EPHESIME 2 - Zeme Naga bible

EPHESIME 2

¹Ningnui ai hede ka’ngkabe benai hemui gezene chaidibe luage pa ne ningnui je tew’nring gai bei de lei,

²chi aipau kedeirei ’mpuî luitat ze, kehu ’mbe tingkai ge tâtewchibe gu heguang, chi hekuâpheumakbe name ruage chuna tâtew ze bambe herui chaisui ze ningnui tingkat tatkai’ndibe zeu.

³Tingkat â aime ruage anui mi lung benai mi pum ne keneibe ge sui ze anui gu hemeipumsie suigut ge bam gai di de lei, zai chigum ze ziemmena kêdame zat gum ze Hera lumpum name luilung ge anui lung gai di de lei.

⁴Kane kehungbe kedibe zene anui je hunggai’ndibe ka’nggiabe ne puibe Hera ne,

⁵anui gu hedieka’ngkabe ramme gezene anui chaigaidibe luage ’nsangdu anui je Krista dage nguatew’nring gai ze (ka’nggiabe gene ningnui je tew’nring gai bei de lei),

⁶zai pe dage nguakuakchu gai ze, zai Krista Isua gene tinggîm bâm ramme ge pechu ngua’ntau ra tew gai bei de lei,

⁷chidezai Krista Isua gene ka’nggiabe gene pa’nggia kedibe seikamlakbe anui je pa ne teilia gai be ra hangge zeu.

⁸Keneibe gezene ka’nggiabe gene ningnui je â tew’nring gai bei daseu; zai aize ningnui tatew ne mak lei, chize â Hera kela lei—

⁹tâtewbe ziegene mak lei, makchai â, mi-mige ne kedikuâ-kua gu daseu.

¹⁰Anui ze â tâ-yibe tewrabe hang Krista gene ’ndamgai’ndibe pe bachiâm ramme de lei, chiramme gene anui tat ra Hera ne teleu’ntuagai’ndibe zeu.

¹¹Chipauziegene rumkagetanme, chi hemeipum ge heba ne teleugailume zene rumgetanmakme acheu ze kume ningnui Jentailme ting kat ge hemeipumsie ge bamgaibe ze chî bam lau—

¹²chipau chângge ningnui hangge kaheguîbe ga di, zai kedeirei ge ningnui hangge Hera ga di ze Krista dagene châmtattibe, Israelram name changbe gene ’ngkietattibe, zai deseugaibe gu samhatkaibe ge hesangme changgaidibe ze chî bam lau.

¹³Kane chuna â Krista Isua gene ningnui ting kat â deu ze bamdime je Krista jai gene teiwang’nna gai bei de lei.

¹⁴Anui hangge bau na ze kat hang tewgaipeu, zai rawkiapatkaibe gu ’mbetlim ze tew’nsia gai ze,

¹⁵desieyibe tew ze chi hangna bambe bâm ge ziemmena hangkat karchipeu ne bam ra pa gene tew gai le ra

¹⁶zai anui bau na je heling gezene pum kat ge Hera dage nguadesieyibe tew gai bei ze chigene hekailakbe tew’ntau gai ra samdie ramme benai hingde tewgaibe ramme gu hingde ze pe gu hemeipum gene tew’nggagaipeu zene anui gu desieyibe bangpui chang di daseu.

¹⁷Zai pa ne wang ze ningnui deu ze bamdime dage benai kenahia ge bamme dage desieyibe sam ze pau gai bei de lei;

¹⁸pa gezene Bepeu dage Herui kat gene anui bau na wang ra chang dadegeu.

¹⁹Chidaze ningnui chunage â, hesangme benai bamgaileume chang ta de lei, kane ningnui ze keneime ka’nchime benai Herakibaume chang ze

²⁰Krista Isua ne pemikchukâng changbeibe gene apostolme benai kemeume gu hekipung ge heki tew gai ze bam di de lei,

²¹chi Krista ge hekitewbe leine patimtau tewzun lu ze, Heguangpeu gene ka’nchibe kellumki hangge chang ze bambe zeu;

²²pa ge ningnui je du chige nguatei’nsap kai ze, Herui ge Hera bambe bâm chang le ra hangge zeu.