Read Zeme Naga EPHESIME 3 Bible Online

EPHESIME 3 - Zeme Naga bible

EPHESIME 3

¹Aipau deu hanggene ningnui Jentailme kelei ge Krista Isua hangge I Paulbe kebangki ge bambepeu ne—

²ningnui hangge Hera ka’nggiabe tâ ’nggua ra achu peibeibe ze ningnui seuchang ra ’nnum gai lu ze,

³’ndaigumbe tak gene chîchanglakbe sam ze keliâbe gene achu chiliâ gai mei be ze keduibe gene I raw gai de lei.

⁴Aize ningnui kia gai dezai, Krista gu chîchanglakbe ge I mâ-chika’mmibe tak ze ningnui chî gu de lei,

⁵chize â, chuna Herui ne pe gu apostol ka’nchime benai kemeume dage liâgaibe gum ze â rehei kêdabe ge â ziemmename name dage chiliâ gai mak lei;

⁶chize Jentailme ne du Hera heu nguaheurame, chi hepum kat gu betâurâ ramme changme, zai gospel gezene Krista Isua gene samhatkaibe ge hedam ze lume changbe tak te lei.

⁷Pe gu rezie tâtewchibe zene achu peigaibe chi Hera ka’nggiabe kela luigum ze achu â ai gospel guâ ka’ngguapeu hang tew gai bei de lei.

⁸I ze ka’nchime ruage cheikagesangbe kau chang ze bam leusedu ai Hera ka’nggiabe ze pei gai bei de lei, Jentailme dage peulakbe Krista heurâ keyibe ramme pauliâ gai ra,

⁹mâ-leine ’ndamgaipeu Hera ge rehei acheutie tattibe ge mi chîchanglakbe tatew baigai’ndibe deu tak ze ziemmename leine ne ngau ra tew gai ra hangge zeu;

¹⁰chidezai herakiangna gezene Hera kaningchingbe misonggabe ze tinggîm bâm ramme ge samramme benai rezieteime dage chiliâ gai be ra hangge zeu.

¹¹Krista Isua anui Wangpeu gene betingbeta tâtew ra bambe ze tewpuigaibe,

¹²pa ge anui keneibe gezene zuagut ra pe dagene helungdibe benai ’nnumka’mmibe anui ngau de lei.

¹³Chigum ze I ne ningnui hang hereulie ze bambe ge ningnui mâ-’nningrabe tak chî ta di bam mak ra ningnui je I ne rang gai de lei, ningnui ngeudibe hang chize changbe zeu.

¹⁴Aipau ziegene Bepeu suage I kukdungkeu gai de lei,

¹⁵pe dagene tinggîm ge benai kedeirei ge pe kibau changme leine ji ze ’ntak kai de lei,

¹⁶chidezai pengêudibe heu ramme bambe luigum ze pe gu Herui gezene ningnui je ningnui lung sing geze pa tâtewchibe ne ningnui ran tew’nchi gai be ra,

¹⁷zai keneibe gezene ningnui lungge Krista ze bam bam de ra hangge zeu; dezai kehungbe ge ningnui materinghi lu, zai kebauguâ lu,

¹⁸keneime ka’nchime leine benai ningnui ne pedit, petâ, pehut, zai pechuk bambe tak chî’mmi le ra tâtewchibe ngau ra,

¹⁹zai Krista kehungbe rangdaulakbe tak chî le ra dezai Hera luilungtak ze ningnui dage puigit ze bam de ra hangge zeu.

²⁰Chunage anui dage reziechibe ne tâtew ze bambe zene anui ne gekiebe zai ka’nningbe peirei misongga tâtewgaiduipeu dage

²¹betingbeta rehei leine hangge pengêudibe ze herakiangna ge benai Krista Isua ge peize bam bam lau. Amen.