Read Zeme Naga EPHESIME 4 Bible Online

EPHESIME 4 - Zeme Naga bible

EPHESIME 4

¹Chipauziegene ningnui je kûgaibeibe ge kûgaibe kezei ge ningnui bamchi ze bam ra I Heguangpeu hanggene kebangki ge bampeu ne ningnui je kiam de lei,

²kecheiluilung benai karenuabe luilung pungchi, zai gesutchi ze kehungbe gene kat-kat je ’nzaîchi ze,

³desieyibe pikaheluabe gene Herui ge pumkat tewbe ze teichinei-desang ze bam lau.

⁴Hepum ze kat, zai Herui ze kat bam lei, ningnui je kûgaibe ge kaheguîbe kat hangge kû gai gum zeu.

⁵Heguang kat, keneibe-sie kat, zai baptisma kat,

⁶mâ-leine peireige bampeu zai pebâm leine ge benai mâ leine ge bampeu, Hera, anui ’nteumena peu kat ge zeu.

⁷Kane Krista gu kela hedam kaikuabe luigum ze anui ’nteumena je ka’nggiabe pei gai bei de lei.

⁸Chipauziegene acheu sa gai ze “Kehu ’mbe pa chudibe luage kebang hang tîm’ndime bau je pa ne ngua ’ndi de lei, zai ziemmena je pa ne kela ramme pei gai bei de lei,” kacheu de lei.

⁹(“Pa chu de lei,” kacheube geze pa ne kedei ’mbe wangkeube rimba hang zangno ’ndaikau dai ra lau?

¹⁰Pa wangkeugai’ndipeu ze tinggîm peirei ’mbe du chudipeu ze de lei, pa ne mâ-leine ge bampuigit ze bam le ra hangge zeu.)

¹¹Zai pe gu kela ramme ze â, hanggesame ne apostolme, hanggesame ne kemeume, hanggesame ne ebanzilisme, hanggesame ne pastorme, zai hanggesame ne geteiliame chang ra peibe,

¹²tâ ka’nchibe ’nggua ra peibe ze lei, Krista pum tew’nsapchurabe hangge keneime ka’nchime je mâ-getei’nsanggaibe ramme hangge zeu,

¹³helung besing ze bam ra, Krista kebambe tak gum anui du bamchang ra, keneibe-sie ge suikat-lungkattewbe benai Hera Na je gechîbe ze anui ’nteumena ne lutâuchang mak tâne hangge zeu;

¹⁴chidezai anui napoine gum ze gi’nruirua ze ziemmena ningching kesiabe, penui tak kesiabe gene penui duaî kesiabe zene keneibe-sie geteiliabe gu tingkai zat leine zene gui’ntîrua ze bamme chang ta de ra hangge zeu.

¹⁵Kane, kehungbe gene samsang sa ze, mâ-leine ’mpuî ge bepeîchangpeu, Krista dage anui chîngchu gai ze bam ra de lei,

¹⁶chigezene hepum pelane, hepumtaura ramme hang peigaibe ’ntukhelua kam gai lu ze, hepum ’nsingsîngbe hang chîngpat ze, hepumtaura ramme zene tâtew’mmi gai dezai—kehungbe gene pe runne gene tew’nsapchu zeu.

¹⁷Chunage Jentailme penui lung helasa ze bam gum ze ningnui â bam ta ra Heguangpeu gene aize I ne ranglia’nchichiak kai de lei;

¹⁸penui lung keikeulakbe ziegene penui dage mâ-mâ bambe penui chî mak dege, penui je â penui mâ-gechîbe ze tewmuî gai bei, Hera keringbe gene tei’mpak kai bei de lei;

¹⁹penui â ’ndamdei bam gai di, zai lungkeleu gai di, mâ-mâ-katenetbe tatew zat leine tew mak ze â bamdaulak kai di de lei.

²⁰Aigum ze â Krista rasam ze ningnui getei me de lei!—

²¹ningnui ne pe rasam seu zai Isua ge samsang bambe luigum ze pa gene ningnui je geteiliagai’ndibe ’nning gai degeu.

²²Ningnui gu tingtie telungtak chi keduaibe kadekumbe gezene tewhebâ’ndibe gu perie luilungtak ze sâu ne lau,

²³zai ningnui lungsui ze Herui gene tewrechi lu bam lau,

²⁴zai kapelingbe benai ka’nchibe gesang gene Hera helî gene ’ndamgaibe chi heluilung karchibe ze bâ lu bam lau.

²⁵Chidaze karasa changbe ze sâu nan ze, peize ’nteumena ne mi kining’mpeu dage samsang sa ze bam lau, anui â kat-kat pum taura hang chang daseu.

²⁶Helumpum ra de lei, kane hemui gai se lau, ningnui lumpumbe luî gene peize naimik keu gai se lau,

²⁷zai diabolbe hangge pedâuyibe pei gai se lau.

²⁸Kahegabe kau je peize hega ta lau, chisuarane â, peize pechu tâtew’nrî lau, pe ba ne tâ peling tew zeu, chidezai kahegame je penui ka’nnangbe ge pa peichi le ra hangge zeu.

²⁹Peize ningnui mui gene sam kesiabe dampat se lau, kane pebâm-bâm ge sam betâu-pakezei sa lau, dezai ningnui kuâ seume hangge keyibe bam le ra hangge zeu.

³⁰Zai Hera gu Herui Ka’nchibe, chi ripatkaibe mai hangge pa gene ningnui je ’nchetkaibeipeu je pe duângga ra tew gai ze bam se lau.

³¹Peize mi lungsittewbe zai mi lumpumbe zai mi râtabe zai kakebiengbe zai saka’nsiabe ramme, zai katîmphibe ze ningnui dagene sâu kam ne zu lau,

³²zai kat-kat je hungchi ze, renuachi ze, Krista gene Hera ne ningnui je lun gai bei gum ze kat-kat je lunchi ze bam lau.