Read Zeme Naga EPHESIME 5 Bible Online

EPHESIME 5 - Zeme Naga bible

EPHESIME 5

¹Chidaze Hera helî kahelime chang ze bam lau, kehungbe name gum chang zeu.

²Zai kehungbe gene tat bam lau, Krista ne anui je hung ze anui hangge mâ-perîmyibe kela peipatbe benai Hera dage herâtewbe chang ze pe runne pechu peipat kai bei gum zeu.

³Kane hangleutewbe benai kahebâbe zat leine rasam zai kadekumbe rasam â ningnui ruage â sa de sapat kai se lau, keneime ka’nchime kejeitei zeu.

⁴Peize kahebâbe samsa zai kemiebe samsa zai ’nningkatelambe chi pakejeimakbe ramme peize bam se lau; kane chisuarane â hesuiyibe paugaibe peize bam lau.

⁵Hangleutewbe kau, kahebâbe kau, zai kadekumbe kau, (chize heraluîtewbe je kakellumbe) hangge ze Hera benai Krista gu heguangram nguaheube ga lei be chî’mmi le lau.

⁶Peize mige ne mêruang sam ramme zene ningnui je choa se lau, airamme ziegene hekuâpheumakme name peireige Hera lumpum wangchang ze bam daseu.

⁷Chidaze penui je nguaherua se lau,

⁸tingkat â ningnui kemuîbe chang ze bam lei, kane chuna â Heguangpeu gene ningnui â kebabe chang di de lei; kebabe name gum ze tat bam lau

⁹(kebabe rachî ze â keyibe leine, zai ka’nzeibe zai kapelingbe leine ge ngau lei),

¹⁰zai Heguangpeu ne ’ndaikau ka’nchâ mei be chî ra heli lau.

¹¹Kemuibe gu ’ntuachumakbe tatew ramme ge tâtewherua se lau, chisuarane â, chiramme ze hela (kebabe) ge teipat kai be lau.

¹²’Ngkim ne penui tâtewbe ramme ze â mi sa ra du ka’ngngambe chang daseu;

¹³kane kebabe zene mâ-mâ-liâpat kai bei dege â, chize ngau’nchiepuang gai di de lei, mâ-mâ ngau’nchiepuangpattibe ze â kebabe chang daseu.

¹⁴Chipauziegene, “Hei kejeibe kau gau, ’nrakchu ze kechaime dagene zuachu de lau, dezai Krista ne ningchu kebabe pei gu lei,” ze kacheu de lei.

¹⁵Chidaze ningnui kebambe tak ze pie’mmi lau, ningchingmakme gum bam mak, kane kaningchingme gum bam ze,

¹⁶pehî teichi lu zeu, beting ze sia di daseu.

¹⁷Chidaze mie ze bam se lau, kane Heguangpeu ’nningtak ze ’ndaikau mei be chî lu ze bam lau.

¹⁸Wain meneu ze bam se lau, chize â mi je puîmiebe daseu; kane Herui ne puigit ze bam lau,

¹⁹getoabeleu ramme, zai heleuyibe ramme, zai Herui leu ramme gene kat-kat je ’mpau ze ningnui lung leine ne Heguangpeu dage heleutew ze hekuâruak yibe ramme kai ze kehingbing ze bam lau,

²⁰pelua’nsangne ge benai mâgetaleine hangge anui Wangpeu Isua Krista ji gene Hera Bepeu dage hesuiyibe sam pau gai zeu.

²¹Krista ngeutewbe gene kat-kat kuâpheuchi ze bam lau.

²²Henâu changme gau, ningnui napeume kuâ pheuchi ze bam lau, Heguangpeu dage gum zeu.

²³Krista zene chi pe pum, herakiangna peî chang gum ze pe napeu ne pe nâu peî chang lei, zai pa zene pe hangge tewka’nringpeu de lei.

²⁴Hera kiangna ne Krista kuâ kangge bam gum ze peize henâu changme ramme ne du getaleine ge penui napeu kuâ kangge bam lau.

²⁵Hêpeume nung gau, ningnui nâu ramme je hungchi lau, Krista ne herakiangna je hung ze pe runne pe pum herakiangna hangge peipat kai bei gum zeu,

²⁶dezai hedui ne pechu hui’nchi gai lu dezai sam ne pechu tew’nchi gai ze, pa ne pechu tew’nchi gai be ra hangge zeu,

²⁷chidezai bekiê mei kaherutbe mei aigum mâ-mâ heziâk bambe mâ de ga ze pa ne pe runne pechu herakiangna ge pengêudibe gene peipat kai le ra hangge zeu, dezai pa (herakiangna) ze heziâkga ze ka’nchibe chang le ra hangge zeu.

²⁸Chigumbe ne hêpeume ramme ne penui nâu ramme je penui pum je gum ze hung ra de lei.

²⁹Mige ne mâdau de pe pum je ngaugailak ze bam me lei, kane Krista ne herakiangna peireige tâtew gum ze, chize tew ze ring ra tinggeu ze reî’mmi ze bam lei,

³⁰anui ze â pe pumtaura ramme changbe ziegeneu.

³¹“Aipauziegene ’mpeumi â pe pui benai pe peu je sâu nan ze pe nâu dage herua gai de ra lei, hangna ze kat chang gai ra lei,” kacheu de lei.

³²Aize ’nningchilakbe kedibe lei, zai I ne aize Krista benai herakiangna je rangbe hangge tei gai lei;

³³acheuleusedu, peize ningnui ruage mi-mige ne pe runne pechu hung gum ze pe nâu je hungchi ze bam lau, zai pe nâu ne du peize pa pe napeu ngeutewchi ze bambe ze chî bam lau.