Read Zeme Naga EPHESIME 6 Bible Online

EPHESIME 6 - Zeme Naga bible

EPHESIME 6

¹Napoine ramme gau, Heguangpeu gene ningnui pui-peu kuâpheu ze bam lau, aize ka’nzeibe daseu.

²“Ning pui ning peu ngeutew lau,” (aize samhatkaibe hingde raîlangbe ze de lei),

³“chidezai ning hangge yi gu, zai kedeirei ge nang ringtie gu lei,” kacheu de lei.

⁴Hêpeume gau, ningnui name lumpum tew se lau, kane Heguangpeu gu besie geteiliabe benai mâ-geteiliabe gene penui je nguachîngchu gai lau.

⁵Kebangme gau, helungsuikat pung ze Krista kuâpheube gum ze, hingkedun ze kedeirei ge ningnui paume kuâ pheuchi ze bam lau;

⁶ziemmename suigut tewchime gum ze hemikngau hang tewbe lam gene makse, kane Krista guâ ka’ngguame chang ze lungsang gene Hera ’nning tew ze,

⁷Heguangpeu benai ziemmename hangge gum ze helungyibe ne ’nggua ze,

⁸pa ze kebang chang lêuzai, chang mak lêuzai, mi-mige tâ-yibe tewbe kau je Heguangpeu dagene pa tewgai’ndibe ze ngau dai gu lei be chî lu zeu.

⁹Pa’mpau changme gau, penui dage chipau luirun ze tew lau, penui benai ningnui ’mpaupeu ze tinggîm ge la lei be benai pe dage â kehung-ka’nrie ga lei be chî lu ze renuakeu ze bam lau.

¹⁰Nâlangbe ge Heguangpeu benai pe gu tâtewchibe peranchibe gene ningnui ranchi ze bam lau.

¹¹Hera gu hereipuâ kai’nsang le lau, chidezai diabolbe gu ningching kesiabe ramme je ningnui saptingkangchi le ra hangge zeu.

¹²Anui â hemei-hejaipum dage ka’nggibe mak lei, kane samramme rezieteime, reziechibe ramme, chuna kemuîbe ting gu kedeirei samramme, tinggîm bâm ramme ge herui kesiabe ramme je ka’nggi daseu.

¹³Chidaze Hera gu hereipuâ leine tei’nsang le lau, dezai tingnaimikpui siabe mai ge ningnui sapgimchi le ra, zai ’nggi kam lu ze sappat le ra hangge zeu.

¹⁴Chidaze samsang ne ningnui kia ge kak kai lu, zai kapelingbe gachûp chup kai lu,

¹⁵zai desieyibe gu gospel ne ningnui pîchûp hang rua gai lu ze sap lau;

¹⁶chipau peireige keneibe gu hinggei tei lu zeu, chize ne kesiapeu gu hemigetaube hetu giwangbe ramme ze ningnui tew’mmit dui lei.

¹⁷Zai tewka’nringbe gu peichûp benai herui gu hiazutkie, chi Hera sam ze tei le lau.

¹⁸Pehî ’nsangne ge Herui gene kellum bam lau, kie ze kiâm zeu. Lungsangsing ne piekua’mmi ze bam lau, keneime ka’nchime leine hangge kellum ze kiegaihâ zeu,

¹⁹zai a hangge kellum ze kiegaihâ bam lau, dezai gospel gu chîchanglakbe sam ze kuugiereu ze pau gai ra sapatbe ge sachibe achu pei gai be ra,

²⁰chipau hangge I hegeî’ngkap ’nta ze pemuipuapeu chang daseu; I salia ra changbe luigum ze kuugiereu ze salia’nchichiak kai le ra hangge zeu.

²¹Chunage I ’ndaigum bam mei zai ’ndaikau tâ tew ze bam mei be ningnui du chî dui de lei, Heguangpeu gene mi puina kehungpeu zai lungsang gene tâka’ngguapeu, Tukikasbe ne ningnui je mâgetaleine salia kam gai gu lei.

²²Aipau deu singbe hanggene pechu ningnui dage I lang gai de lei, chidezai anui ’ndaigum bam mei be ningnui chî le ra, zai pa ne ningnui je gecheu’nrak kai be ra hangge zeu.

²³Mi puiname dage peize desieyibe bam lau, zai Hera Bepeu zai Heguang Isua Krista dagene peize keneibe ge kehungbe bam lau.

²⁴Anui Wangpeu Isua Krista je chaidailakbe kehungbe zene hung ze bamme leine dage peize ka’nggiabe bam lau.