Read Zeme Naga PHILIPPIME 2 Bible Online

PHILIPPIME 2 - Zeme Naga bible

PHILIPPIME 2

¹Chidaze, Krista gene helungtew’ndigaibe mei, kehungbe ne tewhegeikatenaibe mei, Herui gene tâtewkaheruabe mei, ka’nggiabe benai ngauka’nggiabe mei ze bam dizaine â,

²helungsui kat pung ze kehungbe lungsui kat ne a suigut tew’nsang gai lau.

³Katekumbe ne mei, nune ’ntane kakengangbe ne mei mâ de tew se lau, kane kecheiluilungpungbe ne, mi sua â miramme â yi-ka’nteube hang chak kai lu ze tâtew lau.

⁴Ningnui mi-mige de peize pa keneibe hang runne peu se lau, kane miramme keneibe hang du peize peu lau.

⁵Krista Isua ge aipau lungtak bambe ze ningnui ruage du peize bam lau,

⁶chi Hera luilung tak pe dage bam sedu, mâ-mâ lurabe ge Hera benai ka’nsambe hangge pechu chak kai mak,

⁷kane ziemmena luilungtak gumbe gene lungkeugaibeibe chang ze pe runne pechu tew’nrua lu ka’ngguapeu luilung pung ze bambepeu zeu.

⁸Zai ziemmena luilungtak gene pechu â ngau gai ze pe runne pechu tew’ncheikeu ze chairabe riâ chang ze hekuâpheu gai de lei, heling ge kechaibe chang zeu.

⁹Chipauziegene Hera ne pechu teichu’ngngutau gai ze heji leine peireige bambe heji ze pechu pei gai bei de lei,

¹⁰chidezai ting benai kedei ge zai kedei gene ’ngkang ’mbe bamme ne Isua ji ge kukdungkeu kam gai ra,

¹¹zai Hera Bepeu ngeudibe hangge heleiria leine ne Isua Krista â Heguang lei be ze sapat kam gai ra hangge zeu.

¹²Chidaze a puina kehungme gau, pehî’nsangne ge ningnui hekuâpheu ze bam gum ze, chunage I bamgaibe luage runne makse kane I gabe luage du hingkedun ze ringrabe hang tâtew zu lau;

¹³Hera â pe suigut hangge ningnui je tew’ngngup kai ra, zai tewgaihâ ra ningnui ge tâtew la daseu.

¹⁴Mâleine ge heladkiebe benai katingchiambe ga ze tâtew bam lau.

¹⁵Chidezai ningnui ne kedeirei ge keba chang ze kebabe ramme gum ze bambeime ruage ningnui zene ka’ngkuime benai helungriaksiame zuilung ge mâ de heziâk ga ze Hera name chang ze hetiâkgame benai kesiazaîgame chang le ra hangge zeu,

¹⁶keringbe sam tei’ntip lu zeu, chidezai Krista gu tingnaimikpui ge chi I ne ’ntane pakmakbe zai tâtewhereugaimakbe ga ze I a ’nrîmyi bam le ra hangge zeu.

¹⁷Ningnui keneibe gu herâtewbe peipatbe ge herâtewbe ge wain ruîpatkaibe gum ze achu ruîpat kai bei sedu I â a suiyi lei, zai ningnui haimena dage a suiyi’nta lei.

¹⁸Chigum ze ningnui du ningnui suiyi gu, zai achu ningnui suiyigaihâ gu lei.

¹⁹Timothibe je I ne ningnui dage lang gai kelua ra Heguang Isua gene I kaheguî de lei, chidezai ningnui rasam ne a lung tew’ndi gai be ra hangge zeu.

²⁰Ningnui deu hangge lungsang pei gai ze ’nninghereugaihâ ra a dage pa gumbe kau mî de ga lei.

²¹Penui ’nning tew ra runne peu kam di lei, Isua Krista hang tew mak zeu.

²²Kane Timothibe dage pemîhungbe bambe ze ningnui chî lei, pe na ne pe peu dage gum ze pa ne achu gospel tâ ge ngua’ngguagaibe tak zeu.

²³Chipauziegene a dage ’ndaigum chang gu mei be I chîgap dezai pechu I lang gai ra ka’nning de lei,

²⁴zai I sing ne mâtiemak ze wang gai ra du Heguangpeu gene I ’nnum’mmi lei.

²⁵Achu nguatâtewpeu zai I benai ngua-sipaitewpeu, zai ningnui gu hepâusampaupeu zai a lângtewpeu, chi a kinapeu Epaphroditasbe je ningnui dage lang gai ra ’nnang de lei be ze I ’nning gai de lei,

²⁶pa ne ningnui je ngau gai nei-desang ze bam, zai pa ka’nrâbe rasam ningnui seuchangdibe ziegene pa ne pe suîhereu ze bam dadegeu.

²⁷Pa ’nrâ ze chaitena gai de lei. Kane Hera ne pechu ngau’nggia gai bei de lei, zai pe peireige runne makse a peireige du ’nggia gai bei de lei, makchai â I a suisiasau ta di gai gu dadegeu.

²⁸Chipauziegene I ne pechu lang gai nei-ka’nteu de lei, chidezai ningnui ne pechu ngaugaikadaibe ge ningnui suiyi’nta ze bam ra, zai I ne ’nninghereu-desang ta de ra hangge zeu.

²⁹Chidaze Heguangpeu gene mi suigut ne ningnui pechu ’nchâ lau; zai aigumbe kau je hengêutew lau.

³⁰Krista gu tâ hanggene ningnui ne achu ’ngguarabe ze pa ne tewpui gai ra pe pum keringbe hang hing mak ze chaitena gai ’ndi daseu.