Read Zeme Naga PHILIPPIME 3 Bible Online

PHILIPPIME 3 - Zeme Naga bible

PHILIPPIME 3

¹Nâlangbe ge a puiname gau, Heguangpeu ge ningnui suiyi’nta lau. Tingtie ge I rawgai’ndibe ramme raw gai dai ra, a hangge kahereube mâ de ga lei, chize ningnui hangge kegiebe de lei.

²Hetei ramme je pie’mmi lau, tâ-kesiatewme je pie’mmi lau, hemeipum ze rumkagetieme je pie’mmi lau.

³Anui â gesang ne rumkagetanme, Herui gene Hera je kakellumme, zai Krista Isua gene mi ngêudi ze bamme zai hemeipumsie ge ’nnum’mmimakme bau daseu.

⁴I ne hemeipumsie ge ’nnum’mmi ra a dage pedeu bam lêuzaidu zeu. Mige ne hemeipumsie peireige ’nnum’mmi ra pe dage pedeu la lei acheu dizai â chize a dagene â kie’nteu ze la lei:

⁵padesatbe mai ge rumkagetan de lei, Israelme dagene patbe, Benjamin zat gene patbe, Hebraime ne lungkeube Hebrai’mpeu de lei; hingde lam ge Pharisai’mpeu,

⁶herakiangna je tewsâneilangpeu, hingde kangge katelingbe lam ge hetiâkgapeu de lei.

⁷Kane a dage kegiebe ngaube leine ze Krista hang ziegene kagekumbe hangge I ne chak kai de lei.

⁸A Wangpeu Krista Isua je gechîbe ze â yi’nteudibe ziegene I ne mâgetaleine ze kagekumbe hang chak kai de lei. Pe hang ziegene mâ-leine ze a hangge gekumgaidibe ze I lie de lei, zai Krista je lutâulerabe hanggene

⁹zai hingde gene pie ze a gu katelingbe gabe pa gene ngau le ra, kane Hera dagene kapelingbe, chi keneibe gene changbe, Krista gene keneibe gezene pa gene ngau le ra hangge zeu;

¹⁰chidezai pa benai pa kechaibe gene chukadaibe gu tâtewchibe ze chî le ra, zai pa kechaibe ge pa gum chang ze pa kahereube ngualiegaihâ ra hengge zeu,

¹¹chize changdui bei zai â kechaibe gene ringchukadaibe I ngau le ra hangge zeu.

¹²I ne aize lutau de lei, kacheube mak lei, makchai kenû gene ’nsang lu de lei, kacheube mak lei; kane chize a hangge chang ra I ran ze tewtat ze bam lei, Krista Isua ne achu pe hangge tew gai ’ndi dadegeu.

¹³Mi puiname gau, chize I ne a hangge teleugai’ndibe hangge ’nning gai me lei; kane kat I tew lei, hechai ’mbe mâ-bambe je ’ngngaî nan ze hesua ge bambe lam’mbe rankai ze tewtat lei,

¹⁴Krista Isua gene, kehu ’mbe Hera ne gekûbe gu getoabehi ngau ra hengamki lam’mbe I ran ze tewtat bam lei.

¹⁵Anui mi suî-tingdime â peize aigum ze ’nning’nchuak kai zu lau; zai ningnui ne mâ-mâ ge kêdabe ’nning’nchuak tizai â, chize du Hera ne ningnui je liâ’nchiepuang gai gu lei.

¹⁶Anui ngaulube ze anui tei’mmi ze tei kei lei.

¹⁷Mi puiname nung gau, I tewbe ge a tak tewheli zu lau, zai anui ruage aigum ze lungbe kau ningnui heli ze suirabe ziemmena zat je ’nchetchi le lau.

¹⁸Misonggame, Krista gu heling teureime chang ze bamme rasam ningnui je I saliabambe chunage du a mikdui pat ze ningnui je salia lei.

¹⁹Penui hangge hetûn ze â gagairabe ze de lei, penui gu hera ze â penui bungpui ze de lei; zai penui hang ka’ngngambe ge penui ’nrîmyi ze bam lei; kedeirei gu mâ-mâ zat ge penui lung kai lu zeu.

²⁰Kane anui â tinggîm name de lei, chilia ’mbene Heguang Isua Krista, Ripatpeu je anui kuâ bam lei,

²¹pe kangge mâ-leine kaikamgaichi le ra pechu tewgaibe chi tâtewchibe rezie zene anui pum ka’nchiapbe pum ge pe pum pengêudibe pum gum ze chang ra tewkeligairapeu jeu.