Read Zeme Naga PHILIPPIME 4 Bible Online

PHILIPPIME 4 - Zeme Naga bible

PHILIPPIME 4

¹Chidaze a puiname gau, I ne hung ze ngaunei ze bamme, a suigutchangme, zai a gu kraun changme gau, aigum ze Heguangpeu gene sap’ntiprip ze bam lau, I kehungme gau.

²Eu-odiale benai Sintukile je Heguangpeu dage hezuâgit bam ra I kiâm lei.

³Zai I benai guangkâm nguapungpeu nang du ai ’mpuimi hangna je ’ngngâ gai lau, Klemenbe benai achu nguatâtewme kêdadame, keringbe leisikuak ge penui ji bamme je ngua lu gospel tâ ge penai zene a meri kena chang ze achu nguatatew ze bam bei daseu.

⁴Pehî’nsangne ge Heguangpeu dage hesuiyi’nta ze bam lau; I sachu dai gu lei, hesuiyi’nta ze bam lau.

⁵Ningnui gesutchibe tak ze peize haimena ne chî le lau. Heguangpeu â na de lei.

⁶Mâ-mâ deu hangge ’nninghereu se lau, kane mâgetaleine ge kakellumbe ne kiegut ze, hesuiyibe sam pauliâ gai ze, ningnui gekiebe ramme Hera dage peize chang gai be lau.

⁷Zai Hera gu desieyibe chi ’nningchanglakbe zene Krista Isua gene ningnui lung benai ningnui ka’nningbe reî ze bam gu lei.

⁸Nâlangbe ge a puiname gau, kagesangbe leine, pengêudibe leine, kapelingbe leine, ka’nchibe leine, ngauyibe leine, ka’nggiabe leine, yilangbe lazai â, getoabe pei kakezeibe lazai â, airamme ze ’nning gai ni lau.

⁹A dagene ningnui chîlube zai luteilube zai seulube zai ngaulube ze tew zu lau; dezai desieyibe Hera ne ningnui dage bam bam gu lei.

¹⁰Ningnui ne chunage nâlangbe ge a hangge ’nningtinggeuchu dai bei ze Heguangpeu dagene I a suiyi-kadesang lei; ningnui ne a hangge ’nninghereu ze bam kam de lei, kane ningnui hangge pedâuyibe ngau mak lei.

¹¹I ’nggiâkia ze bambe ziegene katingchiambe mak lei; I ’ndaigum ze bam mei, bam-bambe tak ge a lungwângchang ze bam ra I getei lu de lei.

¹²Helêukeurabe tak I chî, zai puiting bamrabe tak I chî lei; mâ-mâ ge benai ’ndaikau-kau ge puiting ze bamrabe benai ’njei ze bamrabe, danggit bamrabe benai ga ze hereu ze bamrabe daube ge liechirabe tak getei lu de lei.

¹³Achu a rantew’nchigaipeu dagene I mâ leine tew kam dui lei.

¹⁴Acheusedu, I kahereube ge ningnui ne a hereuliegaihâ bei ze yi-desang de lei.

¹⁵Zai I gospel rasam pauchuraibe ting I ne Makedonia sâu’ndibe luage, ningnui runne zangno, herakiangname mî de mâ-gepeibe lam ge benai kelube lam ge achu nguatatewherua mak lei be ningnui Philippime ne chî lei;

¹⁶Thessalonika ge du ningnui ne achu mâ-ka’ngngâbe lang-gai’nsui bam bei de lei.

¹⁷Kela ngau ra I peube mak lei, kane ningnui ji yibi-bi bam ra tâtewbe rachî hangge I peu lei.

¹⁸Pei’nsangsiakkaibe, zai bepeirei du peisuâgaibe I ne ngau lu de lei; Hera hangge ka’nchâbe benai hesuiyibe herâtewbe, mâ perîmyibe kela peipatbe ningnui langgaibe ze Epaphroditasbe dagene I chuna ngau lu ze a lungwângchang-desang de lei.

¹⁹Zai a Rapeu ne ningnui ka’nnangbe leine, Krista Isua gene pa pe pengêudi ze puigit bambe luigum ze ningnui je pa ne pei kam gai gu lei.

²⁰Anui Rapeu benai anui Peu dage betingbeta peize pengêudi ze bam lau. Amen.

²¹Krista Isua ge keneime ka’nchime je rechâ ze bam lau. A dage mi puiname bamme ne ningnui je rechâ de lei.

²²Keneime ka’nchime leine ne, zai Kaisarbe kiduîme ne du ningnui je rechâ de lei.

²³Heguang Isua Krista ka’nggiabe ze ningnui dage peize bam bam lau.