Read Zeme Naga KOLOSAME 1 Bible Online

KOLOSAME 1 - Zeme Naga bible

KOLOSAME 1

¹Paulbe, Hera ’nning gene Krista Isua gu apostol’mpeu, zai anui puina’mpeu Timothibe ne

²Kolossa ge Krista gene keneime ka’nchime benai mi puina lungsangtewme dage, Hera anui Peu dagene ka’nggiabe benai desieyibe ningnui dage peize bam lau.

³Ningnui hangge anui kellum gai dege, anui Wang Isua Krista Peu, Hera dage anui suiyi-desang ze bam bam de lei,

⁴Krista Isua ge ningnui keneibe bambe benai keneime ka’nchime leine je ningnui ne hung ze bambe rasam anui ne seulube,

⁵zai ningnui hangge tinggîm ge heguîrabe kaigekuagai’ndibe ziegeneu. Samsang sam, chi gospel gene besua’ngka gene aize ningnui seu lu de lei

⁶chi ningnui dage wangchang gai ze bambe ze, kedeirei leine ge perachî ’nchi ze chîngchu ze bambe luigum ze—ningnui ruage du samsang gene Hera ka’nggiabe seuchang ze chîdibe mai geneu,

⁷chize anui nguaka’ngguapeu, anui kehungpeu Epaphrasbe dagene ningnui chilube luigum zeu. Pa â anui kelei ge Krista gu lungsangtewpeu tâka’ngguapeu ka’nchipeu de lei,

⁸zai pa ne Herui gene ningnui kehungbe tak ze anui je chiliâ gai bei de lei.

⁹Zai chigum ze, chize anui seube mai gene, ningnui hangge anui ne kellumsau ta di ze bam de lei, Herui ningching benai mâ-gechîbe leine ge ningnui dage pa ’nningtak gechîbe ze puigit bam le ra kie ze,

¹⁰pe dage hesuiyibe ne puigit lu ze tâ-keyibe tewbe leine ge perachî ’nchi ze Hera je gechîbe pungbi-bi ze Heguangpeu ’nning ge ring ze bam le ra hangge zeu.

¹¹Pe gu pengêudibe tâtewchibe bambe luigum ze tâtewchibe reziechibe leine zene, hesuiyibe gene gesutchibe benai liechibe leine hangge peize ningnui ran tew’nchi gai be lau,

¹²keneime ka’nchime kebabe ge nguaheube ge anui nguaheu le ra kebuibe hang anui je tewgaipeu, Bepeu dage hesuiyibe sam pau gai zeu.

¹³Pa ne anui je kemuîbe gezene kaheguangbe gene lupat kai lu ze pe Na hunglangpeu gu heguangram ge anui je nguapat kai bei de lei,

¹⁴chi pe dagene ripatkaibe, hemui kelunbe anui ngaupeu zeu.

¹⁵Pa â mi ngauchilakbe Hera, Hera luî chang lei, mâ-’ndamgaibe ramme leine ruage lungkeuraîlangbe lei;

¹⁶ting benai kedei ge mâgetaleine pa gezene ’ndam gai lei, ngauchiduibe benai ngauchilakbe, heguang-bâm ramme mei, nune kaheguangbe ramme mei, nune samrambe ramme mei, nune rezieteibe ramme mei—mâgetaleine ze pa gezene zai pe hanggene ’ndam kam gai de lei.

¹⁷Pa â mâgetaleine sua ’mbe bam lei, zai pa gene mâgetaleine heruagit ze bam lei.

¹⁸Pa â herakiangna peî lei; chi herakiangna zene hepum changbe zeu; pa ze bepîbang de lei, chaidime ruagene lungkeuraibe zeu, dezai getaleine ruage pa ne yilangbe chang le ra hangge zeu.

¹⁹Pa (Krista) ge Hera kaherâbe leine puigit ze bam ra, Hera ne pe suiyi de lei,

²⁰zai pe dagezene, kedei ge lêuzai tinggîm ge lêuzai, mâgetaleine Hera ge nguadesieyibe tew kam gai nei di daseu, pe gu heling jai ne desieyibe tew gai zeu.

²¹Zai tingkat â ningnui tâ-kesiabe ramme tew ze, helung gene ’mpaktime zai ’nggi ze bamdime,

²²pa ne ningnui je pe gu hemeipum ge pa kechaibe zene chunage nguadesieyibe tew gai bei de lei, ningnui je ’nchi ze, zai heziâkga ze, zai saka’nsiabe ga ze pe masuage peipat kai le ra hangge zeu,

²³keneibe ge ’ngngai mak ze ’ntiprip ze bam ze, tingkehube kangge mâ-keringbe ’ndamgaibe zat leine dage paugaibe, chi ningnui ne seube gospel gu kaheguîbe, I, Paulbe ne chipau hangge ka’ngguapeu changbe, chigene (ningnui lung) puakeli mak dizai aî.

²⁴Chunage I hereulie ze bambe ge ningnui hang ziegene a suiyi’nta ze bam lei, zai herakiangna, chi pe pum hang ziegene Krista gu kahereube liebe ramme ’nsangmak-bambe ge I ne a pum gene tew’nsang gai de lei,

²⁵chi Hera gu sam chiliâ’nchichiak kai ra hangge ningnui hangge achu peigaibe chi Hera tatew luigum ze, chipau hangge I ne ka’ngguapeu changdibe,

²⁶rehei ne rehei tattibe ge chîchanglakbe baigai’ndibe ze chuna â pe gu keneime ka’nchime dage liâgai’ndibe zeu.

²⁷Pengeudibe kaheguîbe, chi Krista ningnui dage bambe, ai ’nningchanglakbe pengêudibe heurâ ramme Jentailme ruage suang ze bambe ze chiliâ gai ra Hera ne penui (keneime ka’nchime) je kelâng gai bei de lei.

²⁸Ziemmena leine je anui ne Krista gene besingdibe kau chang ze peipat kai le ra hangge ziemmena leine je kaningchingbe ’mpuî leine gene ’ntîng ra ranglia zai geteilia ze pe rasam anui ne pau de lei.

²⁹Heran kebambe leine ne, chi pa ne a lungge gecheu’nrak-kaibeibe zene, aipau hangge I ne ran ze tâtewhereu-desang ze bam lei.