Read Zeme Naga KOLOSAME 2 Bible Online

KOLOSAME 2 - Zeme Naga bible

KOLOSAME 2

¹Ningnui benai Lodikia ge bamme, zai a ju ngaumakme leine hangge ’ndaizeuge I ne a laîkai ze tâtew-kadesang mei be ningnui chî ra I lunei lei,

²chidezai mâ-chîdiadibe ramme benai Hera gu ningchanglakbe gechîbe (chi Krista) ze ngau le ra penui je kehungbe zene piherua gai bei ze bambe luigum ze penui lunggecheu’nrak kai be ra hangge zeu,

³pe dage kaningchingbe benai mâ-gechîbe heurâ leine baigai’ndipeu dageneu.

⁴Mi-mige ne ningnui je damkemak ze nguamie mak ra aize I ne salia lei.

⁵Ningnui ruage I a pum sing ne bam mak leusedu Herui gene ningnui ruage I bam lei, ningnui bamchi ze bambe zai Krista ge ningnui keneibe ’ntiprip ze bambe ngau lu I a suiyi-desang ze la daseu.

⁶Chidaze Krista Isua Heguangpeu je ningnui ne lutâulube luigum ze, chigum pa ge bam bam ra de lei.

⁷Ningnui je geteiliabeibe luigum, hesuiyibe paukam lak bambe luigum, pa gene ningnui materinghi ze tew’nsapchu ze, zai keneibe ge tew’ntip zeu.

⁸Krista gu gum mak ze, ziemmena gu mâ-sie teipelakeube luî gene, kedeirei ge rezie bambe herui gu luî gene, mi-mige ne kaningchingbe tak benai deuzie kuâ zene ningnui je nîmteurabe je ’ntîng le lau.

⁹Pa ge hemeipum sing ge kaherâbe luilungtak ze ’nsangsiakbe bam,

¹⁰zai samrambe benai rezieteibe leine gu bepeî changbe, pa gene ningnui keringbe luilung ze ’nsangsiak kai di daseu.

¹¹Rumkagetanbe mi ba ne tewmakbe zene ningnui je du pa ne rumgetan gai bei de lei, Krista ne rumkagetanbe tewbe ge hemeipumsie ze tei’mbiagaibe zeneu;

¹²zai baptistewbe gene ningnui je â pe dage nguabai’mpam gai bei de lei, pechu kechaibe gene nguakuakchugaipeu, Hera tatew gene keneibe gezene chigene ningnui je pe dage nguakuakchu ’mpam gai bei de lei.

¹³Zai Tâ-kesiabe tewbe ramme benai ningnui pum rumgetanmakbe gene ningnui chaidime, ningnui je Hera ne pe dage nguatew’nring gai bei de lei, anui gu tâ-kesiabe tewbe ramme leine anui je lun gai ze,

¹⁴besie ka’nzeibe gene kebang ge (hingde gene) chui gai ra anui hangge bamkuâdibe ze tew’ngga gai lu zeu; chize heling ge gia gai ze pa ne tei’mbia gai de lei.

¹⁵Pa ne samrambe benai tâtewchibe rezie ramme lutua nan ze, pa gene penui je ngam lu ze penui je haimena ne ngaurabe hangge tew gai bei de lei.

¹⁶Chidaze ningnui keteu-kesakbe deu ge mei, nune kahengîbe ge mei, nune keuhâ ngaube ge mei, nune ’ntak mai ge mei ze mige ne ningnui je peize samram se lau.

¹⁷Airamme â mâ-wangchangrabe gu kezui runne rei lei; bekau gesang â Krista gu lei.

¹⁸Peize mi-mige ne ningnui je mi runne mi je tew’ncheikeube ge benai angelme je kakellumbe ge keliâbe gene tâtewbe hangge ’ndam ze, ’nchi-chine lang ze ningnui ngêu tew’ngga ze bam ra pei se lau, deuzie gene pa ze â pa ’nrîmyine ze,

¹⁹zai chi Bepeî changbe, chigene mi pum pelane hangge hejai sagi ze mi riâ ramme benai mi’nnaria ka’nniebe ramme gîngherua ze bambe chi hepum je teichingchube, Hera je ’nggui’ntip mak ze bambe zeu.

²⁰Ningnui ze kedeirei samrambe herui ramme ge, Krista dage nguachai gai ’ndizai ’ndaitew ze kedeirei gu changbambe luilung gum ze lung ze bam rei lau? Hingdetewgaibe ramme

²¹“Tei se lau, ’Ndâu se lau, Deîtau se lau,” kacheube ge ’ndaitew ze ningnui pheu gai ze bam lau,

²²(luakat tâtew gai dezai siakamgaiderabe je rangbe), ziemmena ne mâ-geteiliabe benai keneibe-sie geteiliabe lam gene changbe zeu?

²³Kakellumbe zai mi runne mi je tew’ncheikeube, zai mi pum je dei’nchuk ze tewhereugaibe, airamme tei’nchukduk ze teibe geze mâ-keyibe kaningchingbe tak teiliabe run de lei, kane chiramme ze hemeipumsie ge ketakedau lung mak ra tâtewbe pegiê hangge â mâ de ga lei.