Read Zeme Naga KOLOSAME 3 Bible Online

KOLOSAME 3 - Zeme Naga bible

KOLOSAME 3

¹Krista dage ningnui je nguakuakchu’mpam gai bei zai â, kehu ’mbe, Krista bambe bâm ge Hera hezat’mbia ’ntau ze bambe ramme je ningnui peu lau.

²Kehu ’mbe bambe zat ramme peireige ningnui lung kai lau, kedei ge bambe zat ramme peireige mak zeu.

³Ningnui chai di de lei, zai ningnui keringbe â Krista dage Hera gene gekâm gai ze la daseu.

⁴Krista, anui keringbe bangpui ze liâ gai dezai, anui du pengêudibe gene pe dage liâ’mpam gu lei.

⁵Chidaze ningnui dage kedeirei luilungtak bambe ramme ze tewchat kai ne lau: hangleutewbe, kahebâbe, gesutchilakbe, kesiabe ka’nchâbe, zai kadekumbe, chi heraluîtewbe je kakellumbe ramme zeu.

⁶Airamme ziegene Hera lumpum wangchangzi gu de lei.

⁷Chiramme ge ningnui lung ze bambe ting luakat â chiramme ge tat kai di de lei.

⁸Kane chuna â chiramme ze tuâ kam ne zu lau: helumpumbe, mi râtabe, katîmphibe, saka’nsiabe, zai ningnui mui gene kemak-makbe dampatbe tak ramme zeu.

⁹Kat kat je karasa sa se lau, perie luilung tak ze â chi perie tatew benai tuâ ’nde lei be

¹⁰zai karchibe luilungtak zene bâ gai ’nde lei be chî lu zeu, chipau hangge ’ndamgaipeu ju luî bambe tak gechîbe gene tewrechigai’ndibe zeu.

¹¹Chigeze Jentailme, Judame, rumkagetanme benai rumgetanmakme, kelungbe tak chimakme, Skutiame, kebang ge bamme benai lungzeune-tewme, bam-daichi lak te lei, kane Krista ne mâgetaleine hang zai mâgetaleine ge bam di de lei.

¹²Hera gu kelânglume, ka’nchime zai kehungme changdibe luigum ze, ngau’nggiachi, ’nggiachi, helungyi, kecheiluilungpungchi, zai liechi,

¹³kat kat je gesutchi ze bam lau, zai hangkat ne hangkat je ki’nrui dizai â kat-kat je lunchibe lungtak zene bâ gai lu ze bam lau; Heguangpeu ne ningnui je lun gai bei gum ze ningnui du lûn sing ra lei.

¹⁴Zai airamme leine peireige kehungbe ne bâ gai lau, chi yiheluagitbe gene mâgetaleine teikaheluabe zeu.

¹⁵Zai peize Krista gu desieyibe ne ningnui lungge samram ze bam lau, chipau hanggene hepum kat ge ningnui je kû gai lei. Zai hesuiyi-desang ze bam lau.

¹⁶Kaningchingbe ’mpuî gene ningnui ne kat-kat je mâ-getei ze mâ-rang-gai’mmi ze bambe gum, zai Hera dage getoabe ramme, zai heleuyibe ramme, zai Herui leu ramme ne heleutew ze ningnui lungge hesuiyibe ne pui ze bam gum ze peize Krista gu sam zene ningnui lungge pui ze bam lau.

¹⁷Zai ningnui tâtewbe leine, sam gene mei, tâ gene mei, Heguang Isua ji gene mâgetaleine tew ze bam lau, pa gezene Hera Bepeu dage hesuiyibe sam pau gai zeu.

¹⁸Henâu changme gau, ningnui napeu kuâ kangge bamchi lau, chize â Heguangpeu gene betâu sing daseu.

¹⁹Hêpeume gau, ningnui nâu ramme je hungchi lau, zai penui dage hengirang ze bam se lau.

²⁰Hename gau, mâgetaleine ge ningnui pui-peu kuâpheuchi ze bam lau, aize ne Tingwang suitewka’mmi daseu.

²¹Hêpeume gau, ningnui name lumpumtew se lau, penui lung tew’nchei nan ta du lei.

²²Kebangme gau, mâgetaleine ge kedeirei ge ningnui hangge besuitewme leine kuâpheu ze bam lau, ziemmename toa tewchime gum ze, ngaurabe hanggene mak zeu, kane Heguangpeu je hingchi ze lungkat ne tew lau.

²³Ningnui tâtewbe leine ge ziemmena hanggene tewbe gum tew makse, Tingwang hanggene tewbe chang ze, lungsang sing ne tew lau,

²⁴ningnui hî hang gum ze Heguangpeu dagene nguaheurabe ngau gu lei be chî lu zeu; ningnui â Heguang Krista guâ ka’nggua lei.

²⁵Tâ-kesiabe tewbe kau hangge pa tâ-kesiabe tewgai’ndibe hî hangge pei gai dai bu lei, zai chige kehung-ka’nrie ga lei.