Read Zeme Naga KOLOSAME 4 Bible Online

KOLOSAME 4 - Zeme Naga bible

KOLOSAME 4

¹Pa’mpau changme gau, ningnui gu kebangme peireige peling benai ringgang gene tâtew lau, ningnui hang du besuitewpeu tinggîm ge la lei be chî lu zeu.

²Kakellumbe ramme tei’ntiprip ze bam bam lau, hesuiyibe sam pau gai ze kuâ’mmi zeu;

³zai anui hangge du kellumgaihâ bam lau, dezai Krista gu hekimsam ze rangba gai ra, Hera ne chi sam hangge ze anui je kedeireime hangge peize ’ngkam lat kai ra hangge zeu, chipau tâ hanggene I kebangki ge bam de lei,

⁴chidezai I ne sarabe ze salia’nchi le ra hangge zeu.

⁵Pedâuyibe ningnui ngaube leine ze tei’mmi lu ze, neimakme (hela ge bamme) dage ningching ze tâtew-’mmi lau,

⁶ningnui samsabe ze pehî’nsangne ge keyibe ne peize pui bam lau, beting-ting hangge betâu-pakezei pie zeu, chidezai ningnui ne haimena dage samkakrabe tak hang chî le ra hangge zeu.

⁷Tukikasbe ne ningnui je a rasam ramme leine salia gu lei; pa ze â Heguangpeu gene mi puina kehungpeu zai lungsang ne tâtewpeu zai I benai nguatâtewpeu de lei.

⁸Aipau tâudeu singbe hanggene I ne pechu ningnui dage lang gai de lei, chidezai anui ’ndaigum la mei be ningnui ne chî le ra, zai pa ne ningnui lunggecheu’nrak kai le ra hangge zeu,

⁹ningnui ruage hangkat Onesimasbe, lungsangtewpeu, mi puina kehungpeu je ngua lu wang zeu. Penai ne aige mâ-mâ-wangchangbe rasam leine ningnui je salia gu lei.

¹⁰Aristarkasbe, I benai kebangki ge bambepeu ne ningnui je rechâ gai de lei, zai Markabe Barnabasbe makpeu (chi pechu ’ngguarabe tak geteiliagaipeu sam ningnui ngaube chipaupeu—pa ne ningnui dage zuamie dizai â, pechu ’nchâ lau),

¹¹zai Justasbe, acheu ze kubepeu Joshua ne du ningnui je rechâ gai lei. Hera gu Heguangram hangge rumkagetanme (Judame) a dage nguatâtewme â aime hangchum runne de lei, zai penui ne achu nguapuîlum bam de lei.

¹²Ningnui ruage hangkat Epaphrasbe, Krista Isua guâ ka’ngguapeu ne pehî’nsangne ge ningnui je pa kakellumbe gene ’nningdau-desang ze ningnui je rechâ gai de lei, chidezai Hera ’nningtak leine gene sapbesingsiak lu ze mâ-chî’mmi ze bam le ra hangge zeu.

¹³Ningnui benai Lodikia ge zai Hierapolis ge bamme hanggene pa tâtew’nrî-desang gai de lei be ze I ne sakkitew de lei.

¹⁴Lukabe, chi kehungpeu, ka’nrâme je tewka’mmipeu benai Demabe ne ningnui je rechâ gai de lei.

¹⁵Mi puiname, Lodikia ge bamme, zai Nimphale benai pe ki ge herakiangname wangka’nduime dage I ne rechâgaibe sam ze peichang gai lau.

¹⁶Zai ningnui ruage aipau samkela rawgaibe kiâ gai lu dezai Laodikiame gu herakiangname ruage du aize kiâliâ gai lau; zai Lodikia gene samkela ningnui ngaukadaibe ze du kiâ ra lei be chî le lau.

¹⁷Zai Arkippasbe je, “Heguangpeu gene nang tâ’nggua ra ngaube tewpuirabe ze chî le lau,” ze acheu be lau.

¹⁸I, Paulbe ne ai rechâgaibe sam ze a ba sing ne raw gai de lei. Achu keîbe-ria ramme ze chibam lau. Ningnui dage peize ka’nggiabe bam bam lau.