Read Zeme Naga 1 THESSALONIKAME 2 Bible Online

1 THESSALONIKAME 2 - Zeme Naga bible

1 THESSALONIKAME 2

¹Mi puiname gau, ningnui dage anui ne ’ngkiâmiebe ze ’nta mak lei be ningnui ne chî lei;

²kane ningnui chî’mmi ze bambe luigum ze, anui ne hereulie gai ze, zai Philippi ge tewhelêuku gai bei ze bam leusede ka’nggibe kechibe marak gene Hera gu gospel ze ningnui dage rangba gai ra anui Rapeu gene anui dage gekuube ngau lu de lei.

³Anui gu gekiambe ze tâumakbe gene zai ’nchimakbe gene patbe kau mak, zai mi ’nchingsiabe gene tewbe du mak lei;

⁴kane gospel deu ge ’nggua ra Hera ne anui je kedak lu lun gai bei gum ze, ziemmena suigut tew ra makse, kane anui lung kakedakpeu Hera suigut tew ra anui sa de lei.

⁵Anui â mâdau de mi ruâkagetoabe sam ramme sa mak zai kadekumbe tapchimbe paî du bâ sua me lei, ningnui ne chibe luigum zeu, Hera ne sakki de lei;

⁶zai Krista gu apostolme gum anui ne rang ze tew ze bam leusede ningnui dagene lêuzai, miramme dagene lêuzai ziemmename dagene mi ’nrîmyi ze bam ra peu me lei.

⁷Kane hena ka’mpâmpui ne pe name je tinggeu ze bam gum ze ningnui ruage anui â (’ngngiêne gum) renua ze bam lei.

⁸Chigum ze ningnui je hung ze ’nchâ-kadesang dadege, Hera gu gospel runne makse, kane anui runne anui je ’nsangdu ningnui dage peipat kai ra anui â kedâ lu bam de lei, ningnui ze anui ne hung-kadesangme changdibe ziegeneu.

⁹Mi puiname gau, anui ne hereu ze tâtewka’nrîbe ze ningnui ne ’ngngaî mak chî la de lei; anui ne Hera gu gospel rasam paugaibe luage ningnui mi-mige je de tewhereu gai mak ra hangge anui ne kemuî-keba tâtew ze bam daseu.

¹⁰Ningnui, keneime bau dage anui bambe luilungtak ze ’nchi, pelingtew zai sa’nsiaragabe tak ze ningnui ne sakki de lei, zai Hera ne du sakki de lei;

¹¹bepeu ne pe name dage gum ze, anui ne ningnui hangkat-kat je gecheulum gai ze chausinggaibe tak ze ningnui chî daseu.

¹²Pe gu heguangram ge benai pengêudibe ge ningnui je kûgaipeu, chi Hera hang keyibe luilung ge lung ra hangge zeu.

¹³Anui dagene ningnui seulube, chi herasam ningnui ne ngau lu dege chize ziemmena sam hangge lu gai mak ze, kane Hera gu sam singbe hangge luteigaibeibe, aipau deu hangge ze anui du misuiyibe rasam Hera dage pau gai bam de lei, chi ningnui keneime dage tâtew ze bambe zeu.

¹⁴Mi puiname gau, Krista Isua gene Judia ge Hera gu herakiangna ramme helî kahelime ningnui chang gai di de lei; Judame dagene penui hereulie gai gum ze ningnui du ningnui ramname dagene hereulie gai ’ndi de lei.

¹⁵Chime ze Heguang Isua benai kemeume je tewchat, zai anui je kelipat kai, zai Hera suî tew’nsia ze ziemmename je ’nggi ze bamme bau dadegeu,

¹⁶penui gu hemui bambe ge tewpuigaibamrabe hang, Jentailme ringlerabe hang penui dage anui samsabe gene anui je tewnambe zeneu, kane nâlangbe ge â Hera lumpum penui peireige wangchang gai di de lei!

¹⁷Mi puiname gau, helung lam gene makse, mi pum lam gene beting keduîne hangge ningnui ne anui je putkai’nggiâkia gai bei dadege ningnui je heju ne heju hedau-gainei’nteu-teu ze bam de lei;

¹⁸anui ne ningnui dage wanggaineidibe ziegene—I, Paulbe, I â ’nningchu gai ’nsui ze bam—kane satan ne anui je nam’nzie ze bam di lei.

¹⁹Anui Wang Isua, pa wangbe ge anui gu kaheguîbe mei, nune hesuiyibe mei, nune pe masuage kedikuâ-kuarabe hangge kraun mei be ze ’ndaikau dai ra lau? Chize ningnui zene chang ra de mak semei?

²⁰Ningnui zene anui ngeudibe benai anui suiyibe daseu.