Read Zeme Naga 1 THESSALONIKAME 4 Bible Online

1 THESSALONIKAME 4 - Zeme Naga bible

1 THESSALONIKAME 4

¹Nâlangbe ge mi puiname gau, ningnui ne tewtat ze bambe luigum ze, ’ndaigum lung ra mei zai ’ndaigum Hera suî’nning tew ra mei be hangge anui dagene ningnui geteilube ze chigum tewrankaibi-bi bam ra Heguang Isua gene anui ningnui je kiâm ze gecheu’nrak kai lei.

²Ningnui je anui ne Heguang Isua gezene mâ-geteiliabe ramme peibeibe ze ningnui ne chî la daseu.

³Aize Hera ’nningtak daseu, ningnui je tew’nchigaibe: chize ningnui hangleutewbe gene ’mbiarabe zeu;

⁴ningnui hangkat-kat ne pe nâu je ka’nchibe benai hengêu pakezei gene teirabe tak ze chî lei,

⁵Jentailme Hera je chimakme gum ze ngau’ntetlakbe gene mak zeu;

⁶chi ningnui je besie luî gene anui ne deiliâ’ntuagaibe luigum ze mâ de hede’ngka me ra, zai aipau deu ge pe sikina dage kesiatewmakrabe zeu, Heguangpeu â airamme leine peireige hekûmlupeu daseu.

⁷Hera â anui je kahebâbe hangge kû me lei, kane ’nchichiak ge bam ra ku zangno.

⁸Chipauziegene aize ngauka’nnabe kau â ziemmena je ngauka’nnabe makse, kane Hera je ngauka’nna de lei, ningnui je Herui Ka’nchibe peipeu jeu.

⁹Kane mi puina kat-kat je hungchirabe deu ge â, mige ne de ningnui hangge ningnui dage raw gai ra ’nnang ta de lei, kat-kat je hungchirabe hangge Hera ne ningnui je â getei gai bei la daseu;

¹⁰zai gesang de lei, Makedonia leine ge ningnui ne mi puiname je hung ze la de lei. Kane mi puiname gau, tâtew rankaibi-bi ra ningnui je anui ne gecheu’nrak kai de lei,

¹¹’nsimrim ze lung ra heka ra, ningnui tâ-ngeu bâm chî ra, zai anui ne ningnui je chaugaibeibe luigum ze ningnui ba ne tâtew ze bam ra hangge zeu;

¹²chidezai hela kau ramme ne (ningnui je) hengêutew ze bam ra yime ningnui chang ra, zai mi-mige je de tâ ’ngngin mak ze bam ra hangge zeu.

¹³Kane mi puiname gau, chaidime rasam ze ningnui ne chî mak ze bam ra anui ne lunei me de lei, miramme kaheguîbe game gum ze ningnui duângga ze bam mak ra hangge zeu.

¹⁴Isua chai lu ringchudaidibe anui ne ’nnum’mmi ze bambe luigum ze Isua gezene Hera ne jeikeudime je pe dage nguakuakchu kam gai gu daseu.

¹⁵Heguangpeu gu sam gene aize ningnui je anui ne rang’nchichiak kai lei, chi Heguangpeu wangbe mai riâ ’nsakkuagaibeime, anui keringme zene jeikeudime sua tatraî ra mak lei.

¹⁶Heguangpeu â, angelme ruage kanguapeu gu gekûbe kuâ gene, Hera gu hegeîluîkie kuâ gene kusiak kai ze tinggîm ’mbene wangkeu gu daseu. Zai Krista gene chaidime ne churai gu lei;

¹⁷chidezai Heguangpeu je tingkai gene hedau ra putkaibeime, anui ring ze bamme je kemâu ge penui dage nguachu’mpam gai gu lei; zai chigum ze pehî’nsangne ge Heguangpeu dage anui bam bam ra de lei.

¹⁸Chidaze aipau rasam zene kat-kat suitew’nta ze bam bam lau.