Read Zeme Naga 1 THESSALONIKAME 5 Bible Online

1 THESSALONIKAME 5 - Zeme Naga bible

1 THESSALONIKAME 5

¹Kane mi puiname gau, pehî benai beting ze ningnui dage raw gai ra mâ de ’nnang me lei.

²Heguangpeu gu naimikpui â tingmuîzeu ne mâ-kahegapeu gum ze wang gu lei be ningnui runne ne chî’mmi ze la daseu.

³Ziemmename ne, “Desieyibe lungzeunetewbe benai reîka’mmibe lamui lei,” ze kacheube luage luakatne ’mpuimi henalung ra ’nnangwang gum ze tew’nggarabe wangchang gu lei, zai ’mbiapatlerabe bam ra mak lei.

⁴Kane mi puiname gau, mâ-kahegapeu ne gum ze ningnui je tewrîn gai ra hangge chipau naimikpui hangge ningnui â kemuîbe ge bam me lei.

⁵Ningnui â kebabe name benai ’nrîmbeting name kam de lei; anui â tingmuîzeu name du mak zai kemuîbe name du mak lei.

⁶Chidaze miramme jei bam gum ze anui â jei bam mak kei lei, kane anui â ’nrakhak ze ’nchinghîng ze bam kei lei.

⁷Kejeime tingmuîzeu ge jei lei, kameneume tingmuîzeu ge kameneu lei.

⁸Kane anui â ’nrîmbeting gu chang di daze ’nchinghîng ze, zai keneibe benai kehungbe gachûp, zai tewka’nringbe benai kaheguîbe peichûp kai lu bam zu kei lei.

⁹Hera ne, helumpum ngaurabe hangge, anui hangge hatkaikua me lei, kane anui Wang Isua Krista,

¹⁰anui hangge chaigaipeu gezene tewka’nringbe ngau ra hangge hatkaikua lei, chidezai anui rak mei zai jei mei zaidu pe dage anui ring le ra hangge zeu.

¹¹Chidaze kat-kat lung tew’ndi ze bam lau, zai ningnui ne tew ze bambe luigum ze kat-kat je teichu ze bam lau.

¹²Mi puiname gau, kane ningnui ruage tâtewhereu ze bamme benai Heguangpeu gene ningnui peireige bamme zai ningnui je mâ-geteiliame je hengêutewliachi ze bam ra,

¹³zai penui tatew ziegene penui je hengêutew’ndi ze bam ra ningnui je kiam lei. Ningnui ruage peize desieyibe bam lau.

¹⁴Zai mi puiname gau, anui ne ningnui je gecheu gai lei, kahengame je deiliâ lau, helungcheime je helungtew’ndi gai lau, heran-game je ’ngngâ lau, penui ’nteumena dage gesutchi ze bam lau.

¹⁵Ningnui ruage mi-mige ne de kesiabe ne kesiabe hangge peiruîmakrabe ze chî le lau, kane kat-kat dage benai ’nteumena dage mâ-keyibe tew ra pehî’nsangne ge peu bam lau.

¹⁶Pehî’nsangne ge hesuiyi’nta bam lau,

¹⁷kellum bam lau,

¹⁸misuiyibe benai mi suisiabe zai kahereube benai katemibe luâ ramme ge hesuiyibe sam pau ze bam lau; aize Krista Isua gene ningnui hangge Hera ’nning chang daseu.

¹⁹Herui je tew’mmit se lau,

²⁰kemeu sam paubeibe je ngau’nna se lau,

²¹kane mâgetaleine ze kedak le lau; keyibe ze tei’ntip le lau,

²²kesiabe leine gene ’mbia de lau.

²³Peize desieyibe Hera sing ne ningnui je tew’nchi kam gai be lau; zai anui Wang Isua Krista wangkeube ge ningnui gu herui zai keringbe zai hepum ze mâ de sa’nsia ra ga ra peize reîzun gai be lau.

²⁴Ningnui je gekûpeu â lungsangtewbe kau lei, zai pa ne chize tew gu lei.

²⁵Mi puiname gau, anui hangge kellum gai bam lau.

²⁶Ka’nchibe kakeputbe ne mi puiname leine je rechâ gai de lei.

²⁷Aipau samkela ze mi puiname leine dage kiâliâ gai ra Heguangpeu ji gene I ningnui je kiam lei.

²⁸Anui Wang Isua Krista ka’nggiabe ningnui dage peize bam bam lau.