Read Zeme Naga JOSHUA 1 Bible Online

JOSHUA 1 - Zeme Naga bible

JOSHUA 1

¹Tingwang guâ ka’ngguapeu Mosabe chaidibe chângge, Tingwang ne Mosabe gu heguangsinpeu Nunbe na Joshuabe je,

²“Mosabe, a guâ ka’ngguapeu chai di de lei; chipauziegene chuna chu lu ze nang benai ning gume leine ai Jordan kapat ze Israel name hangge I ne heram peigaibe ge gut chu lau.

³Mosabe suage I samhatkaibe luigum ze ningnui pî kagairabe bâm leine ze ningnui je I pei gai ’nde lei.

⁴Tingkangram benai ai Lebanon gene geudi riâ chang ze Euphrates geuki, Hethme gu heram leine gene sungkling kedi chang ze tingnaimik keu gai ’mbia ningnui gu heramrai chang gu lei.

⁵Ziemmena mî du ningnui ringbe ting ge ning suage sapduibe kau pat ra mak lei; Mosabe dage I bam gum ning dage I bam gu lei; I ningchu put kai ra mak, zai ’ngngaî ra mak lei.

⁶Ning ranchi zai kuu ze bam lau; dezai penui peume je pei ra I hatkai’ndibe heram ze penui luchi le ra nang ne tew gai ra hangge zeu.

⁷Ning ranchi zai kuugiereu ze bam lau, a guâ ka’ngguapeu Mosabe ne hingde peibe ramme ze tei’ntîngteî ze tei lau, chigene hezat’mbia zai heku’mbia zua gai se lau, dezai nang tatkaibe bâm leine ge lung’ntuachuchi le ra hangge zeu.

⁸Aipau hingde leisikuak ze ning mui gene teirimna ra mak lei, kane chige rawgaibe luigum ze ’ntîng ze tewchi le ra hangge kemuî keba ’nning ze bam ra lei; dezai nang ’mpuî hangge keyibe chang gu, zai nang lung’ntua gu lei.

⁹I ningchu samdie gai mak mei? Ning ranchi zai kuu ze bam lau; hing se lau, zai ning lung du chei se lau; nang tatkaibe bâm leine ge Tingwang ning Rapeu ning dage la daseu,” ze kacheu lei.

¹⁰Zai Joshuabe ne baudime gu besuitewme ramme je samdie gai ze,

¹¹“Tejeîki tatpelagut ze ziemmename je samdie gai zu lau, ‘Ningnui teu ra sak ra kedâ zu lau; hezie kechum ne lungge ai Jordan ningnui ka gu daseu, Tingwang Hera ne ningnui je peirabe heram ze ’nram le ra hangge zeu,’ acheu zeu,” ze kacheu de lei.

¹²Zai Reubenme, Gadme, zai Manasseme zat pa’mpime je Joshuabe ne sa ze,

¹³“Tingwang guâ ka’ngguapeu Mosabe ne samdiegaibe ze chî bam lau, ‘Tingwang ningnui Rapeu ne ningnui gesaube bâm hang tinggeu gai gu, zai aipau heram ze ningnui je pei gu lei,’ kacheube zeu.

¹⁴Ningnui nâu name, zai ningnui gu kaurui ramme ze Mosabe ne ningnui je Jordan ’nzû ze heram peigaibe ge lung bam gu lei; kane ningnui ruage herei-tewchime leine â, hereipuâ kai lu ze ningnui puiname suane â kapat raî lu ze penui je ’ngngâ ra lei,

¹⁵Tingwang ne ningnui benai ningnui puiname je gesaube pei gai mak tâne, zai Tingwang Hera ne penui je peibe heram ze penui ’nram le mak tânege zeu; chidezai ningnui hang heram ’nramgaibe ge ningnui wang dai ze chize ’nram ra lei, Tingwang guâ ka’ngguapeu Mosabe ne ningnui je Jordan ’nzû ze naimikpat ’mbia heram peibe gezeu,” ze kacheu de lei.

¹⁶Dadege penui ne Joshuabe je kak ze, “Nang ne anui je samdiegaibe leine anui tew gu lei, zai nang ne anui je langgai-gaibe bâm ge anui tat ku lei.

¹⁷Mâgetaleine ge Mosabe kuâ anui pheu gum ning kuâ du pheu gu lei; Tingwang ning Rapeu ne ning runne dage peize bam bam lau, Mosabe dage pa ne bam gum zeu!

¹⁸Ning sam diegaibe je ’nggi ze nang diegaibe leine ge pheumakbe kau je â tewchat ne ra lei. Ning ranchi ze kuugiereu ze bam lau,” ze kacheu de lei.