Read Zeme Naga JOSHUA 10 Bible Online

JOSHUA 10 - Zeme Naga bible

JOSHUA 10

¹Adoni-zedekbe Jerusalem heguang ze Joshuabe ne Ai namdi lu’ndibe benai tew’nsiakam’ndibe Ai benai pe gu heguang je Jeriko benai pe gu heguang peireige tâtewbe gum, zai Gibeon ge lungme ne Israelme dage desieyibetew lu ze penui ruage lungheruabambe rasam seu lu dege,

²pa hing-desang di de lei, Gibeon ze â namdi kat heguang namdi ruage kat gumbe kau, zai Airam suadu di, zai pe gu ziemmename leine du penui ranchibe kau ziemmena dadegeu.

³Dadege Adoni-zedekbe Jerusalem heguang ne Hebron gu heguang, Hohambe, Jarmuth gu heguang Pirambe, Lakis gu heguang Japhiabe zai Eglon gu heguang Debirbe dage sam lang gai ze,

⁴“A tailam hang ze achu ’ngngâ gai lau, zai anui ne Gibeon je tew’nsia kam ne kei lei; Joshuabe benai Israelme zat dage penui ne desieyibetew lu bamdibe ziegeneu,” ze kacheu de lei.

⁵Dadege Amorram gu heguangme hangmengeu, Jerusalem gu heguang, Hebron gu heguang, Jarmuth gu heguang, Lakis gu heguang, zai Eglon gu heguang aime penui gu hereikang ramme je nguawang’ndui gai de lei, zai penui gu hereikangme je ngua lu hang ze Gibeon je ’nggi ra tejeîki tewkua lu kaherei de lei.

⁶Gilgal tejeîki ge Joshuabe dage Gibeon ge bamme ne sam lang gai ze, “Ning guâ ka’ngguame peireige ning ba liângri mak bam se lau; anui dage kelua ze hang ze anui je tew’nring gai lau; Amorram gu heguangme peloaram ge lungme ne anui je ’nggi ra ’nduiwang mui de lei,” kacheu de lei.

⁷Dadege â Joshuabe Gilgal gene pa benai herei gu ziemmena leine zai herei ge gekuume je ngua lu hang de lei.

⁸Zai Tingwang ne Joshuabe je, “Penui je hing se lau, penui je I ne ning ba ge pei gai ’ndi daseu; penui ruage mî de ning suage saprabe kau ga gu lei,” ze kacheu de lei.

⁹Chigum ze Gilgal gene Joshuabe kelua ze penui tailam hang ze tingmuî ’nzangtingba gai de lei.

¹⁰Gibeon gene Israelme ne tewchatkaibeime je Israelme masua gene Tingwang ne penui je hing-desang bam ra tew gai bei de lei, zai penui je ’nchumie ze Beth-horon ’mpuîki ’mbe zai Azeka benai Makkeda riâ chang ze tewchat kam ’ndi de lei.

¹¹Zai penui Israelme masua gene paktat ze Beth-horon ’mpuichak tatkeube luage, Tingwang ne tinggîm ’mbene tingchu kedibe ramme ze, Azeka riâ chang ze penui peireige tuâkeu bam bei ze penui je tuâchat kam ’ndi de lei; Israel gu hekie chit gene chaibe sua â kie ze desak ne penui je tuâchat ’ndi de lei.

¹²Tingwang ne Israelme ba ge Amorme je peigaibe mai ge Tingwang dage Joshuabe ne sam sa de lei; zai Israelme kengaube gene, “Tingnaimik gau, Gibeon ge nang ’ngngaî mak ze bam lau, zai nang hekêu du Aijalon kâm ge sau gai de lau,” ze kacheu de lei.

¹³Heramdeiname penui teureime dagene penui kûmrui kam mak tâne, tingnaimik peluî ze bam zai hekêu du bam bam di de lei. Jasharbe gu leisikuak ge aize raw gai mak semei? Tingnaimik tinggîm sûngngangkelî ge bam gai di, zai tingnaimikpui kat riâ gum ze naimik keu kelua mak ze bam lei.

¹⁴Aigumbe Tingwang ne ziemmena kuâ ka’ngkingbe mai ze mâdau du ga gerei de lei, Tingwang â Israelme hangge ’nggigaihâbeibe zeu.

¹⁵Dadege â Joshuabe benai Israelme pe dage bamme leine penui bâm Gilgal ’mbe helatwang kadai de lei.

¹⁶Ai heguang hangmengeume bau ze paktat ze, Makkeda hekâuki ge penui ka’mbai de lei.

¹⁷“Chi heguang hangmengeume Makkeda hekâuki ge ka’mbaime bau je ngau de lei,” ze Joshuabe je salia bei de lei.

¹⁸Zai Joshuabe ne sa ze, “Hekâuki kemui ge tingchu kedibe ramme kelatwang ze kainam gai lau, zai penui je reî ra hangge kai lau;

¹⁹kane ningnui â chige bam se lau, ningnui teureime je ’nsatat chu lau, penui chai ’mbia tat le lau, penui gu namdi ge gut ra penui je pei se lau; Tingwang ningnui Rapeu ne penui je ningnui ba ge pei gai ’ndi daseu,” ze kacheu de lei.

²⁰Penui je kumtua’nchichiak kai ’nde mak tâne Joshuabe benai Israelme ne penui je bichat-desang gai lu dege, zai penui ruage kechai ’nreipatlume penui gu rie’mmilube namdi ge gut ti dege,

²¹tejeîki Makkeda ge pe dage baudime ’nteumena Joshuabe tailam helatwang gai kadai de lei; Israelme baudime mi hangkat peireige du mî ne penui kuâ pat kai kiâku ta di de lei.

²²Chidadege Joshuabe ne sa ze, “Hekâuki kemui ze latpat lu ze, heguangme hangmengeume bau je chigene a dage nguapat lau,” ze kacheu de lei.

²³Chigum ze penui ne tew de lei, zai chi heguang hangmengeume Jerusalem gu heguang, Hebron gu heguang, Jarmuth gu heguang, Lakis gu heguang zai Eglon gu heguang aime je hekâuki gene pe dage nguawang de lei.

²⁴Zai penui ne chi heguang hangmengeume je Joshuabe dage nguawang gai dege Joshuabe ne Israelme leine je kûwang gai de lei, zai herei gu ziemmena ruage besuitewme pe chai suitatme bau je, “Wang’nna lau, ai heguangme guang ge ningnui pî ka gai lau,” kacheu lei. Chidadege penui wang’nna lu penui guang ge penui pî chai gai de lei.

²⁵Zai Joshuabe ne penui suage, “Hing se lau, zai ningnui lung chei se lau; ningnui ranchi ze kuugiereu ze bam lau; chigum ze Tingwang ne ningnui teureime ningnui je ka’nggime leine peireige tew gai gu daseu,” kacheu de lei.

²⁶Zai bechâng dege Joshuabe ne penui je lak ze tewchat ’ndi de lei, zai pa ne penui je hingbang mengeu ge keî’nchie gai bei de lei. Zai hegî riâ chang ze hingbang ge penui keî’nchie bam lei.

²⁷Kane tingnaimik hegîlia dege Joshuabe ne die gai bei ze penui je hingbang gene likeu ’ndi de lei, zai penui ka’mbaibe hekâuki ge tuâ gai bei de lei, zai penui ne hekâuki kemui ge tingchukâng kedibe ramme dang gai bei de lei, nemai riâ du chi ze larei lei.

²⁸Zai chipau mai ge Joshuabe ne Makkeda ze lu ’ndi de lei, zai hiazutkie ne chipau bâm benai pe gu heguangme je tew’nsia ’ndi de lei; chige bamme leine je pa ne tewchat kam ’ndi de lei; mî de ringpat ra pa ne ’nsak kai mak lei; zai Jeriko gu heguang peireige tew gum ze pa ne Makkeda gu heguang je du tew gai bei de lei.

²⁹Dadege Joshuabe Makkeda gene Israelme ’nteumena je ngua lu, Libna ’mbe hang de lei, zai Libna je ka’nggi de lei;

³⁰zai Tingwang ne heram benai pe gu heguang je Israelme ba ge pei gai bei de lei; zai pa ne hiazutkie ne penui je tew’nsia kam ’ndi de lei; zai chige bamme leine je mî je de ringpat ra pa ne ’nsak kai mak lei; zai Jeriko gu heguang peireige tew gum ze chi heguangpeu je du pa ne tew gai bei de lei.

³¹Zai Joshuabe Libna gene Israelme ’nteumena je ngua lu Lakis ’mbe tat te lei, zai penui je tuaguâ lu ka’nggi de lei;

³²zai Tingwang ne Lakis ze Israelme ba ge pei gai bei de lei, zai pakenabe mai ge chize pa lu de lei, Libna peireige pa tew gum ze hiazutkie ne chipau bâm benai chige lungme leine je tew’nsia kam gai bei de lei.

³³Chidadege â Gezer gu heguang Horambe Lakis je ’ngngâ ra hang de lei; zai Joshuabe ne pa benai pe gu ziemmename je tewchat kam ’ndi de lei, zai kat de ringpat ra ’nsak kai mak ta lei.

³⁴Dadege Lakis gene Eglon ’mbe Joshuabe Israelme leine je ngua lu pat te lei; zai penui ne chize tuaguâ lu ka’nggi de lei;

³⁵chipau mai gene penui ne chize lu ’ndi de lei; zai hiazutkie mui gene chize tew’nsia kam ’ndi de lei; Lakis peireige pa tew gum ze chipau mai pa ne ziemmena leine je tew’ngga kam ’ndi de lei.

³⁶Dadege Joshuabe ne Israelme leine je ngua lu Eglon gene Hebron ’mbe hang de lei, penui ne ’nggi ze chize lu ’ndi de lei,

³⁷zai chipau bâm ze lu lu chipau bâm gu heguang benai pe gu namdi ramme, zai chige kelungme leine je hiazutkie mui gene tew’nsia kam gai bei de lei; Eglon peireige tew gai gum ze mî je de ringpat ra pei mak ze chige kebamme leine je tew’nsia kam gai bei de lei.

³⁸Chidadege Joshuabe benai Israelme leine Debir ’mbe helatwang dai ze chige ka’nggi de lei,

³⁹zai pa ne chipau heram benai pe gu heguang zai pe gu namdi ramme leine lu ’ndi de lei; zai penui ne hiazutkie ne penui je bichat kam ’ndi de lei, zai chige bamme leine je tew’ngga kam ’ndi de lei; mî je de ringpat ra pa ne ’nsak kai mak te lei; Hebron benai Libna zai pe gu heguangme peireige tew gum ze Debir benai pe gu heguang peireige du pa ne tew gai bei de lei.

⁴⁰Chigum ze â Joshuabe ne heram leine, peloaram, Negeb, zai pebak benai peliap ge heram ramme, zai penui gu heguangme leine je duî kam lu ze ringpat ra mî je de pa ne ’nsak kai mak ze, pechuilube zat leine je tew’nsia kam ’ndi de lei. Tingwang Israelme Rapeu ne diegaibe luigum zeu.

⁴¹Zai Joshuabe ne Kades-barnea gene Gaza riâ zai Gibeon riâ changbe ze Goshenram peloaram riâ chang ze pelane dui kam ’ndi de lei.

⁴²Zai luakat gene Joshuabe ne ai heguangme benai penui gu heram leine lu ’ndi de lei, Tingwang Israelme Rapeu ne Israelme hang herei’nggihâbeibe ziegeneu.

⁴³Dadege â Joshuabe Israelme leine je ngua lu, Gilgal ’mbe helatwang dai di de lei.