Read Zeme Naga JOSHUA 11 Bible Online

JOSHUA 11 - Zeme Naga bible

JOSHUA 11

¹Hazor heguang Jabinbe aize seu lu dege, Madon heguang Jobabbe, zai Shimron heguang, zai Akashaph heguang aime dage,

²zai heguangme ramme tingpeî ’mbia peloaram ge bamme zai Kinneroth gene tingpî ’mbia ge bamme Araba ge bamme, zai bekâmram, zai Naphoth-dor tingbia ’mbia, ge bamme,

³Kanaanme, tingbia benai tingrun ’mbia bamme Amorme, Hethme, Perizme, zai Jebusme peloa ge bamme, Mizpahram Hermon lungge bamme, Hibme dage pa ne sam lang gai de lei.

⁴Dadege penui gu hereikang baudime riak ’nggeukung ge hegit bambe kie ze hekun ramme benai timriang ramme misongga tei lu ze penui zuapat te lei.

⁵Zai aime heguangme leine penui gu hereikangme je nguakangkattew lu wang ze Israelme je ’nggi ra hedui bâm Merom ge tejeîki tew de lei.

⁶Zai Tingwang ne Joshuabe je, “Penui je hing se lau, ’nchuamai chuna hî dezai I ne Israelme hangge penui je tewchat kam gai gu lei; penui gu hekun pî ramme ningnui ne tewtelua gai gu, zai hemi ne penui gu hekun-timriang ramme rû kam gai gu lei,” ze kacheu de lei.

⁷Dadege â Merom hedui bambe taihia ge Joshuabe pe gu hereime bau je ngua lu luakatne penui dage wang ze penui je ka’nggi de lei.

⁸Zai Tingwang ne penui je Israelme ba ge pei gai ’ndi de lei, Sidon Kedibe gene Misrepoth-maim riâ penui ne ’nsa ze tewchatkaibeime bau zeu; zai Mizpe kâm gene tingnaimikpat ’mbia riâ chang ze penui ne penui je tewchatniang ’ndi de lei; mî je de ringpat ra pei mak ze tewchat kam gai ’ndi de lei.

⁹Dadege â Tingwang ne ranggaibe luî ze Joshuabe tew gai de lei; pa ne penui gu hekun ramme pî tewtelua gai ze, zai hemi ne penui gu hekun-timriang ramme rû ’ndi de lei.

¹⁰Zai chipau ting ge Joshuabe helatwang dai lu, Hazor ze lu ’ndi de lei, zai hiazutkie ne chipau heram gu heguang je bichat ’ndi de lei; Hazorbe ze tingtie ’ngka heguangram leine peî chang ze bam dadegeu.

¹¹Zai chige bamme leine je hiazutkie ne bichat ’ndi de lei, penui je tew’nsia kam ’ndi de lei; pechuilube zat leine chige mâ de ’nsak kai mak lei, zai pa ne Hazorbe je hemi ne rû ’ndi de lei.

¹²Zai chime heguangme gu namdi ramme pelane, zai penui gu heguangme, pelane je Joshuabe ne lu ’ndi de lei, zai hiazutkie ne bichat ze penui je tew’nsia kam ’ndi de lei, Tingwang guâ ka’ngguapeu Mosabe ne diegaibe luigum zeu.

¹³Kane kedeiloa poine ’ntûm ramme ge namdi bambe kat du Israelme ne rû mak lei.

¹⁴Zai chi namdi gene sutlube merua ramme benai kebui ramme je â Israelme ne penui gu hereichâ hangge lu ’ndi de lei; zai ziemmena leine je â hiazutkie ne bichat kam ’ndi de lei; penui je tew’nsia kam mak tânege zeu, zai pechuilube kau leine je penui ne ’nsak kai mak lei.

¹⁵Tingwang ne pe guâ ka’ngguapeu Mosabe je die gai gum ze, Mosabe du Joshuabe je die gai de lei; zai chigum ze Joshuabe tew de lei; Tingwang ne Mosabe je diegaibe luigum ze tew kam gai de lei.

¹⁶Chigum ze Joshuabe ne chi heram ramme pelane lu ’ndi de lei, peloa gu heram ramme, zai Negeb pelane zai Goshenram pelane zai Araba gu bekâm ramme, zai Israelme gu peloaram ramme benai bekâm ramme,

¹⁷Halak Loa gene Seir ’mbia zua ze, Harmon loapî Lebanon kâm Baalgad riâ chang lei. Penui gu heguangme je du pa ne lu lu bichat zai tewchat kam ’ndi lei.

¹⁸Joshuabe chi heguangme je betinggetie kaherei de lei.

¹⁹Gibeon ge lungme, Hethme je sâu ze namdi kêdabe Israelme dage desieyibetew mak lei; zai penui ’nteumename je herei gene duî ’ndi de lei.

²⁰Israelme je herei ra zuapat ra hangge Tingwang ne penui lung tew’nchi gai bei de lei, penui je tew’nsia kam ne ra hangge Tingwang ne Mosabe je diegai’ndibe gum zeu.

²¹Zai chipau ting ge Joshuabe wang lu, peloaram gene wangme, Anakimme, Hebronme, Debir, Anab, zai Judaram gu peloaram leine zai Israelme ram gu peloaram leine; Joshuabe ne penui gu namdi ramme ze du tew’nsia kam ’ndi de lei.

²²Israelme ram ge Anakimme hangkat je du ’nsak kai mak te lei; Gaza, Gath, zai Ashdod ge runne ’nsak kai de lei.

²³Chigum ze Joshuabe ne heram pelane lu kam ’ndi de lei, Mosabe je Tingwang ne saliabe luigum zeu; pe deiname hangge lupatkaibe luigum ze Israelme hangge heram heurâ ramme pei bei de lei.