Read Zeme Naga JOSHUA 13 Bible Online

JOSHUA 13 - Zeme Naga bible

JOSHUA 13

¹Chuna â Joshuabe chîng di, zai pe tingkum pelane tat ti de lei; zai Tingwang ne pechu, “Nang chîng de da zai ning tingkum pelane tat te de lei, zai heram ’nram ra heram misongga larei de lei.

²Aipau ze heram ka’nruabe de lei; Philistin bak leine zai Geshurme ram leine:

³(Ijip gene tingbia ’mbia Shihor gene tingpeî ’mbia Ekron heramrai riâ, chize Kanaanme gu hangge changbe; Philistinram samramme hangmengeume bambe bâm Gaza, Ashdod, Ashkelon, Gath zai Ekron), zai Abbim gu ramme

⁴tingpî ’mbia ge Kanaanme ram pelane zai Sidonme, Aphekme, Amorme gu heramrai hangge changbe Meara kacheube,

⁵Gebalme gu heram, zai tingnaimikpat ’mbia Lebanon gu heram pelane, Hermon loa ’ngkang ge Baalgad gene Hamath gutbe bâm riâ changbe,

⁶Lebanon gene Misrephoth-maim riâ chang ze peloaram ge bamme leine, Sidonme leine je I ne Israelme kengaube gene penui je kumtua gu lei; Israelme heram ’nramrabe hangge runne pei gu lei, I ne ningchu rang gai gum zeu.

⁷Chuna â chipauziegene hezat sekuime benai Manasseme zat pa’mpime zat heurâ hangge aipau heram ze ’nzi gai lau,” kacheu lei.

⁸Reuben benai Gad zat zai Manassebe zat kêdabe pa’mpime bau ne Tingwang guâ ka’ngguapeu Mosabe ne penui je peigaibe heram ze penui lu de lei; chize Jordan geuki gene tingbia ’mbia ge la lei.

⁹Penui gu heramrai ze Arnon kâm petû ’mbe Aroer gene benai bekâm sûngngangkelî ge namdi gene zai Medeba gene Dibon riâ chang ze peloa’ntûm ka’nsambe pelane luchang de lei;

¹⁰zai Heshbon ge samrampeu Amorme gu heguang Sihonbe gu namdi leine samrampeu, Ammonme gu heramrai riâ chang ze lu de lei,

¹¹zai Gilead, Geshurme benai Ma-akathme gu luangria leine zai Hermon Loa leine, zai Bashan gene Saleka leine zeu;

¹²Ashtaroth benai Edrei ge samrampeu Bashan ge Ogbe gu heguangram pelane penui ne lu de lei (pa ze Rephaim gene pe runne ringpatpeu de lei).

¹³Sedu Geshurme benai Ma-akathme je â Israelme ne kelitua mak lei; kane Geshur benai Maakath â nemai riâ du Israelme dage lung ze bam lei.

¹⁴Lebime zat je runne Mosabe heram pei gai mak lei; Israelme Rapeu Tingwang dage hemi ne herâtewbe zene penui dam chang di de lei, pa ne pechu saliabe luigum zeu.

¹⁵Zai Mosabe ne Reubenme hang heram pei bei de lei, penui kiduîme rehei wangkeube tak gene pie zeu.

¹⁶Chigum ze penui gu heramrai ze â Arnon kâm betû ’mbe Aroer benai bekâm sûngngangkelî ge namdi gene zai Medeba ge peloa’ntûm ka’nsambe pelane de lei; peloa’ntûm ka’nsambe ge Heshbon benai pelung ge namdi ramme bambe pelane teigut kam gai lei;

¹⁷Heshbon ge benai kedeiloa-zâng yibe peireige pe gu namdi bambe pelane ze: Dibon, zai Bamotbaal, zai Beth-baal-meon,

¹⁸zai Jahaz, zai Kedemoth, zai Mepha-ath,

¹⁹zai Kiriathaim, zai Sibma, zai Zerethshahar bekâm gu peloa’ntûm ge bambe

²⁰zai Beth-peor, zai Pisga loa zuk zai Beth-jeshimot,

²¹chize kedeiloa’ntûm ka’nsambe bambe namdi leine Amorme gu heguang Sihonbe kaheguangbe ram leine heram ge bambe, Midian ge besuitewme Ebibe benai Rekembe zai Zurbe zai Hurbe zai Rebabe aime Sihonbe gu heguangsinme ramme dage Mosabe ne nguatewkau’nsamgai’ndipeu, Heshbon ge samrampeu, Amorme gu heguang Sihonbe gu heguangram pelane ze de lei.

²²Israelme ne hiazutkie ne bichatkaibeime ruage Beorbe na Balaambe, hedachakchipeu du bam lei.

²³Zai Reubenme gu heramrai ze Jordan de lei. Aize Reubenme gu heram ka’nrambe de lei, penui ki, penui gu namdi zai penui ram bambe tak luigum zeu.

²⁴Zai Mosabe ne Gadme zat hangge du heram ’nram gai bei de lei, penui ki riak luigum zeu.

²⁵Penui gu heram ze â Jazer, zai Gilead gu namdi leine, zai Ammonme gu heram pa’mpi, Rabba gene tingbia ’mbia, Aroer riâ chang zeu,

²⁶zai Heshbon gene Ramath-mizpeh benai Betonim, zai Mahanaim gene Debir ram riâ,

²⁷zai Beth-haram kâm ge, Beth-nimra, Sukkoth, zai Zaphon, Heshbon gu heguang Sihonbe kaheguangbe heram leine, Jordan gene heramrai tew ze, Kinnereth sungkling gene ’ngkang ’mbia Jordan gene tingnaimik pat ’mbia ’nzûpat lei.

²⁸Aize Gadme gu heram de lei, penui ki penui gu namdi zai penui keloa riak luigum zeu.

²⁹Zai Mosabe ne Manasse zat pa’mpime hang heram pei bei de lei; Manasse zat pa’mpime hangge penui ki riak luigum ze pei gai de lei.

³⁰Penui ram ze Mahanaim gene Bashanram luî ge Bashanram heguang Ogbe gu heguangram pelane, zai Bashan ge bamme Jairme gu hekuînam leine, namdi riakseruk,

³¹zai Gilead pa’mpi, zai Ashtaroth, zai Edrei, Bashan ge Ogbe gu heguangram gu namdi leine lugûm lei; airamme ze Manassebe na Makirbe dagene piakeume Makirme zat pa’mpime hangge penui ki riak luigumbe gene pei gai lei.

³²Airamme ze Mosabe ne Jeriko gene tingbia ’mbia Jordan ka ze Moab kâm ge ’nzigaibe heurâ ramme de lei.

³³Kane Lebime zat hangge â Mosabe ne heram pei mak lei; Israelme gu Tingwang Hera zene penui heurâ hang chang de lei, pa ne penui je ranggaibe luigum zeu.