Read Zeme Naga JOSHUA 14 Bible Online

JOSHUA 14 - Zeme Naga bible

JOSHUA 14

¹Kanaanme dei gene Israelme heram ’nramkeube ze airamme de lei: tingkupeu Eleazarbe, zai Nunbe na Joshuabe, zai Israel zatme ruage penui kichîngme ne penui hang ’nzigaibe zeu.

²Hezat sekuime benai hezat pa’mpime hang Tingwang ne Mosabe suage samdiegaibeibe luigum ze penui ram hang heda ne chakpie de lei.

³Mosabe ne hezat kena benai hezat pa’mpime je Jordan ’nzû ze heram pei gai bei dadegeu; kane Lebime hangge â penui ruage pa ne heram ze penui je pei gai mak tai dadegeu.

⁴Josepbe chaname ruage hezat kena, Manasse benai Ephraim bam dadegeu; zai Lebime hangge â heram gu hedam pei gai mak lei, kane penui lung ra namdi ramme, zai penui gu kaurui ramme deteu ra heramyibe zai penui ka’nnangbe hang runne pei lei.

⁵Tingwang ne Mosabe suage ranggaibe luigum ze Israel zatme tew de lei; penui ne heram katimchâk te lei.

⁶Dadege Judame, Gilead ge Joshuabe dage wang de lei; Keniz’mpeu Jephunnebe na Kalebbe ne pechu, “Tingwang ne Kades-barnea ge Hera gu ziemmena Mosabe je nang benai a tedeu ge ’ndaikau sam rang gai mei be nang chî lei.

⁷Tingwang guâ ka’ngguapeu Mosabe ne Kades-barnea gene heram ’ngkimpie ra achu langgaibe ting ge, kum hedai chang di de lei; zai a lung ge bambe sam ze pe dage I teiwang gai kadai de lei.

⁸Kane a kanghiâme anui nguahangka’nsamme bau ne ziemmename lung ze tewhingrim gai bei de lei; leusedu I â, a lung leine ne a Wang, a Rapeu chai sui ze bam lei.

⁹Dadege chipau mai ge Mosabe ne acheu ze sam deseu gai ze, ‘Nang ning pî kagaibe heram ze betingbeta hangge nang benai ning chaname gu heram hang chang sing gu lei, nang ne ning lung suiwakpat ze a Rapeu Tingwang chai suibeibe ziegeneu,’ ze kacheu de lei.

¹⁰Zai chunage pie le lau, Israelme hênamkang ge tatbe luage Tingwang ne Mosabe dage aipau sam sagai’ndibe ze tingkum hedai changdibe luigum ze Tingwang ne achu tei’nring gai bei de lei; zai chunage pie le lau, nemai ge a tingkum riakdesat ze mengeu chang de lei.

¹¹Mosabe ne achu langgaibe mai a ranchibe luî ze nemai riâ larei lei; chuna a ranchibe du chipau ting ranchi gum ze larei lei, herei ra, zai tat ra wang ra hangge zeu.

¹²Chidaze chipau mai ge Tingwang ne ranggaibe, aipau peloaram ze chuna achu pei zu lau; chipau mai ge Anakme peranchibe namdi ramme ge ’ndai gum bam mei be nang seu de zeî lau: Tingwang ne rangbe luigum ze pa ne a dage bam bei ze I ne penui je kelipat kam ’ndu lei,” ze kacheu lei.

¹³Dadege Joshuabe ne pechu ’nnam gai bei de lei; zai pa ne Hebron ze Jephunnebe na Kalebbe je pe ram hang pei bei de lei.

¹⁴Chigum ze pa ne pe lung leine ne Israelme Rapeu Tingwang je suibeibe ziegene Keniz’mpeu Jephunnebe na Kalebbe heurâ hang nemai wangchang di de lei.

¹⁵Aipau Hebron ji ze tingtie’ngka â Kiriath-arba lei; ai Arba ze Anakme ruage ziemmena dilangpeu lei. Zai heram ze kahereibe gene sauzîng gai di de lei.