Read Zeme Naga JOSHUA 17 Bible Online

JOSHUA 17 - Zeme Naga bible

JOSHUA 17

¹Chidadege â Manassebe ne Josepbe na meraibe changbe ziegene Manassebe zatme hangge aigum ze heram diepat kai bei de lei. Gileadbe peu Makirbe, Manassebe na meraipeu, hangge Gilead benai Bashan diepat kai lei, pa â herei gu ziemmena changbe ziegeneu.

²Zai Manassebe zat kêdabe kiduîme: Abi-ezer, Helek, Asri-el, Shekem, Hepher, zai Shemida; aime hangge diepat kai de lei; aime ze Josepbe na Manassebe dagene ’mpeumi reheipiakeume de lei, penui kiria wangkeube tak luigum zeu.

³Chunage Zelophehadbe, Hepherbe na, Gileadbe na, Makirbe na, Manassebe na, acheu ze wangkeupeu â pe na ’mpeumi ’ngga lei, kane ’mpuimi ramme runne lei; zai airamme ze pe na ’mpuimi ramme ji de lei: Mahlale, Noahle, Hoglale, Milkale, zai Tirzale.

⁴Penui ne Eleazarbe, tingkupeu zai Nunbe na Joshuabe zai besuitewme suage wang lu sa ze, “Anui puiname dage heram ngua’nram ra anui hangge du kedei diepat kai ra Tingwang ne Mosabe je samdiegaibe la lei,” kacheu de lei. Chigum Tingwang ne sam peibe luigum ze penui peume sikiname ruage kedei ze penui je pa ne pei gai bei de lei.

⁵Chigum ze Gilead benai Bashanram, Jordan gene hela giam ge bambe peibeibe peireige dam kereu Manassebe dage tat kai di de lei;

⁶Manassebe na ’mpuimi ramme ne du pe na ’mpeumi ramme ruage hedam ngaudibe ziegeneu. Gileadram ze â Manassebe kêdame hangge pei gai ’ndi de lei.

⁷Manassebe gu heramrai ze Asher gene Mik-methath chang lei, chize Shekem gene tingbia ’mbia de lei; zai heramrai ze tingpî ’mbia wangkeu ze En-tappua ge lungme dage gutchang lei.

⁸Tappuaram ze Manasseme gu lei, kane Tappua gu namdi Manassebe gu heramrai ge bambe ze â Ephraimbe name gu lei.

⁹Zai heramrai ze Kana geuki riâ luchang lei. ’Nggeuki gene tingpî ’mbia Manassebe gu namdi ruage aige namdi ramme bambe ze Ephraim gu chang de lei. Zai Manassebe gu heramrai ze ’nggeuki gene tingpeî ’mbia luhang-hang ze sungkling gene tud kai lei;

¹⁰Ephraim gu heram tingpî ’mbia bambe benai Manassebe gu heram tingpeî ’mbia bambe ze sungkling ne heramrai chang ze bam lei; zai chize tingpî ’mbia Asher hangchang zai tingbia ’mbia Issakar patchang lei.

¹¹Issakar benai Asher ge du Manassebe ne Beth-shean benai Ibleam zai chige keloa ramme, zai Dor ge lungme zai chige keloa ramme, zai En-dor ge lungme zai chige keloa ramme, zai Taanak ge lungme zai chige keloa ramme zai Megiddo ge lungme zai chige keloa ramme lu ’ndi de lei; pakechumbe ze â Naphtali de lei.

¹²Acheuleusedu Manassebe chaname ne chi namdi ramme luchi lak tai de lei; chipauziegene Kanaanme ze chige lung ze bam bam de lei.

¹³Kane Israelme penui ranchipat dege â penui ne penui tâ ’nggua ra hangge Kanaanme je ’nchi-chine kai de lei, zai penui je kelitua kam gai mak tai lei.

¹⁴Dadege Josepbe zatme ne Joshuabe je, “’Ndaitew ze heram dau kat runne anui ram hang lu ra anui je nang pei lau? Tingwang ne anui misongga bam ra anui je ’nnam gai bei zeu?” ze kacheu de lei.

¹⁵Dadege Joshuabe ne penui je, “Ningnui ziemmena kie-kadesang zai â ’nrêu ’mbe hang du lau, zai chi Raphaim benai Perizme ram ge ningnui bâm hang dî’nchi gai le lau, Ephraim gu peloaram ze â ningnui hangge cheizû di daseu,” ze acheu bei de lei.

¹⁶Josepbe zatme ne sa ze, “Peloa gu heram runne â anui hangge tâulak te lei, Kanaanme bekâm ge lungme ’nteumena hegeî timriang ramme tei, Beth-shean ge bamme benai chige keloa ramme, zai Jezril kâm ge lungme ne hegeî timriang ramme tei zeu,” ze kacheu de lei.

¹⁷Dadege Joshuabe ne Josepbe, Ephraimbe zai Manassebe kiduîme ’nteumena je, “Ningnui â pebau kie zai peranchime bau de lei; heram dau kat runne ningnui ngau ra mak lei,

¹⁸kane peloaram ze ningnui gu chang ra de lei, chize ’nrêu chang ze bam leusedu ningnui ne chize dî’nchi lu heramrai deulangbe chang ze ’nram ra de lei; Kanaanme ne penui gu hegeî timriang ramme bam zai penui peranchi ze lung ze bam leusedu ningnui ne kelitua ra de lei,” ze acheu bei de lei.