Read Zeme Naga JOSHUA 18 Bible Online

JOSHUA 18 - Zeme Naga bible

JOSHUA 18

¹Chidadege Israelme kibaume leine Shilo ge wangka’ndui de lei, zai chige ka’nduibe hetiampaîki liâm gai de lei; zai heram ze penui ba kangge gut kai di de lei.

²Israelme ruage penui hang heram timchâkkaimakme zat sena â bam lei.

³Chigum ze Joshuabe ne Israelme baudime je, “Tingwang ningnui peume Rapeu ne ningnui je heram peigaibe ze gut ze ’nram le du mak ze ’ndaitiege ningnui ’ngnginsin ze bam ra rei lau?

⁴Hezat kat-kat gene ziemmena hangchum-chum je peipat kai lau, zai penui ne zuapat lu ze heram bambe tak gene pie lu raw ze heram ge tat-hang, tatkeu ze bam ra I ne penui je lang gai gu lei, zai chipau chângge a dage wang gai ra lei.

⁵Chi kedei ze penui ne bâm sena hang ’nzi gai ra lei, Judame â penui gu heram luî ze tingpî ’mbia tei ra lei, zai Josepbe kiduîme ne tingpeî ’mbia tei ra lei.

⁶Zai ningnui ne heram ze dam sena hang teleu’nchi gai ra lei, zai chi teleu’nchigailube aige teiwang gai ra lei; dezai aige Tingwang anui Rapeu suagene ningnui hang I ne hedachak kai gu lei.

⁷Lebime â ningnui ruage penui gu hedam ga lei, Tingwang gu tingku tâ tewbe zene penui gu hedam changdibe ziegeneu; zai Gadme benai Reubenme zai Manassebe zat pa’mpime du Jordan gene katlam giam tingbia ’mbia penui hang heram ’nram lu de lei, Tingwang guâ ka’ngguapeu Mosabe ne penui je peibeibe luigum zeu,” ze kacheu de lei.

⁸Dadege â penui ’mpuî ra’mbe zuapat ti de lei; zai Joshuabe ne heram rasam raw ra tattime je rang gai ze, “Tat-hang tatkeube ze heram rasam raw lu ze a dage wang dai lau; dezai aige Shilo ge Tingwang masuage ningnui hang I ne hedachak ku lei,” kacheu de lei.

⁹Dadege penui heram lung ze ruapie ze pe rasam raw ze bâm sena ’nzi gai lu, namdi ji ramme leisikuak ge rawkeu gai de lei; dadege Joshuabe tailam Shilo ge sieki ’mbe penui wang de lei,

¹⁰zai Tingwang masua gene Joshuabe ne Shilo gene penui hang hedachak te lei; zai chigene Joshuabe ne Israelme je penui hang-hang heram ze timchâkpat kai de lei.

¹¹Zai Benjaminbe zat gu heda ze pe kiria luigumbe gene pat te lei, zai penui hang heram patbe ze Judabe zat benai Josepbe zat kakge keu gai de lei.

¹²Tingpeî ’mbia ge penui gu heramrai ze Jordan geuki gene luchu lei; zai chigene herai ze hang dai ze tingpeî ’mbia Jeriko ’ngkum riâ chang lei, zai chigene tingbia ’mbia gu heramloa luhangchang lei; zai Beth-aben gu ’nrêu gene chize tud kai lei.

¹³Zai chigene herai ze Luz ’nchui ge Luz ’ngkum ’mbia tingpî ’mbia luî-luî ze pelapat te lei. (Chize Bethel acheu ze du ku lei), zai ’ngkangbe Beth-horon gene tingpî ’mbia ge kedeiloa bambe ge Ataroth-addar bâm ge herai ze lukeu de lei.

¹⁴Zai heramrai ze chize tingrun ’mbia, chize Beth-horon je teidabe tingpî ’mbia ge kedeiloa bambe gene tingpî ’mbia ge tei’nrik kai ze katlam ’mbia lutat te lei, zai chize Juda zat gu namdi, Kiriath-baal gene tud kai de lei, (chize â Kiriathjearim de lei), aize ne tingrun ’mbia gu heramrai hang chang de lei.

¹⁵Zai tingpî ’mbia gu heramrai ze Kiriath-jearim hia gene luchu lei; zai chigene heramrai ze tingbia ’mbia ge Nephtoa geuki ’mbe tat kai lei;

¹⁶zai heramrai ze tingpeî ’mbia ge Raphaim kâm tû ge bambe, Hinnombe na kâm ngauyibe deiloa pî riâ lukeuchang lei; zai tingpî ’mbia Jebus ’ngkum; Hinnom kâm lukeu kadai lei, zai chigene ’ngkang ’mbia En-rogel ge teichang gai lei,

¹⁷zai chigene tingpeî ’mbia En-shemesh ge keliklap kai ze, chigene Geliloth, Adummim gap gene katlam ’mbia ge tat kai lei; chigene heramrai ze Reubenbe na gu Bohan chusum ge wangkeu gai lei (Bohanbe â Reubenbe na lei);

¹⁸zai tingpeî ’mbia Beth-arabah ’ngkum heramrai kapat ze Araba ge lukeuchang gai lei;

¹⁹zai chigene heramrai ze tingpî ’mbia Beth-hogla ’ngkum lupat lei; zai heramrai ze tingpeî ’mbia ’Nchaî Sungkling luaguâbe gene tud kai lei, tingpî ’mbia Jordan tudkaibe ge zeu: aize tingpî ’mbia gu heramrai de lei.

²⁰Tingbia ’mbia gu zene Jordan pe gu heramrai chang lei. Aize Benjamin zatme ne ka’nrambe heram de lei, penui kiria luigum zeu, heramrai ne heramrai tuaguabe zeu.

²¹Chunage Benjaminbe zatme ki riak luigum ze penui gu namdi ramme ze â, Jeriko, Beth-hogla, Emek-keziz,

²²Beth-arabah, Zemaraim, Bethel,

²³Abbim, Para, Ophra,

²⁴Kepharammoni, Ophni, Geba—namdi kereu ze kena zai chige penui gu keloa ramme:

²⁵Gibeon, Rama, Be-eroth,

²⁶Mizpe, Kephira, Mozah,

²⁷Rekem, Irpil, Tarala,

²⁸Zela, Ha-elep, Jebus (chize Jerusalem lei), Gibea, zai Kiriath-jearim —penui keloa ramme du lu gai dege namdi kereu ze medai lei. Aize Benjaminbe kiduîme ne penui zatme riak luigumbe gene heram ka’nrambe de lei.