Read Zeme Naga JOSHUA 2 Bible Online

JOSHUA 2 - Zeme Naga bible

JOSHUA 2

¹Zai Nunbe na Joshuabe ne Shittim gene mi hangna je reine ze ’ngkim ne heram pie ra lang gai ze, “Tat ze heram ze ngau gai ni lau, ’ngkeune ze Jeriko zeu,” ze kacheu de lei. Zai penai tat ze hepumzuateupui pe ji Rahable, kacheupui ki ge gut ze chige rêu gai de lei.

²Zai chize Jeriko heguang je salia bei de lei, “Pie le lau, Israel zat name nemai muî heram peu ra aige wang la lei,” zeu.

³Chidadege â Jeriko heguang ne Rahable dage sam lang gai ze, “Ning dage wangme ziemmena je nguapat chu lau, ning ki ge guttime ze heram pelane pie ra penui wang daseu,” ze kacheu de lei.

⁴Kane ’mpuimi ne penai je tewtimbai gai de lei, zai pa ne, “Gesang de lei, ziemmena a dage wang de lei, kane penai ’ndaigene wang mei be I â chî mak lei;

⁵zai tingmuî namdi kerie’ngkam kainam zi gu dadege penai tat dai di de lei; ’ndai’ngge penai tat kai di mei be du I â chî mak lei; kelua ze ’nsatatchu lau, penai je ningnui guachang gu lei,” acheu bei de lei.

⁶Kane pa ne penai je ’mpûm ’mbe nguachu gai lu ze pa ne megau kehingzun-gailube kangge tei’mbai gai bei de lei.

⁷Dadege penui ne penai je Jordan tatbe ’mpuî luî tat ze depiau ramme riâ suichang de lei; zai penui tattegap dege kerie ’ngkam ze kainam ’ndi de lei.

⁸Penai jeikau mak lage ’mpûm ge penai tailam pa chu lu,

⁹penai je, “Tingwang ne heram ze ningnai je pei ’nde lei be I chî lei, zai ningnai wangbe ziegene anui hangge kehingbe de lei, zai heram lungge bamme leine ze ningnai masua gene hing ze ’ntimrim bam de lei.

¹⁰Ijip gene ningnui zuapatbe luage ningnui suagene Tingwang ne Kegiebe Sungkling dui tewchangkugai’ndibe, zai Jordan gene katlam giam Ammorme gu heguang kena Sihonbe benai Ogbe peireige ningnui tâtewgai’ndibe rasam anui seu lu dadegeu.

¹¹Aize anui seugap dege anui lung ze hingrim di de lei, zai mî dage du gekuube ga di de lei, ningnai ziegeneu; Tingwang ningnai Rapeu, pa ze â ting kehube peireige benai kedei ge bambe Hera daseu.

¹²Chuna gene I ne ningnai je ’nggia bei gum ze a pau ki ge bamme je du ’nggia gu lei, ze Tingwang ji gene achu deseu gai lau, zai chize chirabe hangge mâge â achu tewlia lau,

¹³zai a peu benai a pui je du tew’nring gai lau, a kiduîme ’mpeumi, ’mpuimi je du zai penui dage kebamme leine je du tew’nring gai lau, zai anui keringbe ze kechaibe gene ripat kai lau,” ze kacheu de lei.

¹⁴Zai penai ne pechu, “Anai keringbe ze ningnui hang de lei! Ningnui ne mi dage du anai tâtewbe rasam salia mak tizai â, Tingwang ne anui je heram peipat dezai kehungbe benai lungsang gene anui ning hang tinggeu gu lei,” kacheu de lei.

¹⁵Dadege â pa ne penai je kemuicheiki gene heria gene ’mpatkeu gai bei de lei, pe ki ze kerie peireige bamrabe ziegene namdi gu kerie ge tewtemigaibe ziegeneu.

¹⁶Zai pa ne penai je sa ze, “Ningnai chaisuime je hedau me ra hangge peloa ramme ge tat kai de lau; zai chige hezie kechum ’mbai ze bam de lau, ningnai je peume helatwang dai mak tâneu; chipau châng dezai ningnai ’mpuî ra’mbe tat lau,” ze kacheu de lei.

¹⁷Penai ne pechu, “Nang ne ai samhat ze deseugaibe ze hengêutewbeibe ziegene anui mâu ga gu lei,” ze kacheu de lei.

¹⁸Pie le lau, aipau ram ge anai wang dezai, aipau heria gene nang ne anai je ’mpatkeube ria ze kemuicheiki ge ’ntui gai ra lei, zai ning peu, ning pui, ning sikina zai ning peu kiduîme leine je ning ki ge nguawang’ndui kam gai le lau.

¹⁹Zai mige ning ki kemui gene keloaning patbe kau je â pe jaipâu ze pa ne pung gu lei, anui mâu â bam ra mak lei; kane mige ningnui ki ge bamme peireige hebahua gai dizaine â, pe jaipâu ze anui ne pung gu lei.

²⁰Kane ai anui tâtewbe miramme je nang salia dizai â, nang ne ai samhat kai ze anui deseu ra tewgaibe deu ge anui mâu mâ de ga lei.

²¹Zai pa ne sa ze, “Ningnai ne rangbe luigum ze peize chang lau,” ze kacheu de lei. Zai pa ne penai je tat ra lang gai bei de lei, zai penai tat ti de lei; zai pa ne heriagiebe kitlube kemuicheiki ge ’ntui gai bei de lei.

²²Penai rimna gai lu peloa ’mbe tat kai di de lei, zai chige hezie kechum penai â bam de lei, penai je gua’nchumieme helatwang dai mak tânege zeu, ’nchumieme bau ze ’mpuîki ramme peuzutza tat da, kane ngau mak tai de lei.

²³Zai peloa ’mbene mi hangna wangkeu dai ze tatkapat lu, Nunbe na Joshuabe dage wang de lei; penai ne pechu mâ-wangchangbe leine salia bei de lei.

²⁴Zai penai ne Joshuabe je, “Pelingsing ze Tingwang ne heram pelane anai ba ge pei gai ’nde lei; zai chipau peireige du heram lungge bamme leine anai ziegene hingkedun ze la de lei,” ze kacheu de lei.