Read Zeme Naga JOSHUA 22 Bible Online

JOSHUA 22 - Zeme Naga bible

JOSHUA 22

¹Zai Joshuabe ne, Reubenme, Gadme zai Manassebe zatme pa’mpime je kûwangherua lu,

²pa ne penui je, “Tingwang guâ ka’ngguapeu Mosabe ne ningnui je tew ra ranggaibe leine ningnui tew kam da, zai I ne rangbe leine du ningnui ne pheu kam de lei;

³nemai riâ chang ze ningnui sikiname je put kai mak, kane Tingwang ningnui Rapeu kerangbe ningnui ’ntîngteî ze lu bei de lei.

⁴Zai chunage Tingwang ningnui Rapeu ne ningnui puiname dage pa sam hatkailube luigum ze penui je saukatemibe pei gai bei la de lei; chidaze Jordan gene katlam giam ge Mosabe Tingwang guâ ka’ngguapeu ne ningnui je peigaibe heram ge ningnui heurâ bambe ningnui ki lam’mbe ’nreiwang lu tatchu lau.

⁵Tingwang ningnui Rapeu je hung ra, zai pe gu ’mpuî ge tat’mmi ra, zai pe gu hingde ramme sui’mmi ra, zai pechu ’nggui’mmi ra, zai ningnui lung leine ne benai ningnui keringbe leine ne pe guâ ’nggua ra, Tingwang guâ ka’ngguapeu Mosabe ne ningnui je diegaibe hingde benai samde ramme ze reî’mmi ra chize tei’mmi ze tei lau,” ze kacheu de lei.

⁶Chigum ze Joshuabe ne penui je ’nnam gai lu, penui je tat ra lang gai bei de lei; zai penui ki lam’mbe penui tat ti de lei.

⁷Zai Manassebe zat pa’mpi kat je Mosabe ne Bashanram ge heram pei gai bei de lei; kane Manassebe zat kêdabe pa’mpi kat hangge Joshuabe ne Jordan gene tingrun ’mbia penui sikina taihia ge heram pei gai bei de lei. Zai Joshuabe ne penui je penui ki lam’mbe lang gai ze ’nnamgaibe luage,

⁸pa ne penui je, “Ningnui heurâ misongga tei lu, ningnui gu kaurui misongga gekumwang lu, zai gepût, gechâk, kangngâgeî, zai hegeî, zai paîni misongga tei lu ningnui ki lam’mbe tat dai zu lau; ningnui teureime gu hereichâ ramme ze ningnui sikiname dage ’nzi gai lau,” ze kacheu de lei.

⁹Chigum ze Reubenme benai Gadme zai Manasse zat pa’mpime je Mosabe dagene Tingwang gu samde ziegene penui ne ’nramlube heram Gileadram ’mbe tat ra hang Kanaanram ge bambe Shilo ge Israelme bamme dagene rimna gai lu ze penui ki lam’mbe helatwang dai di de lei.

¹⁰Zai Kanaanram ge bambe Jordan geubak penui chang dege, Reubenme, zai Gadme, zai Manassebe zat pa’mpime ne Jordan hiage herâtewbe-kaira kedibe tew gai de lei.

¹¹Dadege Israelme ne, “Pie le lau, Reubenme benai Gadme zai Manassebe zat pa’mpime ne Israel gu heram ’mbia Jordan bak ge Kanaan gu heram tûn ge herâtewbe-kaira tew gai de lei,” kacheube kuâ seu de lei.

¹²Zai Israelme chize seu lu dege, Israelme baudime leine Shilo ge wangka’ndui de lei, chime je herei ra hangge zeu.

¹³Dadege Israelme ne tingkupeu Eleazarbe na Phinehabe je Gileadram ge Reubenme, Gadme zai Manassebe zat pa’mpime dage lang gai bei de lei,

¹⁴zai pe dage ’mpeumi besuitewme hangkereu, Israelme kelak’nsangne gene hangkat-kat je lang’mpam gai de lei, penui ’nteumena Israelme kiria ge kelak ge besuitewme kam de lei.

¹⁵Gileadram ge Reubenme, Gadme, zai Manassebe zat pa’mpi dage penui ne wang lu penui je,

¹⁶“Tingwang gu baudime ne aigum ze rang lei, ‘Tingwang peireige ningnui ne ’nggi ze nemai ge ningnui ne herâtewbe-kaira teleu gai ze Tingwang chai suibe gene nemai ningnui ’nreitat dai ze Israelme Rapeu peireige mâ-hangge du ’nninggaimakbe tâ tewbe ze ’ndaigumbe kau rei se lau?

¹⁷Peor ge anui hemuigai’ndibe gene chuna riâ du anui yi’nchi lak bambe, zai chipau gu zene chige Tingwang gu baudime peireige herarît wangbe chize ne du anui hangge yi mak kerei mei,

¹⁸nemai ge Tingwang chai suibe gene ningnui ’nreitathimchangderabe nung zeu? Zai nemai ge ningnui ne Tingwang peireige ’nggi dizai â, ’nchuamai dezai pa ne Israelme bau leine peireige pe lungsia gu lei.

¹⁹Kane chunage ningnui ram ne kahebâ zai â Tingwang je kakellumbeki bambe Tingwang gu heram ge kagut lu anui ruagene ningnui hang heram ’nram le lau; Tingwang je â ’nggi se lau, makchai Tingwang anui Rapeu gu herâtewbe-kaira gumbe makbe ningnui runne ne ningnui hang herâtewbe-kaira kateleube gene anui je du ka’nggime hang â tew gai se lau.

²⁰Zerabe na Akhanbe ne diepat’nchigai’ndibe merua peireige ’nning’nsia gai bei ze Hera lumpum Israelme kibau leine peireige wangchang mak tai semei? Zai pa pe runne pe gu hemui-helut ziegene chai me lei’ acheu zeu,” ze acheu bei de lei.

²¹Dadege Reubenme, Gadme zai, Manassebe zat pa’mpime ne Israelme kibaume ruage besuitewme je kak ze,

²²“Reziechipeu, Hera Tingwang! Reziechipeu Hera, Tingwang! Pa â chî la lei; zai peize Israelme ne du penui runne chî le lau! Aize ne ka’nggibe tâ hang mei nune Tingwang peireige ’nning’nnahagai’ndibe hang mei ze chang leu dizai â, nemai ge anui je ’nsak kai se lau,

²³Tingwang chai suibambe gene ’nnuktat dai ra herâtewbe-kaira kateleu daseu; makchai chigum ze anui ne chige kerûbe-râtewbe hang mei nune mâ-himlei-râtewbe hang mei nune desieyibe-râtewbe hang mei ze tewgaibe chang laleu dizai â, Tingwang pa sing ne peize hekûm lu lau.

²⁴Mak lei, kane bechâng dezai ningnui name ne anui name je, ‘Ningnui ne Tingwang je châutew lau?

²⁵Ningnui Reubenme benai Gadme, ningnui benai anui kakge Jordan zene herai hang Tingwang ne tew gai de lei; Tingwang ge ningnui dam ga lei,’ ze acheu ra hingbe gene anui ne chize tew de lei. Chigum ze Tingwang je kellum ra ningnui name ne anui name je dei’ntau gai bei ta du lei.

²⁶Chipauziegene, ‘Kei lei, chuna herâtewbe-kaira tew kei lei, kerube-râtewbe hanggene mak, zai herâtewbe hanggene mak lei,

²⁷kane anui benai ningnui kakge zai anui chângge reheime karai kakge anui ne anui gu kerube-râtewbe ramme benai herâtewbe ramme, zai desieyibe-râtewbe ramme peipat ze Tingwang hangge pe masuage tâ’nggua bam lei be chî ra sakki hangge zeu; bechâng dezai ningnui name ne anui name je, “Tingwang ge ningnui dam ’ngga lei,” ze acheu mak ra hangge zeu,’ ze anui kacheu de lei.

²⁸Zai bechâng dezai aize anui suage mei nune anui chaname suage mei ze sapat kai lêuzai â anui â, ‘Pie le lau, kerube-râtewbe hanggene makchai herâtewbe hanggene du mak, kane anui benai ningnui kakge sakki hang chang ra anui paume ne Tingwang gu herâtewbe-kaira luîsiakbe tewgaibe jeu,’ ze acheu ra ka’nning de lei.

²⁹Tingwang je anui ne ’nggi ze nemai ge Tingwang anui Rapeu gu herâtewbe-kaira pe gu kakellumbeki masuage bambe gumbe makbe herâtewbe-kaira, anui ne kerube-râtewbe hang mei, mâ-himlei-râtewbe hang mei nune herâtewbe hang mei ze tewgaibe gene Tingwang je sui ta di ’nnuktatrabe hang â anui dagene mâdau peize chang ra mak te lei!” ze kacheu de lei.

³⁰Tingkupeu Phinehabe benai baudime gu besuitewme, Israelme kelak ge besuitewme ramme, pe dage bamme ne Reubenme, Gadme zai Manasseme ne saliabeibe sam ramme seu gai lu, chize ne penui lungsui tew’ntaza gai bei de lei.

³¹Tingkupeu Eleazarbe na Phinehabe ne Gadme, Reubenme zai Manasseme je, “Nemai ge Tingwang anui ruage la lei be anui chî de lei, ningnui Tingwang peireige naîlatewgaimakbeibe ziegeneu; chunage â Tingwang ne gesâbe peirabe gene ningnui ne Israelme je tew’nring gai ’nde lei,” ze kacheu de lei.

³²Chidadege â tingkupeu Eleazarbe na Phinehabe benai besuitewme, Gileadram ge Reubenme benai Gadme bamme dagene Israelme tailam Kanaanram ’mbe helatwang dai ze penui tailam sam pungwang kadai de lei.

³³Zai penui gu sam paugaibe zene Israelme suitew’mmi gai bei de lei; dadege â Israelme Hera je toa ze Reubenme benai Gadme lungbe heram ze tew’nsia gai ra penui ne hereirabe rasam sa ta di ze bam de lei.

³⁴Reubenme benai Gadme ne herâtewbe-kaira je, Sakkitewbe acheu ze kû gai lei; “Tingwang â Hera de lei, kacheube ze aize ne anui kakge sakki de lei,” ze penui ne kacheube ziegeneu.